വീട്ടിൽ നിന്ന് സ്വർണ്ണവുമായി മുങ്ങിയ യുവതിയും സുഹൃത്തും കന്യാകുമാരിയിൽ പിടിയിൽ; വലയിലായത് തട്ടിപ്പ് വീരൻ
ഒറ്റപ്പാലം: സ്വന്തം വീട്ടിൽ നിന്ന് സ്വർണ്ണാഭരണങ്ങൾ കവർന്ന് ആൺസുഹൃത്തിനൊപ്പം ഒളിച്ചോടിയ യുവതിയെയും യുവാവിനെയും പോലീസ് പിടികൂടി. മണ്ണപ്പാടം സ്വദേശിനി ശ്രുതി (26), കിഴക്കഞ്ചേരി സ്വദേശി ലിന്റോ കുര്യാക്കോസ് (28) എന്നിവരാണ് കന്യാകുമാരിയിൽ വെച്ച് ഒറ്റപ്പാലം പോലീസിന്റെ പിടിയിലായത്.
വിവാഹിതയും രണ്ട് കുട്ടികളുടെ അമ്മയുമായ ശ്രുതിയെ കഴിഞ്ഞ ദിവസമാണ് വീട്ടിൽ നിന്ന് കാണാതായത്. വീട്ടുകാർ നടത്തിയ പരിശോധനയിൽ അലമാരയിൽ സൂക്ഷിച്ചിരുന്ന സ്വർണ്ണാഭരണങ്ങളും നഷ്ടപ്പെട്ടതായി കണ്ടെത്തി. തുടർന്ന് ശ്രുതിയുടെ അമ്മ ഒറ്റപ്പാലം പോലീസിൽ പരാതി നൽകുകയായിരുന്നു. സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് ഇരുവരും കന്യാകുമാരിയിലുണ്ടെന്ന് കണ്ടെത്തിയത്. തുടർന്ന് പോലീസ് സംഘം അവിടെയെത്തി പ്രതികളെ കസ്റ്റഡിയിലെടുക്കുകയായിരുന്നു.
ശ്രുതിക്കൊപ്പം പിടിയിലായ ലിന്റോ കുര്യാക്കോസ് മുൻപും സമാനമായ നിരവധി കേസുകളിൽ പ്രതിയാണെന്ന് പോലീസ് വെളിപ്പെടുത്തി. വിവാഹ വാഗ്ദാനം നൽകി സ്ത്രീകളെ വഞ്ചിക്കുന്നതാണ് ഇയാളുടെ രീതി. വിവിധ സ്റ്റേഷനുകളിൽ ഇയാൾക്കെതിരെ വഞ്ചനാക്കുറ്റത്തിന് കേസുകളുണ്ട്. സ്ത്രീകളുമായി സൗഹൃദം സ്ഥാപിക്കുകയും തുടർന്ന് വിവാഹ വാഗ്ദാനം നൽകി അവരെ വീടുവിടാൻ പ്രേരിപ്പിക്കുകയും ചെയ്യുന്നതാണ് ഇയാളുടെ പതിവ് ശൈലി.
വീട്ടിൽ നിന്ന് മോഷ്ടിച്ച സ്വർണ്ണം ലിന്റോയുടെ സഹായത്തോടെ വിൽക്കാൻ ശ്രമിക്കുന്നതിനിടെയാണ് ഇവർ പിടിയിലായതെന്നാണ് സൂചന. കന്യാകുമാരിയിൽ നിന്ന് ഒറ്റപ്പാലത്ത് എത്തിച്ച പ്രതികളെ കോടതിയിൽ ഹാജരാക്കി റിമാൻഡ് ചെയ്തു. സംഭവത്തിൽ കൂടുതൽ അന്വേഷണം നടന്നുവരികയാണെന്ന് പോലീസ് അറിയിച്ചു.
Comments
Post a Comment