മലയോര ജനതയുടെ ദുരിതത്തിന് പരിഹാരം വേണം: കൂരാച്ചുണ്ടിൽ ജലസേചന വകുപ്പ് ഓഫീസ് അനുവദിക്കണമെന്ന് ആവശ്യം

 

കൂരാച്ചുണ്ട്: മലയോര മേഖലയിലെ കർഷകരുടെയും പൊതുജനങ്ങളുടെയും ദീർഘനാളത്തെ ആവശ്യമായ ജലസേചന വകുപ്പിന്റെ (ഇറിഗേഷൻ) ഓഫീസ് കൂരാച്ചുണ്ട് കേന്ദ്രമാക്കി അടിയന്തരമായി അനുവദിക്കണമെന്ന് കേരള കോൺഗ്രസ് ബാലുശേരി മണ്ഡലം കമ്മിറ്റി സർക്കാരിനോട് ആവശ്യപ്പെട്ടു. മണ്ഡലം കമ്മിറ്റി യോഗത്തിൽ പ്രസിഡന്റ് ജോസ് ചെറുക്കാവിൽ അധ്യക്ഷത വഹിച്ചു.

​പ്രദേശത്തെ കാർഷിക മേഖലയുടെ വികസനത്തിനും കുടിവെള്ള സ്രോതസ്സുകളുടെ സംരക്ഷണത്തിനും ജലസേചന വകുപ്പിന്റെ പ്രാദേശികമായ ഇടപെടൽ അത്യാവശ്യമാണെന്ന് യോഗം ചൂണ്ടിക്കാട്ടി. നിലവിൽ ഈ വകുപ്പുമായി ബന്ധപ്പെട്ട ആവശ്യങ്ങൾക്ക് കിലോമീറ്ററുകൾ സഞ്ചരിക്കേണ്ടി വരുന്നത് മലയോര ജനതയ്ക്ക് വലിയ ബുദ്ധിമുട്ടാണ് സൃഷ്ടിക്കുന്നത്. കൂരാച്ചുണ്ടിൽ പുതിയ ഓഫീസ് പ്രവർത്തനമാരംഭിക്കുന്നത് ഇതിന് ശാശ്വത പരിഹാരമാകുമെന്ന് ഭാരവാഹികൾ അഭിപ്രായപ്പെട്ടു.

മണ്ഡലം കമ്മിറ്റി ഓഫീസിൽ ചേർന്ന യോഗത്തിൽ ബെന്നി പുതിയാപറമ്പിൽ, കൂരാച്ചുണ്ട് മണ്ഡലം പ്രസിഡന്റ് സജി കൂനംതാനം, ടി.എസ്. ഫിലിപ്പ്, പി.ജെ. ജോസ്, കെ.എ. ബേബി, ജോണി മുട്ടത്ത് കുന്നൻ, ജോസഫ് ചെമ്പരത്തി, മാമച്ചൻ, ജെയിംസ് കൂരാപ്പള്ളിൽ, ബിനു കോതമ്പനാനി തുടങ്ങിയ പ്രമുഖ നേതാക്കൾ പങ്കെടുത്തു സംസാരിച്ചു.

​മേഖലയിലെ കാർഷിക പുരോഗതി മുൻനിർത്തി സർക്കാർ ഈ ആവശ്യത്തിൽ അടിയന്തരമായി അനുകൂല തീരുമാനം കൈക്കൊള്ളണമെന്നും അല്ലാത്തപക്ഷം ശക്തമായ ജനകീയ പ്രക്ഷോഭ പരിപാടികൾക്ക് രൂപം നൽകുമെന്നും പാർട്ടി നേതൃത്വം അറിയിച്ചു