പ്രവാസഭൂമിയിൽ ഒറ്റപ്പെട്ട് 40 വർഷം അജ്ഞാതനായി കഴിഞ്ഞ കോഴിക്കോട്; നാദാപുരം സ്വദേശി കുവൈത്തിൽ നിര്യാതനായി

കോഴിക്കോട്: കഴിഞ്ഞ നാല് പതിറ്റാണ്ടായി പ്രവാസ മണ്ണിൽ അജ്ഞാതനായി കഴിഞ്ഞിരുന്ന മലയാളി കുവൈത്തിൽ അന്തരിച്ചു. കോഴിക്കോട് നാദാപുരം ആവടിമുക്ക് സ്വദേശി ഹമീദ് ഇരുന്നായിരിമ്മൽ (65) ആണ് മരിച്ചത്.

    ​ഇറാഖ് അധിനിവേശത്തിന് മുൻപ് കുവൈത്തിൽ എത്തിയ ഹമീദ്, അജ്ഞാതമായ കാരണങ്ങളാൽ നീണ്ട നാപ്പത് വർഷമായി നാട്ടിലേക്കോ വീട്ടിലേക്കോ മടങ്ങുകയോ ബന്ധപ്പെടുകയോ ചെയ്തിരുന്നില്ല. ഇത്രയും കാലം പ്രവാസ ലോകത്ത് എന്ത് സംഭവിച്ചുവെന്നത് നിഗൂഢമായി തുടരുകയാണ്.

​മരണവിവരം അറിഞ്ഞതിനെ തുടർന്ന് കുവൈത്ത് കെ.എം.സി.സി ഹെൽപ്പ് ഡെസ്ക് വിഷയത്തിൽ ഇടപെടുകയായിരുന്നു. തുടർച്ചയായി നടത്തിയ അന്വേഷണത്തിനൊടുവിൽ വിരലടയാള പരിശോധനയിലൂടെയാണ് ഇദ്ദേഹത്തിന്റെ വ്യക്തിഗത വിവരങ്ങൾ ലഭ്യമായത്. ഇത് വഴി നാദാപുരം സ്വദേശിയാണെന്ന് തിരിച്ചറിയുകയും ബന്ധുക്കളെ കണ്ടെത്തുകയുമായിരുന്നു.

​മുഹമ്മദ്, മമ്മു, സുബൈദ, പാത്തു എന്നിവരാണ് സഹോദരങ്ങൾ. മൃതദേഹം നാട്ടിലെത്തിക്കാനുള്ള നടപടികൾ കെ.എം.സി.സി ഹെൽപ്പ് ഡെസ്കിന്റെ നേതൃത്വത്തിൽ പുരോഗമിക്കുകയാണ്. പതിറ്റാണ്ടുകളായി നാട്ടുകാരെയും വീട്ടുകാരെയും കാണാതെ പ്രവാസലോകത്ത് ഒളിച്ചിരുന്ന ഹമീദിന്റെ വേർപാട് പ്രവാസികൾക്കിടയിൽ വലിയ വേദനയാണ് ഉണർത്തുന്നത്.