കല്ലറ തുറന്നപ്പോൾ കണ്ടത് അജ്ഞാത മൃതദേഹം; കാണാതായ വിലങ്ങാട് സ്വദേശി സിജോയുടേതെന്ന് കുടുംബത്തിന്റെ ബലമായ സംശയം
വാണിയപ്പാറ/വിലങ്ങാട്: കണ്ണൂർ വാണിയപ്പാറ ഇൻഫന്റ് ജീസസ് പള്ളി സെമിത്തേരിയിലെ കല്ലറയിൽ രണ്ട് മൃതദേഹങ്ങൾ കണ്ടെത്തിയ സംഭവം വലിയ ദുരൂഹതയിലേക്ക്. കല്ലറ തുറന്നപ്പോൾ പെട്ടിയിൽ അടക്കം ചെയ്ത മൃതദേഹത്തിനൊപ്പം പ്ലാസ്റ്റിക് പായയിൽ പൊതിഞ്ഞ നിലയിൽ മറ്റൊരു മൃതദേഹം കൂടി കണ്ടതാണ് ആശങ്കയ്ക്കും അന്വേഷണത്തിനും വഴിവെച്ചത്. കാണാതായ വിലങ്ങാട് സ്വദേശി സിജോ സ്കറിയയുടേതാണ് ഈ മൃതദേഹമെന്ന് കുടുംബം സംശയം പ്രകടിപ്പിച്ചതോടെ സംഭവം പോലീസ് അന്വേഷണത്തിലേക്ക് നീങ്ങി.
ദുരൂഹമായ തിരോധാനം
2014 നവംബർ മുതൽ സിജോയെ കാണാനില്ലെന്നാണ് മാതാപിതാക്കളുടെയും ബന്ധുക്കളുടെയും ഉറച്ച നിലപാട്. സ്വന്തം വീട്ടിൽ അച്ഛനുമായി ഉണ്ടായ തർക്കത്തെത്തുടർന്ന് വാണിയപ്പാറയിലെ ഭാര്യവീട്ടിലേക്ക് മാറിയ സിജോയെ പിന്നീട് കാണാതാവുകയായിരുന്നു. സംഭവത്തിൽ കരിക്കോട്ടക്കരി, കുറ്റ്യാടി പോലീസ് സ്റ്റേഷനുകളിൽ പരാതി നൽകിയെങ്കിലും അന്വേഷണം എവിടെയുമെത്തിയിരുന്നില്ല. സിജോയെ കാണാതായതുമായി ബന്ധപ്പെട്ട് വിവിധ വർഷങ്ങളെച്ചൊല്ലി ആശയക്കുഴപ്പങ്ങൾ നിലനിൽക്കെ, കുടുംബം സത്യം പുറത്തുകൊണ്ടുവരണമെന്ന ആവശ്യവുമായി രംഗത്തെത്തുകയായിരുന്നു.
ഫേസ്ബുക്ക് പോസ്റ്റിലൂടെ പുറത്തായ വിവരം
കഴിഞ്ഞ മാസം 12-ാം തീയതിയോടെയാണ് സെമിത്തേരിയിലെ കല്ലറയിൽ അജ്ഞാത മൃതദേഹം കണ്ടെത്തിയെന്ന വിവരം സോഷ്യൽ മീഡിയയിലൂടെ പുറത്തറിയുന്നത്. പ്രദേശവാസി ജിൽസ് ഉണ്ണിമാക്കൽ പങ്കുവെച്ച ഫേസ്ബുക്ക് പോസ്റ്റാണ് കേസിൽ നിർണായകമായത്. ക്രിസ്ത്യൻ ആചാരപ്രകാരം സെമിത്തേരിയിൽ അടക്കം ചെയ്യുമ്പോൾ പായയിൽ പൊതിഞ്ഞ് മറ്റൊരു മൃതദേഹം വെക്കാറില്ലെന്ന സംശയമാണ് കേസിന് വഴിത്തിരിവായത്. ഇത് പോസ്റ്റ്മോർട്ടം ചെയ്ത മൃതദേഹമാണോ എന്നും സംശയമുണ്ട്.
ഡിഎൻഎ പരിശോധന വേണം: കുടുംബം
കല്ലറയിൽ കണ്ടത് സിജോയുടെ മൃതദേഹമാണോ എന്ന് സ്ഥിരീകരിക്കാൻ ശാസ്ത്രീയ പരിശോധനയും ഡിഎൻഎ ടെസ്റ്റും നടത്തണമെന്ന് കുടുംബം ആവശ്യപ്പെടുന്നു. ഇക്കാര്യം ഉന്നയിച്ച് മുഖ്യമന്ത്രിക്കും ഡിജിപിക്കും പരാതി നൽകാനാണ് കുടുംബത്തിന്റെ തീരുമാനം.
അന്വേഷണം തുടങ്ങി
കരിക്കോട്ടക്കരി പോലീസ് സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്. കല്ലറയിൽ കണ്ടെത്തിയ വസ്തു മൃതദേഹം തന്നെയാണോ എന്ന് ആദ്യം ശാസ്ത്രീയമായി സ്ഥിരീകരിക്കേണ്ടതുണ്ടെന്നും, തുടർന്ന് മാത്രമേ ഡിഎൻഎ പരിശോധന ഉൾപ്പെടെയുള്ള നടപടികളിലേക്ക് കടക്കാൻ കഴിയൂ എന്നും പോലീസ് അധികൃതർ വ്യക്തമാക്കി. അപ്രതീക്ഷിത സംഭവവികാസത്തോടെ വാണിയപ്പാറയും വിലങ്ങാടും ഒരുപോലെ ഉദ്വേഗത്തിലാണ്
Comments
Post a Comment