സഹോദരിയോട് തന്നെ ബുദ്ധിമുട്ടിക്കരുത് എന്ന് പറഞ്ഞു റൂമിലെ കതക് അടച്ച 10 ക്ലാസ്സ്‌ വിദ്യാർത്ഥിയെ മരിച്ച നിലയിൽ കണ്ടെത്തി

 

അഞ്ചുതെങ്ങ്: മാമ്പള്ളി ഓലുവിളാകത്ത് വീട്ടിൽ അലൻ യേശുദാസ് (15) എന്ന പത്താം ക്ലാസ് വിദ്യാർത്ഥിയെ വീടിനുള്ളിൽ മരിച്ച നിലയിൽ കണ്ടെത്തി. കഴിഞ്ഞ ദിവസം രാത്രി 7.50-ഓടെയാണ് സംഭവം. വീടിന്റെ കിടപ്പുമുറിയിൽ തൂങ്ങിയ നിലയിലാണ് കുട്ടിയെ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

​സംഭവദിവസം പതിവിന് വിപരീതമായി സ്കൂൾ ബസിലല്ല, അലൻ നടന്നാണ് വീട്ടിലെത്തിയതെന്ന് നാട്ടുകാർ പറഞ്ഞു. വീട്ടിലെത്തിയ ശേഷം സഹോദരിയോട് "താൻ മുറിയിൽ കയറി പഠിക്കാൻ പോകുകയാണ്, ആരും തന്നെ ബുദ്ധിമുട്ടിക്കരുത്" എന്ന് പറഞ്ഞാണ് അലൻ മുറിക്കുള്ളിലേക്ക് പോയത്.

​മണിക്കൂറുകൾ കഴിഞ്ഞിട്ടും അലനെ പുറത്തുകാണാത്തതിനെ തുടർന്ന് സഹോദരി മുറിയുടെ വാതിലിൽ മുട്ടി വിളിച്ചെങ്കിലും മറുപടിയൊന്നും ലഭിച്ചില്ല. തുടർന്ന് സംശയം തോന്നിയ കുട്ടി സമീപവാസികളെ വിവരം അറിയിക്കുകയായിരുന്നു. നാട്ടുകാർ ചേർന്ന് വാതിൽ ചവിട്ടിത്തുറന്ന് അകത്തു കയറിയപ്പോഴാണ് അലനെ തൂങ്ങിയ നിലയിൽ കണ്ടെത്തിയത്.

​അകാലത്തിൽ പൊലിഞ്ഞ അലൻ യേശുദാസ്, പരേതനായ യേശുദാസ് (പ്രിൻസ്) - റിനു ദമ്പതികളുടെ മകനാണ്. ഓട്ടോ തൊഴിലാളിയായിരുന്ന പിതാവ് യേശുദാസ് പത്തു വർഷം മുൻപ് ഉണ്ടായ ഒരു ഓട്ടോ അപകടത്തിലാണ് മരണപ്പെട്ടത്. അമ്മ റിനു നിലവിൽ കുവൈറ്റിൽ ജോലി ചെയ്തുവരികയാണ്.

​കുടുംബത്തിന്റെ ഏക ആശ്രയമായിരുന്ന അച്ഛന്റെ വിയോഗത്തിന് ശേഷം പ്രവാസിയായ അമ്മയുടെയും ബന്ധുക്കളുടെയും തണലിൽ വളരുകയായിരുന്ന അലന്റെ ആകസ്മികമായ വേർപാട് അഞ്ചുതെങ്ങ് മാമ്പള്ളി നിവാസികളെ ഒന്നടങ്കം ദുഃഖത്തിലാഴ്ത്തിയിരിക്കുകയാണ്. അസ്വാഭാവിക മരണത്തിന് കേസെടുത്ത അഞ്ചുതെങ്ങ് പോലീസ് തുടർനടപടികൾ സ്വീകരിച്ചു വരുന്നു.