കുവൈത്ത് വിമാനത്താവളത്തിന് നേരെ മിസൈൽ-ഡ്രോൺ ആക്രമണം: ഒരാൾ കൊല്ലപ്പെട്ടു; വ്യോമഗതാഗതം പുനരാരംഭിച്ചു
കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിനും വിവിധ സുപ്രധാന സിവിലിയൻ കേന്ദ്രങ്ങൾക്കും നേർക്കുണ്ടായ ഇറാൻ്റെ ബാലിസ്റ്റിക് മിസൈൽ, ഡ്രോൺ ആക്രമണങ്ങളിൽ ഒരാൾ കൊല്ലപ്പെട്ടതായി കുവൈത്ത് സ്ഥിരീകരിച്ചു. ആക്രമണത്തിൽ നിരവധി പേർക്ക് പരിക്കേൽക്കുകയും വിമാനത്താവളത്തിലെ ടി1 (T1) യാത്രാ ടെർമിനലിന് കേടുപാടുകൾ സംഭവിക്കുകയും ചെയ്തതായി പ്രതിരോധ മന്ത്രാലയ വക്താവ് ബ്രിഗേഡിയർ ജനറൽ സൗദ് അബ്ദുൽഅസീസ് അൽ-ഒതൈബി അറിയിച്ചു.
പൂർണതോതിൽ നവീകരണ പ്രവർത്തനങ്ങൾ പൂർത്തിയാക്കി വിമാനത്താവളം തുറന്നതിൻ്റെ തൊട്ടടുത്ത ദിവസമാണ് സിവിലിയൻമാരെയും സുപ്രധാന കേന്ദ്രങ്ങളെയും ലക്ഷ്യമിട്ട് ഈ ആക്രമണം ഉണ്ടായത്. ഇന്ന് പുലർച്ചെയും വിമാനത്താവളത്തിന് നേരെ വീണ്ടും ആക്രമണശ്രമമുണ്ടായി. കുവൈത്തിലെ വിവിധ നയതന്ത്ര മിഷൻ ഓഫീസുകൾക്ക് നേരെയും ആക്രമണമുണ്ടായതായാണ് വിദേശകാര്യ മന്ത്രാലയം വ്യക്തമാക്കുന്നത്.
വിമാന സർവീസുകൾ താൽക്കാലികമായി നിർത്തിവെച്ചു; നിലവിൽ പ്രവർത്തനം പുനരാരംഭിച്ചു
ആക്രമണത്തെ തുടർന്ന് സുരക്ഷ മുൻനിർത്തി കുവൈത്ത് അന്താരാഷ്ട്ര വിമാനത്താവളത്തിൽ നിന്നുള്ള സർവീസുകൾ താൽക്കാലികമായി നിർത്തിവെച്ചിരുന്നു. എയർപോർട്ടിൽ പാർക്ക് ചെയ്തിരുന്ന വിമാനങ്ങൾ സുരക്ഷിത സ്ഥാനങ്ങളിലേക്ക് മാറ്റുകയും ചെയ്തു.
ജനറൽ അതോറിറ്റി ഓഫ് സിവിൽ ഏവിയേഷനുമായി ഏകോപിപ്പിച്ച് കുവൈത്ത് എയർവേയ്സ് തങ്ങളുടെ സർവീസുകൾ അടുത്ത അറിയിപ്പ് ഉണ്ടാകുന്നത് വരെ താൽക്കാലികമായി നിർത്തിവെച്ചതായി അറിയിച്ചിരുന്നു. എന്നാൽ, നിലവിൽ തടസ്സങ്ങൾ നീക്കി വിമാനത്താവളത്തിന്റെ പ്രവർത്തനം പുനരാരംഭിച്ചിട്ടുണ്ട്.
സുരക്ഷ 'ചുവപ്പ് രേഖ'; തിരിച്ചടിക്കാൻ അവകാശമുണ്ടെന്ന് കുവൈത്ത്
ആക്രമണത്തെ ശക്തമായ ഭാഷയിൽ അപലപിച്ച കുവൈത്ത് വിദേശകാര്യ മന്ത്രാലയം, രാജ്യത്തിന്റെ സുരക്ഷ എന്നത് യാതൊരു വിട്ടുവീഴ്ചയുമില്ലാത്ത 'ചുവപ്പ് രേഖ' യാണെന്ന് വ്യക്തമാക്കി.
- നിയമലംഘനം: ഈ ആക്രമണം അന്താരാഷ്ട്ര നിയമങ്ങളുടെയും, ഐക്യരാഷ്ട്രസഭാ ചാർട്ടറിന്റെയും, യുഎൻ സുരക്ഷാ കൗൺസിൽ പ്രമേയങ്ങളുടെയും നഗ്നമായ ലംഘനമാണ്.
- നിലപാട്: മേഖലയുടെ സുരക്ഷയും സ്ഥിരതയും തകർക്കുന്ന ഇത്തരം ആവർത്തിച്ചുള്ള പ്രകോപനങ്ങൾ ഒരിക്കലും അംഗീകരിക്കില്ല.
- പ്രതികരണം: അന്താരാഷ്ട്ര നിയമങ്ങൾ അനുസരിച്ച് രാജ്യത്തിന് നേരെ ഉണ്ടാകുന്ന ഇത്തരം ആക്രമണങ്ങൾക്ക് നേരെ ഉചിതമായ രീതിയിൽ തിരിച്ചടിക്കാൻ കുവൈത്തിന് പൂർണ്ണ അവകാശമുണ്ട്.
ഗൾഫ് രാജ്യങ്ങൾ ഒറ്റക്കെട്ടായി നിൽക്കണം: യുഎഇ
കുവൈത്തിന് നേർക്കുണ്ടായ ആക്രമണത്തിന്റെ പശ്ചാത്തലത്തിൽ ഗൾഫ് രാജ്യങ്ങൾ ഒറ്റക്കെട്ടായി നിലകൊള്ളണമെന്ന് യുഎഇ പ്രസിഡന്റിന്റെ ഉപദേഷ്ടാവ് അൻവർ ഗർഗാഷ് ആഹ്വാനം ചെയ്തു. ഇത്തരം സുരക്ഷാ ഭീഷണികളെ പ്രാദേശികമായി ഒന്നിച്ച് നിന്ന് നേരിടണമെന്നും, മേഖലയുടെ സ്ഥിരത ഉറപ്പാക്കാൻ സംയുക്ത നിലപാട് അത്യാവശ്യമാണെന്നും അദ്ദേഹം വ്യക്തമാക്കി.
Comments
Post a Comment