പേരാമ്പ്രയിൽ ബസിനടിയിൽപ്പെട്ട് മധ്യവയസ്കൻ മരിച്ചു

 

പേരാമ്പ്ര: റോഡ് മുറിച്ചുകടക്കുന്നതിനിടെ  സ്വകാര്യ ബസിനടിയിൽപ്പെട്ട് മധ്യവയസ്കൻ മരിച്ചു. പേരാമ്പ്ര മരുതേരി ചീരാമ്പത്ത് ജബ്ബാർ (58) ആണ് മരിച്ചത്. ഞായറാഴ്ച രാവിലെ 11:30-ഓടെ പേരാമ്പ്ര ചെമ്പ്ര റോഡ് ജംഗ്ഷനിലായിരുന്നു നാടിനെ നടുക്കിയ അപകടം നടന്നത്.

ചെമ്പ്ര റോഡ് ജംഗ്ഷനിൽ നിന്ന് നടക്കുകയായിരുന്നു ജബ്ബാർ. ഈ സമയത്ത്, റോഡരികിലൂടെ നടക്കുകയായിരുന്ന അദ്ദേഹം റോഡിലേക്ക് വീഴുകയും തുടർന്ന് പേരാമ്പ്രയിൽ നിന്നും ചക്കിട്ടപാറ ഭാഗത്തേക്ക് പോകുകയായിരുന്ന ബസിനടിയിൽ ഇദ്ദേഹം പെടുകയായിരുന്നു. ബസ്സിൻ്റെ പിൻചക്രം തലയിലൂടെ കയറിയിറങ്ങിയതിനെ തുടർന്ന് സംഭവസ്ഥലത്തുവെച്ചുതന്നെ മരണം സംഭവിച്ചു.  

അപകടം നടന്ന ഉടനെ സ്ഥലത്തുണ്ടായിരുന്ന നാട്ടുകാരും പോലീസും ചേർന്ന് ജബ്ബാറിനെ ആശുപത്രിയിൽ എത്തിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല. തുടർന്ന് മൃതദേഹം ഇൻക്വസ്റ്റ് നടപടികൾക്കായി പേരാമ്പ്ര താലൂക്ക് ആശുപത്രി മോർച്ചറിയിലേക്ക് മാറ്റി. പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും.

​അപകടത്തെ തുടർന്ന് ചെമ്പ്ര റോഡ് ജംഗ്ഷനിൽ അല്പനേരം ഗതാഗതം തടസ്സപ്പെട്ടു. പേരാമ്പ്ര പോലീസ് സ്ഥലത്തെത്തി മേൽനടപടികൾ സ്വീകരിച്ചു. പരേതനായ ചീരാമ്പത്ത് അഹമ്മദിൻ്റെ മകനാണ് ജബ്ബാർ.