മൃതദേഹങ്ങളിൽ നിന്ന് സ്വർണം കവർന്ന 'രക്ഷാപ്രവർത്തകൻ' പിടിയിൽ;

 

കൊല്ലൂർ: മൂകാംബിക ദർശനത്തിനെത്തിയ മലയാളി തീർത്ഥാടക സംഘം സഞ്ചരിച്ച വാഹനം അപകടത്തിൽപ്പെട്ട് മരിച്ച സ്ത്രീകളുടെ മൃതദേഹത്തിൽ നിന്ന് സ്വർണാഭരണങ്ങൾ കവർന്ന പ്രതിയെ കൊല്ലൂർ പോലീസ് അറസ്റ്റ് ചെയ്തു. കൊല്ലൂർ കല്യാണിഗുസ്സെ സ്വദേശി ഹേമന്ത് (40) ആണ് പോലീസിന്റെ പിടിയിലായത്.

​കഴിഞ്ഞ മെയ് 17 ന് കൊല്ലൂരിനടുത്ത് ദളിയിൽ വെച്ചായിരുന്നു കോട്ടയം പാലാ സ്വദേശികൾ സഞ്ചരിച്ച ജീപ്പും മീൻ ലോറിയും കൂട്ടിയിടിച്ച് വൻ അപകടമുണ്ടായത്. അപകടത്തിൽ രണ്ട് മലയാളി സ്ത്രീകൾ സംഭവസ്ഥലത്തുതന്നെ മരണപ്പെട്ടിരുന്നു. അപകടം നടന്ന ഉടനെ പ്രദേശവാസികൾക്കൊപ്പം രക്ഷാപ്രവർത്തകനെന്ന വ്യാജേന സംഭവസ്ഥലത്ത് സജീവമായി നിന്നയാളാണ് പ്രതിയായ ഹേമന്ത്. രക്ഷാപ്രവർത്തനത്തിന്റെ മറവിൽ ഇയാൾ അതീവ രഹസ്യമായി മരിച്ച സ്ത്രീകളുടെ ശരീരത്തിലുണ്ടായിരുന്ന വിലകൂടിയ ആഭരണങ്ങൾ കൈക്കലാക്കുകയായിരുന്നു.

​പിന്നീട് ആശുപത്രിയിൽ വെച്ച് ഇൻക്വസ്റ്റ് നടപടികൾ പുരോഗമിക്കവേയാണ് മരിച്ച സ്ത്രീകളുടെ ശരീരത്തിൽ ഉണ്ടായിരിക്കേണ്ട ആഭരണങ്ങൾ കാണാനില്ലെന്ന വിവരം ബന്ധുക്കൾ ശ്രദ്ധിക്കുന്നത്. തുടർന്ന്, ഉഡുപ്പി കേരളസമാജം വൈസ് പ്രസിഡന്റ് ശ്രീകുമാർ ഉടൻ തന്നെ കൊല്ലൂർ പോലീസിൽ ഔദ്യോഗികമായി പരാതി നൽകി.

​മലയാളി തീർത്ഥാടകരുടെ മൃതദേഹത്തിൽ നിന്ന് മോഷണം നടന്നത് അതീവ ഗൗരവത്തോടെയാണ് പോലീസ് കണ്ടത്. തുടർന്ന് പ്രത്യേക അന്വേഷണസംഘം രൂപീകരിച്ച്, അപകടസമയത്ത് അവിടെയുണ്ടായിരുന്ന ആളുകളുടെ വിവരങ്ങളും പ്രദേശത്തെ CCTV ദൃശ്യങ്ങളും പോലീസ് വിശദമായി പരിശോധിച്ചു. കൂടാതെ സംഭവസ്ഥലത്തുണ്ടായിരുന്ന മാധ്യമപ്രവർത്തകരും നാട്ടുകാരും പകർത്തിയ ചിത്രങ്ങളും പോലീസ് നിരീക്ഷണത്തിന് വിധേയമാക്കി. ഇതിൽ നിന്നാണ് ഹേമന്തിന്റെ സംശയാസ്പദമായ പെരുമാറ്റം പോലീസിന്റെ ശ്രദ്ധയിൽപ്പെടുന്നത്.

​തുടർന്ന് ഇയാളെ കസ്റ്റഡിയിലെടുത്ത് വിശദമായി ചോദ്യം ചെയ്തതോടെ പ്രതി കുറ്റം സമ്മതിക്കുകയായിരുന്നു. പ്രതിയുടെ പക്കൽ നിന്നും രണ്ട് ലക്ഷത്തിലധികം രൂപ വിപണി വിലവരുന്ന സ്വർണമാലയും മോതിരവും പോലീസ് കണ്ടെടുത്തു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. അപകടത്തിൽപ്പെട്ട് ജീവൻ വെടിഞ്ഞ തീർത്ഥാടകരുടെ മൃതദേഹത്തോട് കാട്ടിയ ഈ ക്രൂരത പ്രാദേശിക ജനങ്ങൾക്കിടയിലും കടുത്ത പ്രതിഷേധത്തിന് കാരണമായിട്ടുണ്ട്.