മാനസാന്തരപ്പെട്ട് മോഷ്ടാവ്; മാപ്പപേക്ഷയോടെ സ്വർണം തിരികെ നൽകി
ഗുരുവായൂർ: സിനിമയെ വെല്ലുന്ന ട്വിസ്റ്റുകൾക്കൊടുവിൽ, മോഷ്ടിച്ച സ്വർണാഭരണങ്ങളുമായി കള്ളൻ തിരികെ വീട്ടിലെത്തി. ഗുരുവായൂരിലെ പ്രമുഖ ഡോക്ടർ അബൂബക്കറിന്റെ വീട്ടിൽ നിന്നും കവർന്ന പത്ത് പവൻ സ്വർണ്ണാഭരണങ്ങളിൽ എട്ട് പവനാണ് മോഷ്ടാവ് തിരികെ നൽകിയത്. ആഭരണങ്ങൾക്കൊപ്പം ഒരു മാപ്പപേക്ഷയും അടുക്കളഭാഗത്ത് ഉപേക്ഷിച്ച നിലയിൽ കണ്ടെത്തുകയായിരുന്നു.
കഴിഞ്ഞ എട്ടാം തീയതി പുലർച്ചെ നാല് മണിയോടെയായിരുന്നു ഡോക്ടറുടെ വീട്ടിൽ മോഷണം നടന്നത്. വീടിന്റെ മുകളിലത്തെ വാതിൽ വഴി അകത്തുകടന്ന മോഷ്ടാവ് പത്ത് പവനിലധികം വരുന്ന സ്വർണ്ണാഭരണങ്ങളുമായി കടന്നുകളയുകയായിരുന്നു. മോഷ്ടാവിന്റെ ദൃശ്യങ്ങൾ വീട്ടിലെ സിസിടിവി ക്യാമറയിൽ പതിഞ്ഞതോടെ സംഭവം സോഷ്യൽ മീഡിയയിൽ വലിയ വാർത്തയായി. പോലീസ് അന്വേഷണം ഊർജിതമാക്കിയിരുന്നെങ്കിലും പ്രതിയെ കണ്ടെത്താൻ കഴിഞ്ഞിരുന്നില്ല.
തിരികെ എത്തിയ 'കള്ളക്കത്ത്':
കേസ് നടപടികളുമായി പോലീസ് മുന്നോട്ട് പോകുന്നതിനിടയിലാണ് വീട്ടുകാരെ ഞെട്ടിച്ചുകൊണ്ട് കഴിഞ്ഞ ദിവസം പുലർച്ചെ അടുക്കള വശത്ത് ആഭരണങ്ങൾ കണ്ടെത്തിയത്. സ്വർണ്ണത്തോടൊപ്പം വെച്ചിരുന്ന കുറിപ്പിലെ വരികൾ ഇങ്ങനെയായിരുന്നു:
"ഞാൻ ഇവിടെ നിന്നും എടുത്ത 10 പവൻ സ്വർണ്ണത്തിൽ നിന്നും 2 പവൻ എന്റെ ആവശ്യത്തിനായി വിറ്റിട്ടുണ്ട്. ബാക്കി 8 പവൻ ഇവിടെ വെക്കുന്നു. ബുദ്ധിമുട്ട് കൊണ്ടാണ് ഇത് ചെയ്തത്. ദയവ് ചെയ്ത് കേസ് പിൻവലിക്കണം."
മോഷണമുതൽ തിരികെ ലഭിച്ചതിന്റെ ആശ്വാസത്തിലാണ് കുടുംബം. വീട്ടുകാർ ഉടൻ തന്നെ വിവരമറിയിച്ചതിനെ തുടർന്ന് പോലീസും വിരലടയാള വിദഗ്ധരും സ്ഥലത്തെത്തി പരിശോധന നടത്തി. വീണ്ടെടുത്ത ആഭരണങ്ങളും മോഷ്ടാവ് എഴുതിയ കത്തും തെളിവായി കോടതിയിൽ ഹാജരാക്കി.
മാനസാന്തരപ്പെട്ട് സ്വർണ്ണം തിരികെ നൽകിയെങ്കിലും നിയമനടപടികളുമായി മുന്നോട്ട് പോകാനാണ് പോലീസിന്റെ തീരുമാനം. വിറ്റ രണ്ട് പവൻ സ്വർണ്ണം കൂടി തിരിച്ചെത്തുമോ അതോ പഹയൻ പിടിയിലാകുമോ എന്ന ആകാംക്ഷയിലാണ് നാട്ടുകാർ. സിസിടിവി ദൃശ്യങ്ങൾ കേന്ദ്രീകരിച്ച് പ്രതിയെ തിരിച്ചറിയാനുള്ള ശ്രമങ്ങൾ പോലീസ് തുടരുകയാണ്.
Comments
Post a Comment