എക്കൽമല പാലം നിർമ്മാണം വേഗത്തിലാക്കാൻ നിർദ്ദേശം; പൂഴിത്തോടിൽ വികസന വിലയിരുത്തലുമായി എം.എൽ.എ
പൂഴിത്തോട്: പൂഴിത്തോടിൻ്റെ സമഗ്ര വികസനത്തിന് പുതിയ പ്രതീക്ഷകൾ നൽകിക്കൊണ്ട് പേരാമ്പ്ര നിയോജകമണ്ഡലം എം.എൽ.എ അഡ്വ. ഫാത്തിമ തഹ്ലിയ പൂഴിത്തോടിൽ സന്ദർശനം നടത്തി. എം.എൽ.എ ഫണ്ട് ഉപയോഗിച്ച് വരുംദിവസങ്ങളിൽ പൂഴിത്തോടിലും നാലാം വാർഡിലും എന്തെല്ലാം പുതിയ വികസന പ്രവൃത്തികൾ കൊണ്ടുവരാം എന്ന് ആലോചിക്കുന്നതിനും വികസന സാധ്യതകൾ നേരിട്ട് വിലയിരുത്തുന്നതിനുമായാണ് എം. എൽ. എ പ്രധാനമായും എത്തിയത്.
പൂഴിത്തോട് എക്കൽമല പാലത്തിന്റെ നിർമ്മാണ പ്രവൃത്തികൾ എം.എൽ. എ ചോദിച്ചറിഞ്ഞു
നിലവിൽ നിർമ്മാണപ്രവർത്തികൾ പുരോഗമിക്കുന്ന പൂഴിത്തോട് എക്കൽമല പാലത്തിന്റെ നിർമ്മാണ സ്ഥലത്താണ് എം.എൽ. എ സന്ദർശനം നടത്തി കാര്യങ്ങൾ വിലയിരുത്തിയത്. സ്ഥലത്തുണ്ടായിരുന്ന പൊതുമരാമത്ത് വകുപ്പ് ഉദ്യോഗസ്ഥരോടും, എഞ്ചിനീയർമാരോടും, പ്രവൃത്തിയുടെ കരാർ എടുത്തിട്ടുള്ള ഊരാളുങ്കൽ സൊസൈറ്റി പ്രതിനിധികളോടും പാലത്തിന്റെ നിർമ്മാണ പുരോഗതിയെക്കുറിച്ച് അവർ ചോദിച്ചറിഞ്ഞു.
പാലത്തിന്റെ പണി പൂർത്തിയാക്കാൻ നിലവിൽ ഫണ്ട് കുറഞ്ഞുപോയതാണോ അതോ നിർമ്മാണം വേഗത്തിലാക്കാൻ എന്തെങ്കിലും തടസ്സങ്ങളുണ്ടോ തുടങ്ങിയ കാര്യങ്ങളെക്കുറിച്ച് ഉദ്യോഗസ്ഥരുമായി എം.എൽ. എ വിശദമായി ചർച്ച ചെയ്തു. വികസന പ്രവൃത്തികൾക്ക് ആവശ്യമായ എല്ലാ പിന്തുണയും എം.എൽ. എ ഉറപ്പുനൽകിയിട്ടുണ്ട്.
എം.എൽ .എ ഫണ്ടും പൂഴിത്തോടിന്റെ പുത്തൻ വികസനങ്ങളും
പൂഴിത്തോട് എം.എൽ .എ ഫണ്ട് ഫലപ്രദമായി ഉപയോഗിച്ച് ഏതൊക്കെ മേഖലകളിൽ പുതിയ വികസന പദ്ധതികൾ കൊണ്ടുവരാം എന്നതിനെക്കുറിച്ച് ജനപ്രതിനിധികളും നാട്ടുകാരുമായി എം.എൽ .എ വിശദമായ ആശയവിനിമയം നടത്തി. വരും നാളുകളിൽ പ്രാദേശിക അടിസ്ഥാന സൗകര്യ വികസനത്തിനും റോഡുകളുടെ നവീകരണത്തിനുമായി എം.എൽ .എ ഫണ്ടിൽ നിന്നും ആവശ്യമായ തുക മുൻഗണനാക്രമത്തിൽ വകയിരുത്താമെന്നും അവർ ഉറപ്പുനൽകി.
