വ്യാജമെന്ന് പറഞ്ഞ് പോലീസ് എഴുതിത്തള്ളിയ കേസ്; പുതിയ സി.ഐയുടെ ഇടപെടലിൽ വൻ വഴിത്തിരിവ്

 

മാഹി: പതിനഞ്ചുകാരിയെ പ്രണയം നടിച്ച് ചതിയിൽപ്പെടുത്തി നഗ്നചിത്രങ്ങൾ പകർത്തുകയും, അവ കാണിച്ച് ഭീഷണിപ്പെടുത്തി 35 പവനോളം സ്വർണം തട്ടിയെടുക്കുകയും ചെയ്ത കേസിലെ പ്രതിയെ മാഹി പോലീസ് അറസ്റ്റ് ചെയ്തു. തലശ്ശേരി പാലിശ്ശേരി സ്വദേശി പി. ഫഹീം അഹമ്മദ് (25) ആണ് മാഹി സർക്കിൾ ഇൻസ്പെക്ടറുടെ നേതൃത്വത്തിലുള്ള പ്രത്യേക സംഘത്തിന്റെ പിടിയിലായത്.

​നേരത്തെ പോലീസ് അന്വേഷണം നടത്തി വ്യാജമെന്ന് പറഞ്ഞ് എഴുതിത്തള്ളിയ കേസ്, പുതിയ സി.ഐയുടെ കൃത്യമായ ഇടപെടലിലൂടെ പുനരന്വേഷിച്ചപ്പോഴാണ് ഞെട്ടിക്കുന്ന പീഡനത്തിന്റെയും ബ്ലാക്ക്‌മെയിലിംഗിന്റെയും ചുരുളഴിഞ്ഞത്.

​സിനിമയ്ക്ക് കൊണ്ടുപോയി നഗ്നചിത്രങ്ങൾ പകർത്തി; പിന്നാലെ ഭീഷണി

   ​മാഹി ചെമ്പ്ര സ്വദേശിയായ ഒൻപതാം ക്ലാസ് വിദ്യാർത്ഥിനിയെയാണ് പ്രതി പ്രണയക്കുരുക്കിൽപ്പെടുത്തിയത്. കുട്ടിയുമായി സൌഹൃദം സ്ഥാപിച്ച പ്രതി കണ്ണൂരിലെയും കോഴിക്കോട്ടെയും വിവിധ തിയേറ്ററുകളിൽ സിനിമയ്ക്ക് കൊണ്ടുപോയിരുന്നു. ഈ സമയങ്ങളിലാണ് പെൺകുട്ടിയുടെ നഗ്നചിത്രങ്ങളും ദൃശ്യങ്ങളും ഇയാൾ മൊബൈൽ ഫോണിൽ രഹസ്യമായി പകർത്തിയത്.

​പിന്നീട് ഈ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിക്കുമെന്ന് ഭീഷണിപ്പെടുത്തി പെൺകുട്ടിയുടെ വീട്ടിൽ നിന്നും പലപ്പോഴായി 35 പവന ഓളം സ്വർണം ഇയാൾ തട്ടിയെടുക്കുകയായിരുന്നു. പ്രതിയുടെ ക്രൂരമായ ഭീഷണിയെത്തുടർന്ന് ഭയന്നുപോയ പെൺകുട്ടി വിവരം വീട്ടുകാരോട് പറയാതെ ഒളിച്ചുവെക്കുകയായിരുന്നു.

