സൈക്കിൾ നിയന്ത്രണം വിട്ട് 20 അടി താഴ്ചയിലേക്ക് മറിഞ്ഞു; ഏഴാം ക്ലാസ് വിദ്യാർത്ഥിനിക്ക് ദാരുണാന്ത്യം

 

​കൊച്ചി: കാക്കനാട് മാവേലിപുരത്ത് സൈക്കിൾ ചവിട്ടുന്നതിനിടെ നിയന്ത്രണം വിട്ട് 20 അടി താഴ്ചയിലേക്ക് മറിഞ്ഞുവീണ് പന്ത്രണ്ടുകാരിക്ക് ദാരുണാന്ത്യം. കുടിമുകൾ വിദ്യാജ്യോതി സ്കൂളിലെ ഏഴാം ക്ലാസ് വിദ്യാർത്ഥിനി റിഹാന കാതറിൻ ആൻഡ്രൂസ് (12) ആണ് മരിച്ചത്. മാവേലിപുരത്തെ ‘എർത്ത് ഹ്യൂസ് ഓഫ് ലൈഫ്’ ഫ്ലാറ്റിൽ താമസിക്കുന്ന റോഗൻ ആൻഡ്രൂസിന്റെയും ടെഫി കെ. മാത്യുവിന്റെയും മകളാണ്.

​ഇന്നലെ വൈകുന്നേരം അഞ്ച് മണിയോടെയായിരുന്നു നാടിനെ നടുക്കിയ സംഭവം. സഹോദരനൊപ്പം സൈക്കിൾ ചവിട്ടുന്നതിനിടെയാണ് അപകടം സംഭവിച്ചത്. ഇറക്കമിറങ്ങി വളയുന്ന ഭാഗത്ത് കൈവരികളോ സുരക്ഷാഭിത്തിയോ ഇല്ലാത്തതിനാൽ, സൈക്കിളിന്റെ നിയന്ത്രണം വിട്ട് കുട്ടി സമീപത്തെ ഫ്ലാറ്റ് സമുച്ചയത്തിന്റെ ഇരുപതടിയോളം താഴ്ചയുള്ള ഇന്റർലോക്ക് പാകിയ മുറ്റത്തേക്ക് വീഴുകയായിരുന്നു.

​വീഴ്ചയിൽ തലയ്ക്ക് ഗുരുതരമായി പരിക്കേറ്റ കുട്ടിയെ ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പ്രദേശത്തെ സുരക്ഷാ വീഴ്ച ചൂണ്ടിക്കാട്ടി നാട്ടുകാർ നേരത്തെ തന്നെ അധികൃതർക്ക് പരാതി നൽകിയിരുന്നുവെങ്കിലും നടപടികൾ വൈകിയതാണ് വലിയൊരു ദുരന്തത്തിന് വഴിയൊരുക്കിയതെന്ന് നാട്ടുകാർ ആരോപിക്കുന്നു.

​കളിച്ചുചിരിച്ചു നടക്കേണ്ട പ്രായത്തിൽ റിഹാനയുടെ അപ്രതീക്ഷിത വിയോഗം കുടുംബത്തെയും നാട്ടുകാരെയും ഒന്നടങ്കം തീരാദുഃഖത്തിലാഴ്ത്തിയിരിക്കുകയാണ്