പേരാമ്പ്രയെ നടുക്കി ചുഴലിക്കാറ്റ്; തലനാരിഴയ്ക്ക് രക്ഷപ്പെട്ട് ഒരു കുടുംബം.
പേരാമ്പ്ര: പേരാമ്പ്രയിലും പരിസരപ്രദേശങ്ങളിലും ഇന്നലെ ഉച്ചയ്ക്ക് ശേഷം ഉണ്ടായ ശക്തമായ മഴയിലും കാറ്റിലും വ്യാപക നാശനഷ്ടം. മൂന്ന് മണിയോടെ ആരംഭിച്ച ചുഴലിക്കാറ്റിൽ മരങ്ങൾ കടപുഴകി വീണും തെങ്ങുകൾ പൊട്ടിവീണും നിരവധി വീടുകൾ തകർന്നു. പലയിടങ്ങളിലും വാഹനങ്ങൾക്കും വലിയ രീതിയിലുള്ള കേടുപാടുകൾ സംഭവിച്ചു.
വീടുകൾക്ക് മുകളിൽ തെങ്ങ് വീണു
ശക്തമായ കാറ്റിൽ തെങ്ങുകൾ വീണ് പേരാമ്പ്രയിലെ നിരവധി വീടുകൾക്ക് ഭാഗികമായോ പൂർണ്ണമായോ കേടുപാടുകൾ പറ്റിയിട്ടുണ്ട്.കുട്ടമ്പത്ത് രാജൻ (പേരാമ്പ്ര ടൗൺ), വിജയലക്ഷ്മി നമ്പ്യാർ (റോസ് വില്ല), ചെറുവറ്റ ജയകൃഷ്ണൻ (ചേനോളി റോഡ്),മൊട്ടമ്മൽ കുഞ്ഞമ്മദ് (സിൽവർ കോളേജിന് സമീപം) എന്നിവരുടെ വീടുകൾക്ക് മുകളിലേക്കാണ് തെങ്ങുകൾ വീണത്. കെട്ടിടങ്ങളുടെ മേൽക്കൂരകൾ തകരുകയും ഭിത്തികൾക്ക് വിള്ളൽ സംഭവിക്കുകയും ചെയ്തിട്ടുണ്ട്.
അത്ഭുതകരമായ രക്ഷപ്പെടൽ
പൈതോത്ത് റോഡ് ബൈപ്പാസ് ജംഗ്ഷനിൽ ഉണ്ടായ അപകടം നാടിനെ നടുക്കി. റോഡരികിലെ കൂറ്റൻ മരം കടപുഴകി വീണ് രണ്ട് കാറുകളും ഒരു സ്കൂട്ടറും പൂർണ്ണമായും തകർന്നു. മഴ കണ്ട് കാറിനുള്ളിലേക്ക് കയറിയ കുടുംബത്തിന് മുകളിലേക്കാണ് നിമിഷങ്ങൾക്കകം മരം പതിച്ചത്. എന്നാൽ കാറിലുണ്ടായിരുന്നവർ പരിക്കേൽക്കാതെ അത്ഭുതകരമായി രക്ഷപ്പെട്ടു. ഫയർ ഫോഴ്സ് സ്ഥലത്തെത്തി ഏറെ നേരം പരിശ്രമിച്ചാണ് മരം മുറിച്ചുമാറ്റി വാഹനങ്ങൾ പുറത്തെടുത്തത്.
വാഹനങ്ങൾക്ക് നാശനഷ്ടം
ചെമ്പ്ര റോഡിൽ നിർത്തിയിട്ടിരുന്ന D4 ബിൽഡേഴ്സ് ഉടമയും ചെറുവണ്ണൂർ സ്വദേശിയുമായ വാര്യൻ കണ്ടി ഷബീറിൻ്റെ കാറിന് മുകളിലേക്ക് തെങ്ങ് വീണ് വലിയ നാശനഷ്ടമുണ്ടായി. ടൗണിലും പരിസരത്തും നിർത്തിയിട്ടിരുന്ന മറ്റു പല വാഹനങ്ങൾക്കും ചില്ലറ പരിക്കുകൾ പറ്റിയിട്ടുണ്ട്.
ഗതാഗതവും വൈദ്യുതിയും തടസ്സപ്പെട്ടു
മരങ്ങൾ വീണ് റോഡുകൾ തടസ്സപ്പെട്ടതോടെ പലയിടങ്ങളിലും ഗതാഗതം സ്തംഭിച്ചു. വൈദ്യുത ലൈനുകൾക്ക് മുകളിലേക്ക് മരങ്ങൾ വീണതിനെത്തുടർന്ന് മേഖലയിൽ പൂർണ്ണമായും വൈദ്യുതി ബന്ധം വിച്ഛേദിക്കപ്പെട്ടിരിക്കുകയാണ്. ഫയർഫോഴ്സും നാട്ടുകാരും ചേർന്ന് റോഡിലെ തടസ്സങ്ങൾ നീക്കാനുള്ള ശ്രമങ്ങൾ തുടരുകയാണ്. ലക്ഷക്കണക്കിന് രൂപയുടെ കൃഷിനാശവും റിപ്പോർട്ട് ചെയ്തിട്ടുണ്ട്. കൂടുതൽ വിവരങ്ങൾ ലഭ്യമായി വരുന്നതേയുള്ളൂ.
Comments
Post a Comment