​പരാതിക്കാരനെ പ്രതിയാക്കി പഴയ പോലീസ്; വഴിത്തിരിവായത് സി.ഐയുടെ ഇടപെടൽ

​വീട്ടിൽ നിന്ന് സ്വർണം നഷ്ടപ്പെട്ടത് ശ്രദ്ധയിൽപ്പെട്ട കുട്ടിയുടെ പിതാവ് നേരത്തെ പള്ളൂർ പോലീസ് സ്റ്റേഷനിൽ പരാതി നൽകിയിരുന്നു. എന്നാൽ അന്നത്തെ സ്റ്റേഷൻ ഹൗസ് ഓഫീസർ (എസ്.എച്ച്.ഓ) ഷൺമുഖൻ കേസ് ഗൗരവമായി അന്വേഷിച്ചില്ലെന്ന് മാത്രമല്ല, ഇത് വ്യാജ പരാതിയാണെന്ന് കാണിച്ച് റിപ്പോർട്ട് നൽകി കേസ് എഴുതിത്തള്ളുകയായിരുന്നു. കൂടാതെ, പോലീസിനെ തെറ്റിദ്ധരിപ്പിച്ചു എന്ന് ആരോപിച്ച് പരാതിക്കാരനായ പിതാവിനെതിരെ പോലീസ് കേസെടുക്കുകയും ചെയ്തു.

​എന്നാൽ മാസങ്ങൾക്ക് മുൻപ് മാഹിയിൽ സർക്കിൾ ഇൻസ്പെക്ടറായി ചുമതലയേറ്റ പി.എ. അനിൽകുമാർ സ്റ്റേഷനിലെ പഴയ ഫയലുകൾ പരിശോധിച്ചതോടെയാണ് കേസിൽ നിർണായക വഴിത്തിരിവുണ്ടായത്. പിതാവിനെതിരെ എടുത്ത കേസിൽ സംശയം തോന്നിയ സി.ഐ, ഇദ്ദേഹത്തെ നേരിട്ട് വിളിച്ചുവരുത്തി രഹസ്യമായി വിവരങ്ങൾ ശേഖരിച്ചു. തുടർന്ന് കോടതിയുടെ പ്രത്യേക അനുമതിയോടെ കേസ് പുനരന്വേഷിക്കാൻ തീരുമാനിക്കുകയായിരുന്നു.

​രഹസ്യമൊഴിയിൽ തെളിഞ്ഞ ക്രൂരത; പ്രതിക്കെതിരെ പോക്സോ

​അന്വേഷണസംഘം പെൺകുട്ടിയെ മജിസ്‌ട്രേറ്റിന് മുന്നിൽ ഹാജരാക്കി രഹസ്യമൊഴി (164 പ്രകാരം) രേഖപ്പെടുത്തിയതോടെയാണ് നാടിനെ നടുക്കിയ ബ്ലാക്ക്‌മെയിലിംഗിന്റെ വിവരങ്ങൾ പുറത്തുവന്നത്. പ്രതിയായ ഫഹീം അഹമ്മദിനെതിരെ കൊടുങ്ങല്ലൂർ പോലീസ് സ്റ്റേഷനിലും സമാനമായ രീതിയിൽ പെൺകുട്ടികളെ ചതിയിൽപ്പെടുത്തിയ കേസ് നിലവിലുണ്ടെന്ന് പോലീസ് കണ്ടെത്തിയിട്ടുണ്ട്.

​പ്രായപൂർത്തിയാകാത്ത പെൺകുട്ടിയെ പീഡിപ്പിച്ചതിനും ദൃശ്യങ്ങൾ പകർത്തി ഭീഷണിപ്പെടുത്തിയതിനും പ്രതിക്കെതിരെ പോക്സോ (POCSO) നിയമപ്രകാരമുള്ള കടുത്ത വകുപ്പുകൾ ചുമത്തിയാണ് അറസ്റ്റ് രേഖപ്പെടുത്തിയത്.

​സ്വർണം വീണ്ടെടുത്തു

പെൺകുട്ടിയിൽ നിന്ന് തട്ടിയെടുത്ത സ്വർണം പ്രതി തലശ്ശേരിയിലെ വിവിധ ജ്വല്ലറികളിലും പണയക്കടകളിലുമായി വിറ്റിരിക്കുകയായിരുന്നു. ഇതിൽ 21 പവൻ സ്വർണം മാഹി പോലീസ് കണ്ടെടുത്തു. ബാക്കി സ്വർണം കൂടി കണ്ടെടുക്കുന്നതിനായി പ്രതിയെ കസ്റ്റഡിയിൽ വാങ്ങുമെന്ന് പോലീസ് അറിയിച്ചു. പ്രതിയെ തിങ്കളാഴ്ച പോണ്ടിച്ചേരി പോക്സോ കോടതിയിൽ ഹാജരാക്കും.