ലക്ഷങ്ങളുടെ ഐടി ജോലി കളഞ്ഞ് 65 ലക്ഷവുമായി നാട്ടിലെത്തി; പശു ഫാം തുടങ്ങി ലൈസൻസിനായി ഓഫീസുകൾ കയറിയിറങ്ങി യുവാവ്; മങ്കരയിൽ വീണ്ടും ഒരു 'മിഥുനം' കഥ!

 

മങ്കര: വ്യവസായ സൗഹൃദ റാങ്കിംഗിൽ കേരളം ഒന്നാമതാണെന്ന അധികാരികളുടെ ആവർത്തിച്ചുള്ള പ്രഖ്യാപനങ്ങൾ വെറും ജലരേഖയാകുന്നതായി പരാതി. ലക്ഷങ്ങൾ ശമ്പളമുണ്ടായിരുന്ന ബംഗളൂരുവിലെ സോഫ്റ്റ്‌വെയർ എഞ്ചിനീയർ ജോലി ഉപേക്ഷിച്ച്, സ്വന്തം നാട്ടിൽ പശു ഫാം തുടങ്ങിയ പാലക്കാട് മങ്കര സ്വദേശിയായ വിനോദ് എന്ന യുവാവാണ് ഒരു വർഷത്തിലധികമായി ലൈസൻസിനായി സർക്കാർ ഓഫീസുകൾ കയറിയിറങ്ങി വഴിമുട്ടി നിൽക്കുന്നത്.

​കോവിഡ് പ്രതിസന്ധിയുടെ കാലത്താണ് വിനോദ് സ്വന്തം നാട്ടിൽ ഒരു ഡയറി ഫാം എന്ന സ്വപ്നം വിഭാവനം ചെയ്തത്. ഇതിനായി തന്റെ അധ്വാനത്തിൽ നിന്നും സമ്പാദ്യത്തിൽ നിന്നും ഏകദേശം 65 ലക്ഷത്തോളം രൂപയാണ് ഈ യുവാവ് മങ്കരയിൽ നിക്ഷേപിച്ചത്. എന്നാൽ സംരംഭം തുടങ്ങി ഒരു വർഷം പിന്നിട്ടിട്ടും മലിനീകരണ നിയന്ത്രണ ബോർഡിന്റെയും  മറ്റ് തദ്ദേശ സ്ഥാപനങ്ങളിലെ ഉദ്യോഗസ്ഥരുടെയും മെല്ലെപ്പോക്കും പിടിവാശിയും കാരണം ഫാം നിയമപരമായി മുന്നോട്ട് കൊണ്ടുപോകാൻ കഴിയാത്ത അവസ്ഥയിലാണ്.

​ശാസ്ത്രീയ സംവിധാനങ്ങളുണ്ടായിട്ടും ചുവപ്പുനാട

​  ഫാമിന്റെ പരിസരപ്രദേശങ്ങളിലൊന്നും ജനവാസമുള്ള വീടുകൾ ഇല്ലെന്നിരിക്കെയാണ് ഉദ്യോഗസ്ഥർ അനുമതി നിഷേധിക്കുന്നത്. ബയോഗ്യാസ് പ്ലാന്റ് ഉൾപ്പെടെയുള്ള അത്യാധുനികവും ശാസ്ത്രീയവുമായ മാലിന്യ സംസ്കരണ സംവിധാനങ്ങൾ ഫാമിൽ ഒരുക്കിയിട്ടുണ്ട്. എന്നിട്ടും അനുമതി നൽകാതെ ഓരോ കാരണങ്ങൾ പറഞ്ഞ് ഉദ്യോഗസ്ഥർ ഫയലുകൾ ചുവപ്പുനാടയിൽ കുരുക്കുകയാണെന്ന് വിനോദ് പറയുന്നു.

​മറ്റു സംസ്ഥാനങ്ങളിൽ പശു ഫാമുകൾക്ക് ഇത്തരത്തിൽ കടുത്ത ലൈസൻസ് നിബന്ധനകളോ ഉദ്യോഗസ്ഥ പീഡനങ്ങളോ ഇല്ലെന്നിരിക്കെയാണ്, സ്വന്തം നാട്ടിൽ നാലുപേർക്ക് തൊഴിൽ നൽകാനും കൃഷി വ്യാപിപ്പിക്കാനും എത്തിയ പ്രവാസി മലയാളിക്ക് ഈ ദുരവസ്ഥ നേരിടേണ്ടി വരുന്നത്.

​സബ്‌സിഡികൾ നഷ്ടപ്പെടുന്ന അവസ്ഥയിൽ

​സർക്കാർ പദ്ധതികളുടെ വിവിധ ആനുകൂല്യങ്ങളും സബ്‌സിഡികളും ലഭിക്കേണ്ട സമയപരിധി അവസാനിക്കാറായിട്ടും '120 ദിവസത്തിനകം ശരിയാക്കാം' എന്ന പതിവ് മറുപടി മാത്രമാണ് ബന്ധപ്പെട്ട ഓഫീസുകളിൽ നിന്നും ഇപ്പോഴും ലഭിക്കുന്നത്. ഇതോടെ ബാങ്ക് ലോൺ തിരിച്ചടവും ഫാമിന്റെ ദൈനംദിന ചിലവുകളും എങ്ങനെ മുന്നോട്ട് കൊണ്ടുപോകുമെന്ന ആശങ്കയിലാണ് ഇദ്ദേഹം.

​33 വർഷങ്ങൾക്ക് ശേഷവും മാറാത്ത 'മിഥുനം' കഥ

​33 വർഷങ്ങൾക്ക് മുൻപ് റിലീസ് ചെയ്ത പ്രിയദർശൻ-മോഹൻലാൽ ചിത്രമായ 'മിഥുന'ത്തിലെ സേതുമാധവന്റെ കഥയാണ് വിനോദിന്റെ ജീവിതത്തിലൂടെ മങ്കരയിൽ ആവർത്തിക്കപ്പെടുന്നത്. അന്ന് സിനിമയിൽ ബിസ്കറ്റ് ഫാക്ടറി തുടങ്ങാൻ ലൈസൻസിനായി നടന്ന് ചെരുപ്പ് തേഞ്ഞ സേതുമാധവനും ഇന്നത്തെ വിനോദും തമ്മിൽ വ്യവസ്ഥിതികളുടെ കാര്യത്തിൽ ഒരു മാറ്റവുമില്ലെന്ന് നാട്ടുകാരും സാക്ഷ്യപ്പെടുത്തുന്നു.

​എങ്കിലും, എത്ര കടുത്ത പ്രതിസന്ധികൾ ഉണ്ടായാലും സിസ്റ്റത്തിന് മുന്നിൽ തോറ്റുകൊടുക്കാൻ വിനോദ് തയ്യാറല്ല. തന്റെ അനുഭവം നാട്ടിൽ സംരംഭം തുടങ്ങാൻ ആഗ്രഹിക്കുന്ന മറ്റ് യുവാക്കൾക്ക് ഒരു 'ഡിമോട്ടിവേഷൻ' ആകരുത് എന്ന് കരുതി, ഇതിനെതിരെ നിയമപരമായി ശക്തമായി പോരാടാൻ തന്നെയാണ് ഈ യുവാവിന്റെ തീരുമാനം. സർക്കാർ തലത്തിൽ അടിയന്തര ഇടപെടൽ ഉണ്ടായി ഈ യുവാവിന്റെ സംരംഭത്തിന് തടസ്സമില്ലാത്ത അനുമതി പത്രം ലഭ്യമാക്കണമെന്നാണ് നാട്ടുകാരുടെ ആവശ്യം.