കായണ്ണ പഞ്ചായത്തിനെ അവഗണിച്ചു; സംസ്ഥാന ബജറ്റിലും എംഎൽഎ ഫണ്ടിലും അവഗണനയെന്ന് ബിജെപി; പ്രതിഷേധം ശക്തം
കായണ്ണ: സംസ്ഥാന ബജറ്റിലും ബാലുശ്ശേരി നിയോജക മണ്ഡലത്തിലെ വികസന പ്രവർത്തനങ്ങളിലും കായണ്ണ പഞ്ചായത്തിനെ പൂർണ്ണമായും അവഗണിച്ചതായി ആരോപിച്ച് ബിജെപി കായണ്ണ പഞ്ചായത്ത് കമ്മിറ്റിയുടെ നേതൃത്വത്തിൽ ശക്തമായ പ്രതിഷേധം. നിയോജക മണ്ഡലം എംഎൽഎ വി.ടി. സൂരജ് കായണ്ണയോട് വിവേചനം കാണിക്കുകയാണെന്ന് യോഗം കുറ്റപ്പെടുത്തി.
പഞ്ചായത്തിലെ റോഡുകൾ ഉൾപ്പെടെയുള്ള അടിസ്ഥാന സൗകര്യങ്ങൾ അങ്ങേയറ്റം ശോചനീയാവസ്ഥയിലാണെന്ന് യോഗം ചൂണ്ടിക്കാട്ടി. കാലവർഷം ശക്തമായതോടെ പല റോഡുകളും ഗതാഗതയോഗ്യമല്ലാതായി മാറിയിട്ടും അറ്റകുറ്റപ്പണികൾക്കായി എംഎൽഎയുടെ വികസന ഫണ്ടിൽ നിന്ന് ഒരു രൂപ പോലും അനുവദിക്കാൻ തയ്യാറായില്ല. റോഡുകൾക്ക് പുറമെ ആരോഗ്യ മേഖലയ്ക്കും മറ്റ് അടിസ്ഥാന വികസന പദ്ധതികൾക്കും കായണ്ണ പഞ്ചായത്തിനെ പരിഗണിക്കാത്തതിൽ നാട്ടുകാർക്കിടയിൽ കടുത്ത അതൃപ്തിയുണ്ട്.
പഞ്ചായത്ത് കമ്മിറ്റി യോഗത്തിൽ കെ.പി. ചന്ദ്രൻ അധ്യക്ഷത വഹിച്ചു. ബിജെപി ജില്ലാ സമിതി അംഗം ജയപ്രകാശ് കായണ്ണ പ്രതിഷേധ സമരം ഉദ്ഘാടനം ചെയ്തു. വികസന കാര്യത്തിൽ ഭരണകക്ഷി എംഎൽഎ കാണിക്കുന്ന ഈ അവഗണനയ്ക്കെതിരെ ശക്തമായ പ്രക്ഷോഭ പരിപാടികളുമായി മുന്നോട്ട് പോകാൻ യോഗം തീരുമാനിച്ചു.
ചടങ്ങിൽ ശശി കേളോത്ത്, രാജേഷ് കായണ്ണ, സി. പ്രകാശൻ, ബാബു പി.സി. തുടങ്ങിയവർ സംസാരിച്ചു.
Comments
Post a Comment