തെരുവുനായ്ക്കൾ 'ബന്ദികളാക്കിയ' കുടുംബം: തിക്കോടിയിൽ അമ്മയും മകളും ഭീതിയിൽ;

 

തിക്കോടി: തെരുവുനായ്ക്കളുടെ ശല്യം രൂക്ഷമായതോടെ വീട്ടിൽ നിന്നുപോലും പുറത്തിറങ്ങാനാവാതെ ഒരു കുടുംബം പൂർണ്ണമായും 'ബന്ദിയാക്കപ്പെട്ട' അവസ്ഥയിൽ. തിക്കോടി കണ്ടമ്പാത്തി പാലത്തിനടുത്തുള്ള കാരോളി വീട്ടിൽ ഗഫൂറിന്റെ ഭാര്യ ജസീലയും മകളുമാണ് ഒരു മാസത്തോളമായി തെരുവുനായ്ക്കളുടെ ഭീഷണിയെത്തുടർന്ന് സ്വന്തം വീട്ടുതടങ്കലിലായത്. കഴിഞ്ഞ ഏതാനും ദിവസങ്ങളായി ഈ പ്രദേശത്തെ നായകൾ കടുത്ത അക്രമസ്വഭാവം കാണിക്കാൻ തുടങ്ങിയതോടെ എപ്പോൾ വേണമെങ്കിലും ആക്രമിക്കപ്പെടാം എന്ന ഭീതിയിലാണ് ഇവർ കഴിയുന്നത്.

​പടക്കം പൊട്ടിച്ചും തുരത്താനാവാതെ നായക്കൂട്ടം

    ​വീടിന്റെ മുറ്റത്തോ പരിസരത്തോ ഇറങ്ങിയാൽ പന്ത്രണ്ടോളം വരുന്ന തെരുവുനായ്ക്കളുടെ കൂട്ടമാണ് ഒന്നിച്ച് കുരച്ചുചാടുന്നത്. കഴിഞ്ഞ നാലഞ്ചു ദിവസമായി പടക്കം പൊട്ടിച്ചാണ് വീട്ടുകാർ ഇവയെ താൽക്കാലികമായെങ്കിലും ഒന്നു തുരത്തുന്നത്. എന്നാൽ പടക്കം പൊട്ടുമ്പോഴുള്ള ഭയത്താൽ അല്പസമയത്തേക്ക് മാറുന്ന നായകൾ, മിനിറ്റുകൾക്കകം വീണ്ടും കൂട്ടത്തോടെ വന്ന് വീട്ടുമുറ്റത്ത് തമ്പടിക്കുകയാണ്. ഒരു മാസമായി ഈ ഭാഗത്ത് നായ ശല്യമുണ്ടെങ്കിലും കഴിഞ്ഞ ഒരാഴ്ചയായി ഇവ കടുത്ത അക്രമകാരികളായി മാറിയെന്ന് ജസീല പറയുന്നു.

​ഒറ്റപ്പെട്ട അവസ്ഥ; അത്യാവശ്യ കാര്യങ്ങൾക്കും തടസ്സം

​ജസീലയുടെ ഭർത്താവ് വിദേശത്താണ്. സഹോദരനും സഹോദരിയുമൊന്നും ഇപ്പോൾ സ്ഥലത്തില്ലാത്തതിനാൽ ജസീലയും മകളും മാത്രമാണ് ഈ വീട്ടിൽ താമസിക്കുന്നത്. വീട്ടിലേക്ക് ആവശ്യമായ സാധനങ്ങൾ വാങ്ങാനോ മറ്റെന്തെങ്കിലും അത്യാവശ്യ കാര്യങ്ങൾക്കോ പുറത്തുപോയാൽ, തിരികെ വീട്ടിൽ കയറണമെങ്കിൽ അയൽക്കാരോ മറ്റാരെങ്കിലുമോ വന്ന് ഈ നായകളെ ഓടിച്ചുകൊടുക്കേണ്ട അവസ്ഥയാണ്.

​പുറത്തുകൂടിയ വസ്ത്രങ്ങൾ അലക്കി ഉണക്കാൻ പോലും നായകൾ സമ്മതിക്കുന്നില്ല. രാവിലെ കുറച്ചു സമയം മാത്രമാണ് നായക്കൂട്ടം ഇവിടെ നിന്നും മാറിനിൽക്കുന്നത്. ഈ ചുരുങ്ങിയ സമയത്തിനുള്ളിലാണ് വീട്ടുകാർ അത്യാവശ്യം പുറത്തിറങ്ങി കാര്യങ്ങൾ നിർവ്വഹിക്കുന്നത്. ബാക്കി സമയങ്ങളിലെല്ലാം മറ്റ് എങ്ങോട്ടും പോകാതെ ഈ വീടിന് മുന്നിൽത്തന്നെയാണ് നായകൾ കിടറപ്പുറ ഉറപ്പിച്ചിരിക്കുന്നത്.

​നാട്ടുകാരും ഭീതിയിൽ; സുപ്രീംകോടതി വിധിയിൽ പ്രതീക്ഷ

​കഴിഞ്ഞ ദിവസം ഈ വീടിന് സമീപത്തുള്ള മറ്റ് ചില ആളുകളെയും നായക്കൂട്ടം ആക്രമിക്കാൻ ശ്രമിച്ചിരുന്നു. ഇതോടെ പ്രദേശവാസികളും കടുത്ത ഭീതിയിലാണ്. അടിയന്തരമായി അധികൃതർ ഇടപെട്ട് ഈ നായകളുടെ ശല്യത്തിന് ശാശ്വത പരിഹാരം കാണണമെന്നും, തങ്ങളുടെ ജീവനും സ്വത്തിനും സുരക്ഷിതത്വം ഉറപ്പാക്കണമെന്നുമാണ് വീട്ടുകാരുടെയും പ്രദേശവാസികളുടെയും ശക്തമായ ആവശ്യം. തെരുവുനായ്ക്കളുടെ ശല്യവുമായി ബന്ധപ്പെട്ട് കഴിഞ്ഞ ദിവസം വന്ന സുപ്രീംകോടതി വിധി അനുകൂലമായി നടപ്പിലാകുന്നത് കാത്തിരിക്കുകയാണ് ദുരിതത്തിലായ ഈ കുടുംബവും നാട്ടുകാരും.