ജ്യേഷ്‌ഠന്റെ വിവാഹത്തിനായി തിരിച്ചു, നാട്ടിലെത്തിയില്ല; 62 ദിവസത്തെ തിരച്ചിലിനൊടുവിൽ മലയാളി യുവാവിനെ കണ്ടെത്തിയത് മോർച്ചറിയിൽ

 

അഞ്ചൽ: ഒമാനിലെ മസ്കത്തിൽ രണ്ട് മാസം മുമ്പ് കാണാതായ കൊല്ലം സ്വദേശിയായ യുവാവ് മരിച്ചതായി സ്ഥിരീകരിച്ചു. അഞ്ചൽ കരുകോൺ പുത്തയം അലൻ ഹൗസിൽ നാസറിന്റെയും സൈനം ബീവിയുടെയും മകൻ അനസ് നാസർ (30) ആണ് മരിച്ചത്. ഏറെ നാളത്തെ ആശങ്കകൾക്കും കാത്തിരിപ്പിനും വിരാമമിട്ടുകൊണ്ട്, മസ്കത്തിലെ അസൈബ മിലിട്ടറി ആശുപത്രിയിലാണ് മൃതദേഹം കണ്ടെത്തിയത്. ഡിഎൻഎ പരിശോധനയിലൂടെയാണ് മൃതദേഹം അനസിന്റേതാണെന്ന് അധികൃതർ സ്ഥിരീകരിച്ചത്.

​വാദികബീറിലെ ഒരു ബിൽഡിംഗ് മെറ്റീരിയൽ കമ്പനിയിൽ ജോലി ചെയ്തുവരികയായിരുന്നു അനസ്. നാട്ടിൽ നടക്കുന്ന ജ്യേഷ്ഠന്റെ വിവാഹത്തിൽ പങ്കെടുക്കാനായി അവധിയെടുത്ത് നാട്ടിലേക്ക് മടങ്ങാനിരിക്കുകയായിരുന്നു അദ്ദേഹം. ഇതിനായി മബേല സനയയിൽ ജോലി ചെയ്യുന്ന സഹോദരൻ ഐമൻഷായുടെ അടുത്തേക്ക് അനസ് എത്തിയിരുന്നു.

​യാത്രയ്ക്കായി ഏപ്രിൽ 22-ന് സഹോദരൻ ഐമൻഷാ അനസിനെ മസ്കത്ത് വിമാനത്താവളത്തിൽ എത്തിച്ചു. എന്നാൽ, അനസ് നാട്ടിൽ എത്തിച്ചേർന്നില്ലെന്ന് വ്യക്തമായതോടെ ബന്ധുക്കൾ നടത്തിയ അന്വേഷണത്തിലാണ് ഒമാനിൽ വെച്ച് ഇദ്ദേഹത്തെ കാണാതായ വിവരം മനസ്സിലാക്കിയത്. തുടർന്ന് ഏപ്രിൽ 23-ന് സ്പോൺസർ പൊലീസിൽ പരാതി നൽകുകയും അന്വേഷണം ആരംഭിക്കുകയും ചെയ്തു.

​  മാസങ്ങളോളം നീണ്ട തിരച്ചിലിനൊടുവിൽ അസൈബയിലെ മിലിട്ടറി ആശുപത്രിയിൽ സൂക്ഷിച്ചിരുന്ന മൃതദേഹം അനസിന്റേതാണെന്ന് ഡിഎൻഎ പരിശോധനയിലൂടെ തിരിച്ചറിയുകയായിരുന്നു. മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുന്നു.