റീൽസ് ഭ്രാന്ത്: പിറന്നാൾ ആഘോഷിക്കാൻ റോഡിൽ തീയിട്ട യുവാവ് പിടിയിൽ
മുംബൈ: സോഷ്യൽ മീഡിയയിൽ വൈറലാകാൻ വേണ്ടി സ്വന്തം ജീവനും പൊതുസുരക്ഷയും പണയപ്പെടുത്തുന്ന 'റീൽസ്' ഭ്രാന്ത് വീണ്ടും ചർച്ചയാകുന്നു. തന്റെ മുപ്പത്തിമൂന്നാം പിറന്നാൾ ആഘോഷിക്കാൻ പൊതുനിരത്തിൽ പെട്രോളൊഴിച്ച് തീയിട്ട കാർ ഡീലറെ മുംബൈ പൊലീസ് അറസ്റ്റ് ചെയ്തു. മുംബൈ ഗോരേഗാവ് വെസ്റ്റ് സ്വദേശിയായ മുപ്പത്തിമൂന്നുകാരനാണ് പിടിയിലായത്.
ഗോരേഗാവ് വെസ്റ്റിലെ സൺടെക് സിറ്റി ഫോർത്ത് അവന്യൂവിന് സമീപമുള്ള എം.എം.ആർ.ഡി.എ റോഡിലായിരുന്നു അപകടകരമായ ഈ പ്രകടനം. തന്റെ 33-ാം ജന്മദിനം പ്രമാണിച്ച് റോഡിൽ പെട്രോൾ ഉപയോഗിച്ച് '33' എന്ന ആകൃതിയിൽ എഴുതിയ ശേഷം യുവാവ് അതിന് തീ കൊളുത്തുകയായിരുന്നു. റോഡരികിൽ നിർത്തിയിട്ടിരുന്ന കാറിന് സമീപം നിന്ന് യുവാവ് തീപ്പെട്ടി കൊളുത്തി പെട്രോളിലേക്ക് ഇടുന്ന ദൃശ്യങ്ങൾ സോഷ്യൽ മീഡിയയിൽ പ്രചരിച്ചിരുന്നു.
തീ ആളിപ്പടർന്നതോടെ റോഡിന്റെ പ്രതലത്തിന് നാശനഷ്ടങ്ങൾ സംഭവിച്ചു. തൊട്ടടുത്ത് തന്നെ നിരവധി വാഹനങ്ങൾ പാർക്ക് ചെയ്തിരുന്നെങ്കിലും വൻ ദുരന്തം ഒഴിവായത് ഭാഗ്യം കൊണ്ടുമാത്രമാണ്.
വീഡിയോ ദൃശ്യങ്ങൾ സോഷ്യൽ മീഡിയയിൽ വൈറലായതോടെ യുവാവിനെതിരെ വ്യാപക പ്രതിഷേധം ഉയർന്നു. പൊതുജനങ്ങളുടെ ജീവന് ഭീഷണിയുയർത്തുന്ന രീതിയിൽ പ്രവർത്തിച്ചതിനും പൊതുമുതൽ നശിപ്പിച്ചതിനും യുവാവിനെതിരെ കേസെടുത്ത പൊലീസ് ഇയാളെ ഉടൻ തന്നെ കസ്റ്റഡിയിലെടുത്തു.
റീൽസിനും ലൈക്കുകൾക്കും വേണ്ടി നിയമം കൈയ്യിലെടുക്കുന്നവർക്കെതിരെ കർശന നടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകി. ഇത്തരം പ്രവണതകൾ യുവാക്കൾക്കിടയിൽ വർധിച്ചുവരുന്നത് വലിയ ആശങ്കയുണ്ടാക്കുന്നതാണെന്ന് സാമൂഹിക നിരീക്ഷകർ ചൂണ്ടിക്കാട്ടുന്നു
Comments
Post a Comment