കക്കയത്ത് അർദ്ധരാത്രിയിലെ 'അതിഥികൾ'; നിമിഷങ്ങൾക്കുള്ളിൽ തകർന്നത് കഠിനാധ്വാനം;

കൂരാച്ചുണ്ട്:   കക്കയം മേഖലയിൽ കാട്ടാനകളുടെ വിളയാട്ടം തുടരുന്നു. കഴിഞ്ഞ ഒരു മാസമായി ഓട്ടപ്പാലം, മണ്ടോപ്പാറ, കല്ലാനോട് ഭാഗങ്ങളിൽ ഭീതി വിതച്ച കാട്ടാനക്കൂട്ടം, ഇപ്പോൾ കക്കയത്തെ ജനവാസ കേന്ദ്രങ്ങളെ ലക്ഷ്യമാക്കി നീങ്ങിയിരിക്കുകയാണ്.

​"കണ്ണുമുന്നിൽ കണ്ടത് അഞ്ച് ആനകളെ..." - തേക്കാനത്ത് ബേബി

പുലർച്ചെ മൂന്നുമണിയോടെ ഉണ്ടായ ആനയുടെ വരവിനെക്കുറിച്ച് തേക്കാനത്ത് ബേബി ഞെട്ടലോടെയാണ് ഓർക്കുന്നത്. "വീടിന് പുറത്ത് നായകളുടെ നിർത്താതെയുള്ള കുര കേട്ടാണ് ഞെട്ടി ഉണർന്നത്. പതിവില്ലാത്ത ശബ്ദമായതുകൊണ്ട് പുറത്തിറങ്ങി നോക്കാൻ ഭയമായിരുന്നു. പിന്നീട് ലൈറ്റ് ഇട്ടപ്പോൾ കണ്ടത് അവിശ്വസനീയമായ കാഴ്ചയാണ്. വീട്ടുമുറ്റത്ത് അഞ്ച് കാട്ടാനകൾ! ഞങ്ങളുടെ മുറ്റത്തുനിന്നുള്ള വാഴകൾ അവ അനായാസം നശിപ്പിച്ചു. വീട്ടിൽ ലൈറ്റ് തെളിഞ്ഞതോടെയാണ് അവ സമീപത്തെ കൃഷിയിടത്തിലേക്ക് നീങ്ങിയത്," ബേബി പറഞ്ഞു

"കണ്ണെത്താ ദൂരത്തോളം വളർത്തിയ കൃഷി നിമിഷനേരം കൊണ്ട് നിലംപരിശാക്കി" -   രാജൻ

കക്കയം മുപ്പതാം മൈൽ സ്വദേശിയായ പാറക്കൽ രാജൻ ഇപ്പോഴും ആ ഞെട്ടലിലാണ്.  പുലർച്ചെ വീട്ടുമുറ്റത്ത് അസാധാരണമായ ശബ്ദം കേട്ടുണർന്ന രാജനും കുടുംബവും കണ്ടത് തങ്ങളുടെ കൃഷിയിടത്തിൽ നിലയുറപ്പിച്ചിരിക്കുന്ന രണ്ട് കാട്ടാനകളെയാണ്. "കണ്ണെത്താ ദൂരത്തോളം വളർത്തിക്കൊണ്ടുവന്ന തെങ്ങും കവുങ്ങും വാഴയുമെല്ലാം നിമിഷനേരം കൊണ്ട് അവ നിലംപരിശാക്കി. ശബ്ദം കേട്ട് പുറത്തിറങ്ങി ലൈറ്റടിച്ചപ്പോൾ ആനകൾ തൊട്ടരികിൽ നിൽക്കുന്നു. ജീവൻ തിരിച്ചു കിട്ടിയത് ഭാഗ്യം കൊണ്ട് മാത്രം," രാജൻ പറഞ്ഞു.

​പ്രതിരോധം പാളുന്നുവോ?

​നേരത്തെ പെരുവണ്ണാമൂഴി റിസർവോയർ നീന്തിക്കടന്നായിരുന്നു ആനകൾ ഓട്ടപ്പാലം ഭാഗത്തേക്ക് എത്തിയിരുന്നത്. വനം വകുപ്പ് കരയിലും വെള്ളത്തിലും പ്രതിരോധം ശക്തമാക്കിയതോടെ ഈ ഭാഗങ്ങളിൽ ശല്യം കുറഞ്ഞുവെന്ന് കരുതിയെങ്കിലും, ആനകൾ വഴിമാറി കക്കയത്തേക്ക് എത്തുകയായിരുന്നു.

​ഭീതിയിൽ ജനം

​വിവരമറിഞ്ഞ് സ്ഥലത്തെത്തിയ കക്കയം ഫോറസ്റ്റ് സ്റ്റേഷൻ ഉദ്യോഗസ്ഥരും ആർആർടി സംഘവും പടക്കം പൊട്ടിച്ചാണ് ആനകളെ തുരത്തിയത്. എന്നാൽ, തുടർച്ചയായുണ്ടാകുന്ന ഈ ആക്രമണങ്ങളിൽ വനം വകുപ്പിന്റെ പട്രോളിങ് ഈ മേഖലയിൽ ശക്തമാക്കണമെന്നാണ് നാട്ടുകാരുടെ ഏകസ്വരത്തിലുള്ള ആവശ്യം. ഓട്ടപ്പാലത്ത് കഴിഞ്ഞദിവസം രാത്രി ഏഴ് മണിയോടെ ആനകൾ എത്തിയതും ജനങ്ങളിൽ വലിയ ആശങ്കയാണുണ്ടാക്കിയിരിക്കുന്നത്.

​വനമേഖലയിൽ നിന്നും ജനവാസ കേന്ദ്രങ്ങളിലേക്ക് ആനകൾ സുഗമമായി എത്തുന്ന ഈ സാഹചര്യം കക്കയം നിവാസികളെ ഉറക്കമില്ലാത്ത രാവുകളിലേക്ക് തള്ളിവിട്ടിരിക്കുകയാണ്.

ആവശ്യങ്ങൾ ശക്തം

കക്കയം മേഖലയിൽ വനം വകുപ്പിന്റെ പട്രോളിങ് സംഘം 24 മണിക്കൂറും നിരീക്ഷണം നടത്തണമെന്നാണ് കർഷകർ ഒന്നടങ്കം ആവശ്യപ്പെടുന്നത്. വനത്തോട് ചേർന്നുകിടക്കുന്ന പ്രദേശമായതിനാൽ ഇത്തരം ആക്രമണങ്ങൾ ആവർത്തിക്കാതിരിക്കാൻ ശാസ്ത്രീയമായ പ്രതിരോധ സംവിധാനങ്ങൾ ഒരുക്കണമെന്നും അവർ ആവശ്യപ്പെടുന്നു. കൂരാച്ചുണ്ട് പഞ്ചായത്തിലെ വിവിധ വാർഡുകളിലായി തുടരുന്ന ഈ കാട്ടാനശല്യം കർഷകരെ വലിയ സാമ്പത്തിക പ്രതിസന്ധിയിലേക്കും കൂടിയാണ് തള്ളിവിടുന്നത്.