​സ്റ്റീറിംഗിൽ കൈകൾ, നെഞ്ചിൽ നന്മ; ഈ ഓട്ടോക്കാരൻ മാസ്സല്ല, 'റിയൽ ഹീറോ' ആണ്!

 

മൂവാറ്റുപുഴ: കത്തുന്ന വെയിലിൽ ദാഹിച്ചു വലഞ്ഞവർക്ക് തണലായും, രോഗികൾക്ക് അത്താണിയായും ഒരു മനുഷ്യൻ. മൂവാറ്റുപുഴക്കാർക്ക് ഇദ്ദേഹം വെറുമൊരു ഓട്ടോ ഡ്രൈവർ മാത്രമല്ല, നന്മയുടെ പര്യായമാണ്. വാഴപ്പള്ളി മുണ്ടക്കൽ ഷാജി എന്ന ഈ മനുഷ്യസ്നേഹി കഴിഞ്ഞ 33 വർഷമായി ഓട്ടോ സ്റ്റിറിംഗിനൊപ്പം തന്റെ ജീവിതവും ജനസേവനത്തിനായി തിരിച്ചു വിട്ടിരിക്കുകയാണ്.

​തുടക്കം ഒരു കണ്ണീർ കാഴ്ചയിൽ നിന്ന്

​കഴിഞ്ഞ ദിവസം മൂവാറ്റുപുഴ താലൂക്ക് ആശുപത്രി പരിസരത്ത് വെച്ച് വെള്ളം കിട്ടാതെ ഒരു രോഗി കുഴഞ്ഞു വീണ കാഴ്ചയാണ് ഷാജിയുടെ മനസ്സ് മാറ്റിയത്. "ഇനി ഒരാളും ഇവിടെ ദാഹം കൊണ്ട് വലയരുത്" - ആ ഉറച്ച തീരുമാനത്തിൽ നിന്നാണ് ഷാജിയുടെ 'സംഭാര സേവനം' ആരംഭിക്കുന്നത്.

​രുചിക്കൂട്ടിൽ ചാലിച്ച സ്നേഹം

​വെറും പച്ചവെള്ളമല്ല ഷാജി നൽകുന്നത്. വീട്ടിൽ നിന്നും അതീവ ശുചിത്വത്തോടെ തയ്യാറാക്കുന്ന സ്പെഷ്യൽ സംഭാരം! ഇഞ്ചി, കാന്താരി മുളക്, ചുവന്ന ഉള്ളി, കറിവേപ്പില, പാകത്തിന് ഉപ്പ്,  കുളിർമ ചോരാത്ത മൺകൂജയിൽ തന്റെ ഓട്ടോയിൽ കെട്ടിവെച്ചാണ് വിതരണം.

​എല്ലാ ദിവസവും കൃത്യം 11 മണിക്കും വൈകീട്ട് 3 മണിക്കും ഷാജിയും ഓട്ടോയും താലൂക്ക് ആശുപത്രി പരിസരത്തും ഓട്ടോ സ്റ്റാൻഡിലും എത്തും. പ്രതിദിനം 200-ഓളം പേർക്ക് ഈ ആശ്വാസം ലഭിക്കുന്നു. തികഞ്ഞില്ലെങ്കിൽ വീട്ടിൽ പോയി വീണ്ടും തയ്യാറാക്കി വരാനും ഇദ്ദേഹത്തിന് മടിയൊന്നുമില്ല.

​സ്വന്തം വരുമാനത്തിൽ നിന്ന് ഒരു പങ്ക്

​ഏറ്റവും വിസ്മയിപ്പിക്കുന്ന കാര്യം ഇതിനുള്ള പണം കണ്ടെത്തുന്നത് എവിടെ നിന്നാണ് എന്നുള്ളതാണ്. ഓട്ടോ ഓടിച്ചു കിട്ടുന്ന തുച്ഛമായ വരുമാനത്തിൽ നിന്നാണ് ഷാജി ഈ സൽപ്രവൃത്തിക്കായി പണം മാറ്റിവെക്കുന്നത്. തന്റെ കുടുംബം നോക്കുന്നതിനൊപ്പം തന്നെ മറ്റുള്ളവരുടെ ദാഹം തീർക്കാനും ഷാജി മുൻപന്തിയിലുണ്ട്. എങ്ങനെയുണ്ട് ഇതൊക്കെ സാധിക്കുന്നു എന്ന് ചോദിച്ചാൽ ഒരു ചെറുചിരി മാത്രമാണ് മറുപടി.

​സേവനത്തിന്റെ വേറിട്ട പാതകൾ

​സംഭാരം വിതരണം മാത്രമല്ല ഷാജിയുടെ സേവന മുഖങ്ങൾ.

 കാൻസർ രോഗികൾക്ക് ഷാജിയുടെ ഓട്ടോയിൽ യാത്ര തികച്ചും സൗജന്യമാണ്. ഹർത്താൽ ദിനങ്ങളിൽ വഴിയിൽ കുടുങ്ങിപ്പോകുന്ന യാത്രക്കാർക്ക് ഇദ്ദേഹം തുണയാകുന്നു. അപകടങ്ങളിൽ പെടുന്നവരെ ഒരു രൂപ പോലും വാങ്ങാതെ ആശുപത്രിയിൽ എത്തിക്കാൻ ഷാജി എപ്പോഴും തയ്യാർ.

​മനുഷ്യാവകാശങ്ങൾക്കും വികസനത്തിനുമായി ഒറ്റയാൾ പോരാട്ടം നടത്തുന്ന ഷാജി, നന്മ വറ്റിപ്പോകുന്ന ഈ കാലഘട്ടത്തിൽ നമുക്കേവർക്കും ഒരു മാതൃകയാണ്. സ്നേഹിക്കാൻ മാത്രം അറിയുന്ന, പച്ചയായ ഈ മനുഷ്യനെ മൂവാറ്റുപുഴ നെഞ്ചേറ്റിക്കഴിഞ്ഞു.