11 മാസം പ്രായമുള്ള കുഞ്ഞിന്റെ മുഖം പോലും മറന്ന് കടുംകൈ; യുവതിയുടെ മരണത്തിൽ ദുരൂഹത ആരോപിച്ച് ബന്ധുക്കൾ രംഗത്ത്

 

മാനന്തവാടി: എടവക പള്ളിക്കലിൽ കഴിഞ്ഞ ദിവസം ക്വാർട്ടേഴ്സിനുള്ളിൽ യുവതിയെ മരിച്ചനിലയിൽ കണ്ടെത്തിയ സംഭവത്തിൽ ഭർത്താവിനും കുടുംബത്തിനുമെതിരെ ഗുരുതര ആരോപണങ്ങളുമായി ബന്ധുക്കൾ രംഗത്ത്. കുപ്പാടിത്തറ തെറ്റത്ത് സ്വദേശിനി അഫ്സില (27) യെയാണ് തിങ്കളാഴ്‌ച ഉച്ചയോടെ താമസസ്ഥലത്ത് തൂങ്ങിമരിച്ചനിലയിൽ കണ്ടെത്തിയത്. അഫ്‌സിലയുടെ മരണത്തിൽ ഭർത്താവ് എടവക പള്ളിക്കൽ വടക്കേ പുത്തൻപുരയിൽ ജാബിറിന് കൃത്യമായ പങ്കുണ്ടെന്നാണ് കുടുംബത്തിന്റെ ആക്ഷേപം.

​നിരന്തരമായ പീഡനമെന്ന് പരാതി; സമഗ്ര അന്വേഷണത്തിന് ആവശ്യം

​അഫ്സിലയുടെ മരണത്തെപ്പറ്റി സമഗ്രമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്നാവശ്യപ്പെട്ട് അമ്മാവൻ കേളോത്ത് സുലൈമാൻ മാനന്തവാടി പോലീസിൽ പരാതി നൽകി. ജാബിറും അദ്ദേഹത്തിന്റെ വീട്ടുകാരും ചേർന്ന് അഫ്സിലയെ നിരന്തരമായി ശാരീരികമായും മാനസികമായും പീഡിപ്പിച്ചിരുന്നതായി പരാതിയിൽ വ്യക്തമാക്കുന്നു.

​മുൻപും പലതവണ ഇവർക്കിടയിൽ കടുത്ത കുടുംബവഴക്കുകൾ ഉണ്ടായിരുന്നതായും, അപ്പോഴെല്ലാം മഹല്ല് കമ്മിറ്റിയുടെ മധ്യസ്ഥതയിലാണ് പ്രശ്‌നങ്ങൾ പരിഹരിച്ച് ഒത്തുതീർപ്പാക്കിയിരുന്നതെന്നും ബന്ധുക്കൾ പറയുന്നു. ദാമ്പത്യജീവിതത്തിലെ അസ്വാരസ്യങ്ങളെ തുടർന്ന് യുവതി ഇത്തരമൊരു കടുംകൈയിലേക്ക് നീങ്ങിയതിന് പിന്നിൽ വ്യക്തമായ പ്രേരണയുണ്ടെന്നാണ് കുടുംബം ആരോപിക്കുന്നത്.

​  മൂന്ന് പിഞ്ചുമക്കളെ തനിച്ചാക്കി മടക്കം; കണ്ണീരണിഞ്ഞ് നാട്

​പതിനൊന്ന് മാസം മാത്രം പ്രായമുള്ള ഇളയ കുഞ്ഞിന്റെയും, എട്ടും ആറും വയസ്സുള്ള മറ്റ് രണ്ട് മക്കളുടെയും മുഖം മറന്നാണ് അഫ്‌സില ഈ ദാരുണമായ വഴി തിരഞ്ഞെടുത്തത്. ഒരു നിമിഷത്തെ തകർച്ചയിൽ അമ്മയെ നഷ്ടപ്പെട്ട്, എന്താണ് സംഭവിച്ചതെന്നറിയാതെ പകച്ചുനിൽക്കുന്ന കുഞ്ഞുങ്ങളുടെ അവസ്ഥ കണ്ടുനിന്നവരുടെയെല്ലാം നെഞ്ചുലയ്ക്കുന്നതായിരുന്നു. കുടുംബബന്ധങ്ങളിലെ തകർച്ചകൾക്ക് ഒടുവിൽ ഇരയാകേണ്ടി വരുന്നത് ഇത്തരം പിഞ്ചുകുഞ്ഞുങ്ങളാണെന്ന യാഥാർഥ്യം നാടിനെയാകെ സങ്കടത്തിലാഴ്ത്തുന്നു.

​സംഭവത്തിൽ മാനന്തവാടി പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്തിട്ടുണ്ട്. കുടുംബം ഉന്നയിച്ച പീഡന ആരോപണങ്ങളെക്കുറിച്ച് പോലീസ് വിശദമായ അന്വേഷണം ആരംഭിച്ചു.