ആറാം പിറന്നാളിന്റെ പിറ്റേന്ന് മരണം; ടെറസിലെ തൂൺ ഇടിഞ്ഞുവീണു അപകടം

 

നിലമ്പൂർ: ആറാം പിറന്നാളിന്റെ ആഘോഷപ്പൊലിമ അടങ്ങും മുൻപേ പ്രിയപ്പെട്ടവരെയെല്ലാം കണ്ണീരിലാഴ്ത്തി കുഞ്ഞ് സിഫ്രാൻ മടങ്ങി. കളിച്ചുകൊണ്ടിരുന്ന ടെറസിലെ തൂൺ ഇടിഞ്ഞുവീണുണ്ടായ അപകടത്തിൽ രാമംകുത്ത് പാറേങ്ങൽ മൊയ്തുവിന്റെ മകൻ സിഫ്രാൻ (6) ആണ് മരിച്ചത്.

​

ശനിയാഴ്ച വൈകുന്നേരത്തോടെ ബന്ധുവീട്ടിലായിരുന്നു അപകടം. വീടിന്റെ ടെറസിൽ മറ്റ് കുട്ടികൾക്കൊപ്പം കളിക്കുകയായിരുന്നു സിഫ്രാൻ. ടെറസിൽ തുണി ഉണക്കുന്നതിനായി കെട്ടിയിരുന്ന, നിർമ്മാണം പൂർത്തിയാകാത്ത തൂണിലെ വെട്ടുകല്ലുകൾ പെട്ടെന്ന് ഇടിഞ്ഞ് കുട്ടിയുടെ തലയിലേക്ക് വീഴുകയായിരുന്നു. വലിയ ശബ്ദം കേട്ട് ഓടിയെത്തിയ ബന്ധുക്കളും നാട്ടുകാരും ചേർന്ന് ഉടൻ തന്നെ കുട്ടിയെ നിലമ്പൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

 

കഴിഞ്ഞ വെള്ളിയാഴ്ചയായിരുന്നു സിഫ്രാന്റെ ആറാം ജന്മദിനം. വീട്ടുകാരും കൂട്ടുകാരും ചേർന്ന് ഏറെ സന്തോഷത്തോടെയാണ് സിഫ്രാന്റെ പിറന്നാൾ ആഘോഷിച്ചത്. ആ മധുരവും ചിരിയും മായും മുൻപേയാണ് തൊട്ടടുത്ത ദിവസം തന്നെ മരണം കുട്ടിയെ തട്ടിയെടുത്തത്. വിശ്വസിക്കാനാകാത്ത ഈ ദുരന്തത്തിന്റെ ആഘാതത്തിലാണ് ബന്ധുക്കളും രാമംകുത്ത് ഗ്രാമവും.

​

ഗൾഫിൽ ജോലി ചെയ്യുന്ന മൊയ്തുവിന്റെയും ഷൈഹയുടെയും മകനാണ് സിഫ്രാൻ. സഹോദരങ്ങൾ: റാഷിൻ, റഷ ഫാത്തിമ, സായാൻ. നടപടിക്രമങ്ങൾക്ക് ശേഷം മൃതദേഹം ഖബറടക്കി. വായനക്കാരെയും നാട്ടുകാരെയും ഒരുപോലെ നോവിച്ചാണ് ആ കുഞ്ഞു മിടുക്കന്റെ വിയോഗം മാധ്യമങ്ങളിൽ വാർത്തയാകുന്നത്.