പൊരുതി നേടിയ നീതി! പിരിച്ചുവിട്ട കെഎസ്ആർടിസി ഡ്രൈവർ ബിനു സർവീസിലേക്ക്

 

തിരുവനന്തപുരം/ചടയമംഗലം: ഗതാഗതവകുപ്പ് മന്ത്രിയായിരുന്ന കെ.ബി. ഗണേഷ് കുമാറിന്റെ നേരിട്ടുള്ള ഇടപെടലിലൂടെ ജോലിയിൽ നിന്നും അന്യായമായി പിരിച്ചുവിടപ്പെട്ട കെഎസ്ആർടിസി ഡ്രൈവർ ആർ. ബിനുവിന് ഒടുവിൽ നീതി. ചടയമംഗലം ഡിപ്പോയിലെ ഡ്രൈവറായ ബിനുവിനെ സർവീസിൽ പ്രവേശിപ്പിച്ചുകൊണ്ടുള്ള ഉത്തരവ് ഉടൻ പുറത്തിറങ്ങും. യാതൊരുവിധ നിയമപരമായ മാനദണ്ഡങ്ങളും പാലിക്കാതെ പ്രഖ്യാപിച്ച പ്രതികാര നടപടിക്കെതിരെ ബിനു നടത്തിയ ദീർഘമായ നിയമപോരാട്ടമാണ് ഇപ്പോൾ വിജയത്തിലെത്തിയിരിക്കുന്നത്.

​വകുപ്പുതലത്തിൽ ഭരണം മാറുകയും പുതിയ മന്ത്രി ചുമതലയേൽക്കുകയും ചെയ്തതോടെയാണ്, മാസങ്ങളായി ചീഫ് ഓഫീസിൽ ചുവപ്പുനാടയിൽ കുടുങ്ങിക്കിടന്ന ബിനുവിനെ തിരിച്ചെടുക്കാനുള്ള ഫയലിന് അനക്കമുണ്ടായത്. അടുത്ത ദിവസങ്ങളിൽ തന്നെ ബിനുവിന് ചടയമംഗലം ഡിപ്പോയിൽ ജോലിയിൽ പ്രവേശിക്കാൻ സാധിക്കുമെന്നാണ് കോർപ്പറേഷൻ വൃത്തങ്ങൾ നൽകുന്ന സൂചന.

​അപകടത്തിന്റെ പേരിലുള്ള പ്രതികാര നടപടി

​  ചടയമംഗലം നെട്ടേത്തറയിലുണ്ടായ ഒരു വാഹനാപകടത്തെ തുടർന്നാണ് ബിനുവിന്റെ ജീവിതം പ്രതിസന്ധിയിലായത്. അപകടസ്ഥലം സന്ദർശിച്ച അന്നത്തെ ഗതാഗത മന്ത്രി കെ.ബി. ഗണേഷ് കുമാർ, ഉദ്യോഗസ്ഥ മേധാവിത്വത്തെ ഉപയോഗിച്ച് ബിനുവിനെ അടിയന്തിരമായി സർവീസിൽ നിന്ന് പിരിച്ചുവിടാൻ ഉത്തരവിടുകയായിരുന്നു. കൃത്യമായ അന്വേഷണമോ സ്വാഭാവിക നീതിയോ ഉറപ്പാക്കാതെയായിരുന്നു ഈ നടപടി.

​തുടർന്ന് ജീവനക്കാരന്റെ ഭാഗം കേൾക്കാൻ പോലും അധികൃതർ തയ്യാറാകാതിരുന്നതോടെയാണ് ബിനു നീതിതേടി ഹൈക്കോടതിയെ സമീപിച്ചത്.

​ഇരട്ടത്താപ്പ് പൊളിച്ചടുക്കിയ വിവരാവകാശ രേഖകൾ

​കോടതി നടപടികൾക്കിടെ കെഎസ്ആർടിസിയുടെ പ്രകടമായ വിവേചനവും ഇരട്ടത്താപ്പും വിവരാവകാശ രേഖകളിലൂടെ ബിനു പുറത്തുകൊണ്ടുവന്നത് കോർപ്പറേഷനെ പ്രതിരോധത്തിലാക്കിയിരുന്നു. കേരളത്തിലെ മുഴുവൻ ഡിപ്പോകളിലും മുൻപ് നടന്നിട്ടുള്ള സമാനമായ അപകടങ്ങൾ പരിശോധിച്ചപ്പോഴാണ് ഞെട്ടിക്കുന്ന വിവരങ്ങൾ പുറത്തുവന്നത്.

​വലിയ ജീവഹാനി സംഭവിച്ച അപകടങ്ങളിൽ പോലും ഒരു ഡ്രൈവറെയും കെഎസ്ആർടിസി ചരിത്രത്തിൽ ജോലിയിൽ നിന്ന് പിരിച്ചുവിട്ടിരുന്നില്ല.

​ഉദാഹരണത്തിന്, ആറ്റിങ്ങൽ ഡിപ്പോയിലെ ബസ് ഓട്ടോറിക്ഷയിലിടിച്ച് നാല് പേർ മരിച്ച ദാരുണമായ അപകടത്തിൽ പോലും കുറ്റക്കാരനായ ഡ്രൈവർക്ക് ലഭിച്ച ശിക്ഷ വെറും മൂന്ന് മാസത്തെ സസ്പെൻഷനും രണ്ട് ഇൻക്രിമെന്റ് തടയലും മാത്രമായിരുന്നു. ഇയാളെ പിന്നീട് സർവീസിൽ തിരിച്ചെടുക്കുകയും ചെയ്തു.

​മറ്റ് ഡ്രൈവർമാർക്കെതിരെ ഇത്രയും ലഘുവായ നടപടികൾ മാത്രം സ്വീകരിച്ച മാനേജ്‌മെന്റ്, ബിനുവിനോട് മാത്രം ക്രൂരമായ വിവേചനം കാട്ടിയത് രാഷ്ട്രീയ സമ്മർദ്ദത്തിന് വഴങ്ങിയാണെന്ന് ഇതോടെ വ്യക്തമായി.

​കോടതി ഉത്തരവിട്ടിട്ടും ചുവപ്പുനാട; ഒടുവിൽ വഴിത്തിരിവ്

​ബിനുവിനെ സർവീസിൽ തിരിച്ചെടുക്കാൻ ബഹുമാനപ്പെട്ട ഹൈക്കോടതി ഉത്തരവിട്ടിട്ടും മാസങ്ങളോളം അനങ്ങാപ്പാറ നയമാണ് കെഎസ്ആർടിസി ചീഫ് ഓഫീസ് സ്വീകരിച്ചത്. എന്നാൽ സംസ്ഥാനത്ത് ഗതാഗത വകുപ്പിൽ മന്ത്രിസ്ഥാനത്ത് മാറ്റമുണ്ടായതോടെ ഫയലുകൾ വേഗത്തിലാവുകയായിരുന്നു.

​അധികാര കസേരയിലിരുന്ന് സാധാരണക്കാരന്റെ കഞ്ഞിയിൽ മണ്ണുവാരിയിടുന്ന ഭരണാധികാരികൾക്കും, അതിന് കുടപിടിക്കുന്ന ഉദ്യോഗസ്ഥ മേധാവിത്വത്തിനും കനത്ത തിരിച്ചടിയാണ് ബിനുവിന്റെ ഈ നിയമവിജയം. തങ്ങളുടെ സഹപ്രവർത്തകന് നീതി ലഭിച്ച ആശ്വാസത്തിലാണ് ചടയമംഗലം ഡിപ്പോയിലെ ജീവനക്കാർ.