ഇൻഡിക്കേറ്ററിനെച്ചൊല്ലി തർക്കം; ഓട്ടോ ഡ്രൈവർക്ക് ക്രൂരമർദനം, ഹെൽമെറ്റ് കൊണ്ട് കാൽ തല്ലിയൊടിച്ചു

 

വൈക്കം: വാഹനം തിരിക്കുന്നതിനിടെ ഇൻഡിക്കേറ്റർ ഇട്ടില്ലെന്നാരോപിച്ച് ഓട്ടോറിക്ഷാ ഡ്രൈവർക്ക് നേരെ യുവാക്കളുടെ ക്രൂരമായ ആക്രമണം. മർദനത്തിൽ മറവൻതുരുത്ത് സ്വദേശി ഇ.ആർ. അരുണിന്റെ (30) വലതുകാൽ ഒടിഞ്ഞു. സംഭവത്തിൽ സ്കൂട്ടർ യാത്രക്കാരായ മറവൻതുരുത്ത് സ്വദേശികളായ ഫിറോസ് (19), ആദിത്യനാഥ് (21) എന്നിവർക്കെതിരെ വൈക്കം പോലീസ് കേസെടുത്തു.:

ഇന്നലെ രാവിലെ പത്ത് മണിയോടെ മറവൻതുരുത്ത് പഞ്ചായത്ത് ജംക്‌ഷനിലായിരുന്നു നാടിനെ നടുക്കിയ അക്രമം നടന്നത്. പാലാംകടവ് ഭാഗത്തുനിന്നും ഓട്ടോ സ്റ്റാൻഡിലേക്ക് പ്രവേശിക്കാനായി അരുൺ വാഹനം തിരിക്കുന്നതിനിടെ പിന്നാലെയെത്തിയ യുവാക്കൾ സ്കൂട്ടർ തടഞ്ഞുനിർത്തുകയായിരുന്നു. ഇൻഡിക്കേറ്റർ ഇടാതെയാണ് ഓട്ടോ തിരിച്ചതെന്ന് ആരോപിച്ചായിരുന്നു തർക്കം തുടങ്ങിയത്.

​വാക്കുതർക്കം രൂക്ഷമായതോടെ യുവാക്കൾ അരുണിനെ വാഹനത്തിൽ നിന്നും വലിച്ചിറക്കി മർദിക്കുകയായിരുന്നു. കൈവശമുണ്ടായിരുന്ന ഹെൽമെറ്റ് ഉപയോഗിച്ച് അരുണിന്റെ കാലിന് ക്രൂരമായി തല്ലി. അക്രമത്തിൽ അരുണിന്റെ വലതുകാലിന്റെ എല്ല് പൊട്ടി. നിലവിളി കേട്ടെത്തിയ നാട്ടുകാരാണ് അരുണിനെ ആശുപത്രിയിലെത്തിച്ചത്.

ഗുരുതരമായി പരിക്കേറ്റ അരുൺ നിലവിൽ മുട്ടുചിറയിലെ സ്വകാര്യ ആശുപത്രിയിൽ ചികിത്സയിലാണ്. കാലിന് ശസ്ത്രക്രിയ ആവശ്യമാണെന്ന് ആശുപത്രി അധികൃതർ അറിയിച്ചു. അക്രമത്തിന് ശേഷം സ്ഥലത്തുനിന്നും രക്ഷപ്പെട്ട യുവാക്കൾക്കായി പോലീസ് അന്വേഷണം ഊർജിതമാക്കിയിട്ടുണ്ട്. പ്രദേശത്തെ സി.സി.ടി.വി ദൃശ്യങ്ങൾ പോലീസ് പരിശോധിച്ചുവരികയാണ്. ഗതാഗത തർക്കങ്ങളെത്തുടർന്ന് റോഡുകളിൽ വർധിച്ചുവരുന്ന ഇത്തരം അക്രമ സംഭവങ്ങളിൽ നാട്ടുകാർ പ്രതിഷേധം രേഖപ്പെടുത്തി.