കണ്ണീരായി കർഷകന്റെ അധ്വാനം; കൂരാച്ചുണ്ടിൽ കാട്ടാനക്കൂട്ടം കൃഷി തൂത്തെറിഞ്ഞു

 

കൂരാച്ചുണ്ട്: പഞ്ചായത്തിലെ അഞ്ചാം വാർഡ് മണ്ടോപ്പാറ ഭാഗത്ത് കാട്ടാനക്കൂട്ടം ഇറങ്ങി വ്യാപകമായി കൃഷി നശിപ്പിച്ചു. കഴിഞ്ഞ ദിവസം രാത്രിയോടെയാണ് വനമേഖലയിൽ നിന്നിറങ്ങിയ ആനകൾ ജനവാസ കേന്ദ്രത്തിലെത്തി നാശനഷ്ടങ്ങൾ വരുത്തിയത്.

​പ്രദേശത്തെ കർഷകരായ റീജ വെള്ളരിങ്ങാട്ട്, ബിജി ഒറ്റപ്ലാക്കൽ എന്നിവരുടെ കൃഷിയിടങ്ങളിലാണ് പ്രധാനമായും ആനക്കൂട്ടം താണ്ഡവമാടിയത്. റീജയുടെയും ബിജിയുടെയും പറമ്പിലുണ്ടായിരുന്ന നൂറോളം കുലച്ചതും അല്ലാത്തതുമായ വാഴകളും അൻപതിലധികം മൂട് കപ്പയും ആനകൾ പിഴുതെറിയുകയും ചവിട്ടി നശിപ്പിക്കുകയും ചെയ്തു. വലിയ സാമ്പത്തിക നഷ്ടമാണ് കർഷകർക്കുണ്ടായിരിക്കുന്നത്.

​ജനപ്രതിനിധികൾ സ്ഥലം സന്ദർശിച്ചു

വാർത്തയറിഞ്ഞ് പഞ്ചായത്ത് പ്രസിഡന്റ് സിനി ജിനോ, വാർഡ് മെമ്പർ പ്രബീഷ് തളിയോത്ത്, സണ്ണി ജോസഫ് കാനാട്ട്, ആൻസമ്മ എൻ.ജെ എന്നിവർ സ്ഥലം സന്ദർശിച്ചു. കൃഷിനാശം സംഭവിച്ച കർഷകർക്ക് അർഹമായ നഷ്ടപരിഹാരം ലഭ്യമാക്കാൻ വനംവകുപ്പ് അടിയന്തര നടപടി സ്വീകരിക്കണമെന്ന് പഞ്ചായത്ത് അധികൃതർ ആവശ്യപ്പെട്ടു.

​ഭീതിയിൽ നാട്ടുകാർ

തുടർച്ചയായി കാട്ടാനകൾ ജനവാസ കേന്ദ്രങ്ങളിലേക്ക് ഇറങ്ങുന്നത് പ്രദേശവാസികളെ കടുത്ത ഭീതിയിലാഴ്ത്തിയിരിക്കുകയാണ്. രാത്രികാലങ്ങളിൽ പുറത്തിറങ്ങാൻ പോലും സാധിക്കാത്ത അവസ്ഥയാണെന്നും വന്യമൃഗശല്യം തടയാൻ ഫലപ്രദമായ പ്രതിരോധ നടപടികൾ വനംവകുപ്പ് സ്വീകരിക്കുന്നില്ലെന്നും നാട്ടുകാർ പരാതിപ്പെട്ടു. സോളാർ വേലികൾ ഉൾപ്പെടെയുള്ള സംവിധാനങ്ങൾ കാര്യക്ഷമമാക്കണമെന്നാണ് പ്രദേശവാസികളുടെ ആവശ്യം.