വയറ്റിലുള്ളത് വെറും കൊഴുപ്പെന്ന്’ ഡോക്ടർമാരോട് യുവതി; മിനിറ്റുകൾക്കകം ശുചിമുറിയിൽ പ്രസവം, കുഞ്ഞിനെ ജനലിന് പുറത്തേക്ക് എറിഞ്ഞു

 

ഹരിപ്പാട്: ഹരിപ്പാട് താലൂക്ക് ആശുപത്രിയിൽ നാടിനെ നടുക്കിയ ദാരുണ സംഭവം. പ്രസവിച്ച തൊട്ടുപിന്നാലെ പത്തൊൻപത് വയസ്സുള്ള അവിവാഹിതയായ യുവതി നവജാത ശിശുവിനെ ആശുപത്രി ശുചിമുറിയുടെ ജനലിലൂടെ പുറത്തേക്ക് വലിച്ചെറിഞ്ഞു. ഇന്നലെ രാത്രി ഒൻപതരയോടെയാണ് ക്രൂരമായ ഈ സംഭവം അരങ്ങേറിയത്. കടുത്ത രക്തസ്രാവമുണ്ടായിരുന്നെങ്കിലും ജീവന്റെ ലക്ഷണങ്ങൾ അവശേഷിച്ചിരുന്ന പെൺകുഞ്ഞിനെ നഴ്സിങ് ജീവനക്കാരുടെ സമയോചിതമായ ഇടപെടലിലൂടെ രക്ഷപെടുത്തി.

​ഇന്നലെ രാത്രി ഒൻപതരയ്ക്കും പത്തുമണിക്കും ഇടയിലാണ് കടുത്ത വയറുവേദനയും നടുവേദനയുമായി യുവതി പിതാവിനൊപ്പം ഹരിപ്പാട് താലൂക്ക് ആശുപത്രിയിൽ ചികിത്സയ്ക്കായി എത്തിയത്. യുവതിയെ പരിശോധിച്ച ഡ്യൂട്ടി ഡോക്ടർമാർക്ക് ഗർഭത്തിന്റെ ലക്ഷണങ്ങൾ സംശയം തോന്നിയിരുന്നെങ്കിലും യുവതി ഇത് പൂർണ്ണമായി നിഷേധിക്കുകയായിരുന്നു. തന്റെ വയറ്റിലുള്ളത് വെറും കൊഴുപ്പാണെന്നായിരുന്നു യുവതി ഡോക്ടർമാരോട് പറഞ്ഞത്. ആർത്തവത്തെക്കുറിച്ച് ചോദിച്ചപ്പോൾ രണ്ടുമാസം മുൻപ് കൃത്യമായി ഉണ്ടായിരുന്നുവെന്നും ഇവർ മറുപടി നൽകി.

​യുവതിയുടെ അവസ്ഥ കണക്കിലെടുത്ത് കൂടുതൽ വിദഗ്ദ്ധ പരിശോധനകൾക്കും സ്കാനിങ്ങിനുമായി ആലപ്പുഴ വണ്ടാനം മെഡിക്കൽ കോളേജിലേക്ക് റഫർ ചെയ്യാൻ ഡോക്ടർമാർ തീരുമാനിച്ചു. ഇതിനിടയിൽ വേദന കുറയാൻ മരുന്ന് നൽകണമെന്ന് ആവശ്യപ്പെട്ട യുവതി, അസ്വസ്ഥത പ്രകടിപ്പിക്കുകയും ഇടയ്ക്കിടെ ശുചിമുറിയിൽ പോവുകയും ചെയ്യുന്നുണ്ടായിരുന്നു.

​റഫർ ചെയ്യാനുള്ള നടപടികൾ പുരോഗമിക്കുന്നതിനിടെയാണ് ആശുപത്രി കെട്ടിടത്തിന്റെ ജനലിന് പുറകിൽ നിന്ന് കുഞ്ഞിന്റെ കരച്ചിൽ കേൾക്കുന്നത്. ശബ്ദം കേട്ട് ഓടിയെത്തിയ നഴ്സിങ് ജീവനക്കാർ ടോർച്ച് അടിച്ച് നോക്കിയപ്പോഴാണ് ജനലിന് പുറത്ത് താഴെ വീണുകിടക്കുന്ന നിലയിൽ പെൺകുഞ്ഞിനെ കണ്ടെത്തിയത്. യുവതി ശുചിമുറിക്കുള്ളിൽ വെച്ച് പ്രസവിച്ച ശേഷം കുഞ്ഞിനെ ജനലിലൂടെ പുറത്തേക്ക് എറിയുകയായിരുന്നുവെന്ന് ഇതോടെ വ്യക്തമായി. കടുത്ത രക്തസ്രാവമുണ്ടായിരുന്ന കുഞ്ഞിന് ആശുപത്രി അധികൃതർ ഉടൻ തന്നെ അടിയന്തര പ്രാഥമിക ശുശ്രൂഷകൾ നൽകി.

​തന്റെ മകൾ ഗർഭിണിയാണെന്ന വിവരം കൂടെയുണ്ടായിരുന്ന പിതാവിനോ മറ്റ് കുടുംബാംഗങ്ങൾക്കോ അറിവില്ലായിരുന്നു എന്നാണ് വിവരം. നിലവിൽ അമ്മയെയും നവജാത ശിശുവിനെയും കൂടുതൽ വിദഗ്ദ്ധ ചികിത്സയ്ക്കായി ആലപ്പുഴ വണ്ടാനം മെഡിക്കൽ കോളേജ് ആശുപത്രിയിലേക്ക് മാറ്റിയിരിക്കുകയാണ്. ഇരുവരും അവിടെ തീവ്രപരിചരണ വിഭാഗത്തിൽ ചികിത്സയിലാണ്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.