അമ്മയുടെ വിയോഗം തകർത്തത് ഒരു കുടുംബത്തെ; ഒന്നര വയസ്സുകാരനുമായി സ്കൂളിലെത്തുന്ന ഒൻപതാം ക്ലാസുകാരി

 

നേപ്പാൾ: ഒൻപതാം ക്ലാസുകാരിയായ അസ്മിത തമാങ് എന്ന പെൺകുട്ടിയുടെ ജീവിതം ഇപ്പോൾ സോഷ്യൽ മീഡിയയിലും സാംസ്‌കാരിക ലോകത്തും ചർച്ചയാകുന്നത് അത്യന്തം വേദനിപ്പിക്കുന്ന ഒരു കാഴ്ചയിലൂടെയാണ്. കളിച്ചു നടക്കേണ്ട പ്രായത്തിൽ, വിധി തോളിലേൽപ്പിച്ച വലിയൊരു ഉത്തരവാദിത്തം നെഞ്ചിലേറ്റിക്കൊണ്ട് തന്റെ ഒന്നര വയസ്സുകാരൻ അനിയനെയും ചേർത്തുപിടിച്ച് അവൾ സ്കൂളിലെത്തുന്നു.

​കഴിഞ്ഞ കുറച്ചു ദിവസങ്ങളായി ഇന്റർനെറ്റിൽ വൈറലായിക്കൊണ്ടിരിക്കുന്ന ഈ ദൃശ്യങ്ങൾ ആരുടെയും കരളലിയിപ്പിക്കുന്നതാണ്. അസ്മിതയുടെ അമ്മ അടുത്തിടെയാണ് മരണപ്പെട്ടത്. അമ്മയുടെ അകാല വിയോഗത്തോടെ ആ കുടുംബം വലിയൊരു പ്രതിസന്ധിയിലായി. കൂലിപ്പണിക്കാരനായ പിതാവിന് ജീവിക്കാൻ വേണ്ടി പകൽ സമയങ്ങളിൽ ജോലിക്ക് പോയേ മതിയാകൂ. വീട്ടിൽ കുഞ്ഞിനെ നോക്കാൻ മറ്റാരും ഇല്ലാത്ത സാഹചര്യത്തിലാണ്, പഠനം മുടക്കാതിരിക്കാൻ അസ്മിത അനിയനെയും കൂട്ടി സ്കൂളിലേക്ക് വരാൻ തീരുമാനിച്ചത്.

​ക്ലാസ് മുറിയിൽ വെച്ച് അധ്യാപകർ തങ്ങളുടെ സാഹചര്യത്തെക്കുറിച്ച് ചോദിച്ചപ്പോൾ, നിയന്ത്രണം വിട്ട് പൊട്ടിക്കരയുന്ന അസ്മിതയുടെ കാഴ്ച ഏവരുടെയും കണ്ണുനനയിച്ചു. പഠനത്തിലും സുഹൃത്തുക്കളിലും മാത്രം ശ്രദ്ധ കേന്ദ്രീകരിക്കേണ്ട ഈ ചെറിയ പ്രായത്തിൽ, അമ്മയുടെ സ്ഥാനത്ത് നിന്ന് അനിയനെ നോക്കുന്ന അസ്മിതയുടെ മനക്കരുത്തിനെ പലരും പ്രശംസിക്കുന്നുണ്ടെങ്കിലും, ഇത്രയും ചെറിയൊരു കുട്ടിയക്ക് ഇത്തരമൊരു ദുരവസ്ഥ നേരിടേണ്ടി വന്നത് സമൂഹത്തിന്റെയാകെ സങ്കടമായി മാറുകയാണ്.