മാധ്യമപ്രവർത്തകയ്ക്ക് നേരെ സ്വകാര്യ ബസിൽ കയ്യേറ്റശ്രമവും അസഭ്യവർഷവും; പേരാമ്പ്ര പൊലീസിൽ പരാതി നൽകിയിട്ടും നടപടിയില്ലെന്ന് ആക്ഷേപം

 

പേരാമ്പ്ര: കുറ്റ്യാടി-കോഴിക്കോട് റൂട്ടിലോടുന്ന സ്വകാര്യ ബസിൽ വെച്ച് ഓൺലൈൻ മാധ്യമപ്രവർത്തകയ്ക്ക് നേരെ കയ്യേറ്റശ്രമവും അസഭ്യവർഷവും ഉണ്ടായതായി പരാതി. സംഭവവുമായി ബന്ധപ്പെട്ട് മാധ്യമപ്രവർത്തക പേരാമ്പ്ര പൊലീസിൽ പരാതി നൽകി. മെയ് 23-ന് രാത്രി 7:50-ഓടെയായിരുന്നു യാത്രക്കാരുടെ മുന്നിൽ വെച്ച് അതിക്രമം അരങ്ങേറിയത്.

​   കുറ്റ്യാടിയിൽ നിന്നും കോഴിക്കോട്ടേക്ക് പോവുകയായിരുന്ന സ്വകാര്യ ബസിലായിരുന്നു സംഭവം. ബസിലെ സ്ത്രീകൾ ഇരിക്കുന്ന സീറ്റിന് സമീപമെത്തിയ, ഇതേ റൂട്ടിൽ സർവീസ് നടത്തുന്ന മറ്റൊരു ബസിലെ ജീവനക്കാർ (കണ്ടക്ടർമാർ) തന്നെ പരസ്യമായി കേട്ടാലറയ്ക്കുന്ന രീതിയിൽ അസഭ്യം പറയുകയും കൈയേറ്റം ചെയ്യാൻ ശ്രമിക്കുകയുമായിരുന്നുവെന്ന് മാധ്യമപ്രവർത്തക പരാതിയിൽ വ്യക്തമാക്കുന്നു.

​പകപോക്കലെന്ന് പരാതിക്കാരി

​ഏകദേശം ഒരു വർഷം മുമ്പ് ഇതേ റൂട്ടിലോടുന്ന ബസിലെ ഡ്രൈവർമാർ വണ്ടി റോഡിന് നടുവിൽ നിർത്തി പരസ്പരം മാറി ഇരുന്നിരുന്നു. യാത്രക്കാരുടെ സുരക്ഷയെ ബാധിക്കുന്ന ഈ ദൃശ്യം മാധ്യമപ്രവർത്തക മൊബൈൽ ഫോണിൽ പകർത്താൻ ശ്രമിച്ചതാണ് നിലവിലെ അതിക്രമത്തിന് കാരണമായി പറയുന്നത്. അന്ന് ബസ് ജീവനക്കാർ ഫോൺ ബലമായി പിടിച്ചുവാങ്ങി ദൃശ്യങ്ങൾ മായ്പ്പിച്ചു കളയുകയും, തുടർന്ന് കുറച്ചുകാലം ഇവരെ ബസിൽ കയറ്റാതെ വിലക്കുകയും ചെയ്തിരുന്നു.

​സംഭവത്തിന് ശേഷം ഏറെ നാളുകൾക്ക് കൂടിയാണ് കഴിഞ്ഞ ദിവസം പ്രതികൾ മാധ്യമപ്രവർത്തകയെ വീണ്ടും കാണുന്നത്. പഴയ സംഭവത്തിന്റെ വൈരാഗ്യം വെച്ചാണ് ഇവർ ബസിനുള്ളിൽ വെച്ച് ഭീകരാന്തരീക്ഷം സൃഷ്ടിച്ചതും ആക്രമിക്കാൻ മുതിർന്നതും. "പറ്റുകയാണെങ്കിൽ ഇതും കൂടി ഫോണിൽ പകർത്തി ലൈവ് ഇട്ടോളൂ" എന്ന് പ്രതികൾ വെല്ലുവിളിച്ചതായും പരാതിയിലുണ്ട്.

​പൊലീസ് നടപടി വൈകുന്നതായി ആക്ഷേപം

​അതിക്രമം നടന്ന മെയ് 23-ന് തന്നെ പേരാമ്പ്ര പൊലീസിൽ രേഖാമൂലം പരാതി നൽകിയിട്ടും രണ്ട് ദിവസം പിന്നിട്ടിട്ടും പൊലീസിന്റെ ഭാഗത്തുനിന്നും യാതൊരുവിധ നടപടിയും ഉണ്ടായിട്ടില്ലെന്ന് മാധ്യമപ്രവർത്തക ആരോപിക്കുന്നു. യാത്രക്കാരായ സ്ത്രീകളുടെ സുരക്ഷയ്ക്ക് ഭീഷണിയുയർത്തുന്ന ഇത്തരം സംഭവങ്ങളിൽ പൊലീസ് അടിയന്തരമായി ഇടപെടണമെന്നും പ്രതികളായ ബസ് ജീവനക്കാരെ ഉടൻ നിയമത്തിന് മുന്നിൽ കൊണ്ടുവരണമെന്നുമാണ് നാട്ടുകാരുടെയും യാത്രക്കാരുടെയും ആവശ്യം.