ഓട്ടോഡ്രൈവറെ സദാചാര പോലീസ് ചമഞ്ഞ് മർദിച്ച സംഭവം: രണ്ടുപേർ പെരുവണ്ണാമൂഴി പൊലീസിന്റെ പിടിയിൽ

 

​പെരുവണ്ണാമൂഴി: ചക്കിട്ടപാറ പഞ്ചായത്തിലെ മുതുകാട് ചെങ്കോട്ടക്കൊല്ലിയിൽ ഓട്ടോറിക്ഷ ഡ്രൈവറെ സദാചാര പോലീസ് ചമഞ്ഞ് ക്രൂരമായി മർദിച്ച കേസിൽ രണ്ടുപേരെ പെരുവണ്ണാമൂഴി പോലീസ് അറസ്റ്റ് ചെയ്തു. മുതുകാട് മഞ്ഞോറമലയിൽ അശ്വിൻ (29), മാവിലാംപൊയിൽ വിഷ്ണുപ്രസാദ് (28) എന്നിവരാണ് പിടിയിലായത്.

​മുതുകാട് അങ്ങാടിയിലെ ഓട്ടോ ഡ്രൈവറായ വണ്ണാറത്ത് രാജീവന് (48) നേരെയാണ് കഴിഞ്ഞ വെള്ളിയാഴ്ച രാത്രിയോടെ ഗുണ്ടാ ആക്രമണമുണ്ടായത്. പരിക്കേറ്റ രാജീവൻ ആശുപത്രിയിൽ ചികിത്സയിലാണ്.

​സംഭവത്തെക്കുറിച്ച് പോലീസ് പറയുന്നത്:

​വെള്ളിയാഴ്ച രാത്രി മുതുകാട് അങ്ങാടിയിൽ നിന്നും ഓട്ടം പോയതായിരുന്നു രാജീവൻ. യാത്രക്കാരിയായ സ്ത്രീയെ അവരുടെ വീട്ടിൽ ഇറക്കി തിരിച്ചു വരുന്നതിനിടെ, ചെങ്കോട്ടക്കൊല്ലിയിൽ വെച്ച് പ്രതികളായ അശ്വിനും വിഷ്ണുപ്രസാദും ചേർന്ന് ഓട്ടോറിക്ഷ തടഞ്ഞുനിർത്തുകയായിരുന്നു.

​തുടർന്ന്, രാത്രി സമയത്ത് സ്ത്രീയെ വീട്ടിലാക്കാൻ വന്നത് ചോദ്യം ചെയ്യുകയും സദാചാര പോലീസ് ചമഞ്ഞ് രാജീവനെ വണ്ടിയിൽ നിന്നും വലിച്ചിറക്കി ക്രൂരമായി മർദിക്കുകയുമായിരുന്നു. നാട്ടിൽ ഗുണ്ടാഭീതി പരത്തുന്ന രീതിയിലായിരുന്നു പ്രതികളുടെ അക്രമണമെന്ന് നാട്ടുകാർ പറയുന്നു.

​"രാത്രി സമയത്ത് ഓട്ടം പോയതിന്റെ പേരിൽ സദാചാര പോലീസ് ചമഞ്ഞ് മർദിച്ചെന്നാണ് ഡ്രൈവറുടെ പരാതി. പ്രതികൾക്കെതിരെ ശക്തമായ വകുപ്പുകൾ ചുമത്തിയാണ് കേസെടുത്തിരിക്കുന്നത്." പോലീസ് പറഞ്ഞു

​പ്രതികൾ റിമാൻഡിൽ

​സംഭവത്തിന് ശേഷം ഒളിവിൽ പോകാൻ ശ്രമിച്ച പ്രതികളെ പെരുവണ്ണാമൂഴി സബ് ഇൻസ്പെക്ടറുടെ നേതൃത്വത്തിലുള്ള പോലീസ് സംഘമാണ് അതിവേഗം വലയിലാക്കിയത്. അക്രമത്തിന് പിന്നിൽ മറ്റ് കാരണങ്ങളുണ്ടോ എന്നും പോലീസ് അന്വേഷിച്ചു വരികയാണ്. അറസ്റ്റിലായ പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

​മേഖലയിൽ സദാചാര ഗുണ്ടായിസവും ഡ്രൈവർമാർക്ക് നേരെയുള്ള അക്രമങ്ങളും വെച്ചുപൊറുപ്പിക്കില്ലെന്ന് ഓട്ടോ തൊഴിലാളി യൂണിയനുകളും വ്യക്തമാക്കിയിട്ടുണ്ട്.