പ്രതിനിധികളും രാഷ്ട്രീയ സാംസ്കാരിക നേതാക്കളും ഒന്നിച്ച്
നാടിയുടെ വികസന ചർച്ചകൾക്കായി രാഷ്ട്രീയഭേദമന്യേ വൻ ജനപങ്കാളിത്തമാണ് സന്ദർശന വേളയിൽ ദൃശ്യമായത്. ചക്കിട്ടപ്പാറ ഗ്രാമപഞ്ചായത്ത് പ്രസിഡന്റും നാലാം വാർഡ് മെമ്പറുമായ ശ്രീമതി മോളി തോമസ്, ഗ്രാമപഞ്ചായത്ത് വൈസ് പ്രസിഡന്റ് ജിതേഷ് മുതുകാട്, ചക്കിട്ടപ്പാറ ഗ്രാമപഞ്ചായത്ത് ഭരണസമിതി അംഗങ്ങൾ, പ്രദേശത്തെ പ്രമുഖ രാഷ്ട്രീയ പാർട്ടി നേതാക്കൾ, കോൺഗ്രസ് - മഹിളാ കോൺഗ്രസ് പ്രവർത്തകർ, കാർഷിക മേഖലയിലെ പ്രമുഖർ എന്നിവരും നാട്ടിലെ നല്ലവരായ ജനങ്ങളും എം.എൽ .എയെ സ്വീകരിക്കാനും വികസന ചർച്ചകളിൽ പങ്കാളികളാകാനും ഒന്നിച്ച് അണിനിരന്നു.
പൂഴിത്തോട്-പടിഞ്ഞാറത്തറ റോഡ്; സമരസമിതിയുമായും നാട്ടുകാരുമായും ചർച്ച നടത്തി
പൂഴിത്തോടിലെ വികസന കാര്യങ്ങൾ സംസാരിക്കുന്ന കൂട്ടത്തിൽ, നമ്മുടെ മലയോര ജനതയുടെയും കർഷകരുടെയും വർഷങ്ങളായുള്ള വലിയ സ്വപ്ന പദ്ധതിയായ പൂഴിത്തോട് - പടിഞ്ഞാറത്തറ റോഡിന്റെ യാഥാർത്ഥ്യം അവിടെയുണ്ടായിരുന്ന സമരസമിതി നേതാക്കളും നാട്ടുകാരും ചേർന്ന് എം.എൽ .എയുടെ ശ്രദ്ധയിൽ വീണ്ടും അവതരിപ്പിച്ചു. റോഡ് യാഥാർത്ഥ്യമാക്കേണ്ടതിന്റെ അനിവാര്യതയെക്കുറിച്ച് സമരസമിതി നേതാക്കളും നാട്ടുകാരും എം.എൽ .എയുമായി വിശദമായി സംസാരിക്കുകയും, എം.എൽ .എ അവരുമായി ഈ വിഷയത്തിൽ ആഴത്തിൽ ചർച്ച നടത്തുകയും ചെയ്തു.
എം.എൽ .എയുടെ ഈ സന്ദർശനവും വികസന ചർച്ചകളും പൂഴിത്തോടിന്റെയും നാലാം വാർഡിന്റെയും നാളത്തെ മുന്നേറ്റങ്ങൾക്ക് വലിയൊരു വഴികാട്ടിയാകും എന്നതിൽ തർക്കമില്ല. പ്രവൃത്തികൾ വേഗത്തിലാക്കാനുള്ള എം.എൽ.എയുടെ ഇടപെടൽ ജനങ്ങൾക്ക് വലിയ ആശ്വാസമാണ് നൽകുന്നത്.
Comments
Post a Comment