ബന്ധുവായ പെൺകുട്ടിയോട് നാല് വർഷം നീണ്ട ക്രൂരത; പ്രതി പോലീസിന്റെ പിടിയിൽ
അഞ്ചൽ: ബന്ധുവായ പതിനാലുകാരിയെ ഭീഷണിപ്പെടുത്തി തുടർച്ചയായി ലൈംഗിക പീഡനത്തിന് ഇരയാക്കിയ അമ്പത്തിരണ്ടുകാരനെ അഞ്ചൽ പോലീസ് അറസ്റ്റ് ചെയ്തു. അഞ്ചൽ താഴമേൽ സ്വദേശി ഷാഹുൽ ഹമീദ് (52) ആണ് പോക്സോ കേസിൽ പോലീസിന്റെ പിടിയിലായത്.
പരിചയക്കാരിയും അടുത്ത ബന്ധുവുമായ പെൺകുട്ടിയെ കഴിഞ്ഞ നാല് വർഷത്തോളമായി പ്രതി ക്രൂരമായ ലൈംഗിക ചൂഷണത്തിന് ഇരയാക്കുകയായിരുന്നുവെന്ന് പോലീസ് പറഞ്ഞു.
പെൺകുട്ടിക്ക് പത്ത് വയസ്സ് മാത്രം പ്രായമുള്ളപ്പോഴാണ് (2022-ൽ) പ്രതി ആദ്യമായി പീഡിപ്പിക്കുന്നത്. പിന്നീട് പലതവണ ഇത് ആവർത്തിച്ചു. പ്രതിയുടെ താഴമേലിലെ സ്വന്തം വീട്ടിൽ വെച്ചും, മറ്റ് പല ബന്ധുവീടുകളിൽ വെച്ചുമായിരുന്നു പെൺകുട്ടിയെ ഇയാൾ ക്രൂരതയ്ക്ക് ഇരയാക്കിയിരുന്നത്. പീഡനവിവരം ആരെങ്കിലും അറിഞ്ഞാൽ അപായപ്പെടുത്തുമെന്നും കൊലപ്പെടുത്തുമെന്നും പ്രതി പെൺകുട്ടിയെ നിരന്തരം ഭീഷണിപ്പെടുത്തിയിരുന്നു. പ്രതിയുടെ ഭയപ്പെടുത്തലിന് മുന്നിൽ പെൺകുട്ടി ഇത്രയും കാലം മാനസികമായി തകർന്ന് വിവരം പുറത്തുപറയാതിരിക്കുകയായിരുന്നു.
കഴിഞ്ഞ ദിവസം പെൺകുട്ടി തന്റെ മാനസിക വിഷമങ്ങളും വർഷങ്ങളായി നേരിട്ട ക്രൂരമായ അതിക്രമങ്ങളും മാതാപിതാക്കളോട് തുറന്നുപറയുകയായിരുന്നു. ഇതുകേട്ട ഞെട്ടിയ കുടുംബം ഒട്ടും വൈകാതെ അഞ്ചൽ പോലീസ് സ്റ്റേഷനിലെത്തി പരാതി നൽകി.
പരാതി ലഭിച്ച ഉടൻ തന്നെ പോലീസ് സംഘം പെൺകുട്ടിയുടെ വിശദമായ മൊഴി രേഖപ്പെടുത്തുകയും പ്രതിക്കെതിരെ കർശനമായ പോക്സോ വകുപ്പുകൾ ചുമത്തി കേസെടുക്കുകയുമായിരുന്നു. തുടർന്ന് ഒളിവിൽ പോകാൻ ശ്രമിച്ച പ്രതി ഷാഹുൽ ഹമീദിനെ അഞ്ചലിൽ വെച്ച് പോലീസ് സംഘം ഇന്നലെ സാഹസികമായി പിടികൂടി. വൈദ്യപരിശോധന ഉൾപ്പെടെയുള്ള നിയമപരമായ നടപടിക്രമങ്ങൾക്ക് ശേഷം കോടതിയിൽ ഹാജരാക്കിയ പ്രതിയെ കോടതി റിമാൻഡ് ചെയ്തു.
Comments
Post a Comment