അമ്മയുടെ മൃതദേഹത്തിന് കാവലായി മകൻ; മൂന്ന് ദിവസത്തെ പഴക്കമുള്ള വയോധികയുടെ മൃതദേഹം മുറിക്കുള്ളിൽ കണ്ടെത്തി

 

വിജയപുരം: അടച്ചിട്ട വീടിനുള്ളിൽ വയോധികയുടെ മൃതദേഹം മൂന്ന് ദിവസത്തിലധികം പഴക്കമുള്ള നിലയിൽ കണ്ടെത്തി. വിജയപുരം പഞ്ചായത്ത് 13-ാം വാർഡിൽ മാങ്ങാനം താമരശ്ശേരി പ്രവീണനിവാസിൽ കെ.കെ. ഭാനുമതി (80) ആണ് മരിച്ചത്. അമ്മ മരിച്ചതറിയാതെ മൃതദേഹത്തിന് കാവലിരുന്ന മാനസിക വെല്ലുവിളി നേരിടുന്ന മകൻ പ്രവീണിനെ പോലീസ് ആശുപത്രിയിൽ പ്രവേശിപ്പിച്ചു.

​ദുർഗന്ധം വമിച്ചതോടെ അയൽവാസികൾ ഇടപെട്ടു

ഞായറാഴ്ച വൈകീട്ട് 6.30-ഓടെയാണ് നാടിനെ നടുക്കിയ സംഭവം പുറംലോകമറിഞ്ഞത്. ഭാനുമതിയും മകനും താമസിച്ചിരുന്ന വീടിന് സമീപം അസഹനീയമായ ദുർഗന്ധവും ഈച്ചശല്യവും അനുഭവപ്പെട്ടതോടെ അയൽവാസികൾക്ക് സംശയം തോന്നി. വാർഡ് മെമ്പർ ദീപാ ജീസസിന്റെ നേതൃത്വത്തിൽ നാട്ടുകാർ എത്തി വീട് തുറക്കാൻ ആവശ്യപ്പെട്ടെങ്കിലും, അമ്മയ്ക്ക് സുഖമില്ലാതെ കിടക്കുകയാണെന്ന മറുപടിയാണ് പ്രവീൺ നൽകിയത്. വീട് അകത്തുനിന്ന് പൂട്ടിയ നിലയിലായിരുന്നു.

​വാതിൽ പൊളിച്ച് പോലീസ് അകത്തുകയറി

സംശയമുണർന്ന നാട്ടുകാർ ഉടൻ തന്നെ പോലീസിൽ വിവരമറിയിച്ചു. സ്ഥലത്തെത്തിയ പോലീസ് വീടിന്റെ പിൻവശത്തെ വാതിൽ പൊളിച്ച് അകത്തുകയറിയപ്പോഴാണ് കിടപ്പുമുറിയിലെ കട്ടിലിൽ ഭാനുമതി മരിച്ചുകിടക്കുന്നത് കണ്ടത്. മൃതദേഹത്തിന് ദിവസങ്ങളുടെ പഴക്കമുണ്ടായിരുന്നു. ഈ സമയം പ്രവീൺ അടുത്ത മുറിയിൽ തന്നെ ഉണ്ടായിരുന്നു. മാനസിക വെല്ലുവിളി നേരിടുന്ന പ്രവീണിനെ പോലീസ് പിന്നീട് പരിയാരത്തെ സ്വകാര്യ ആശുപത്രിയിലേക്ക് മാറ്റി.

​ആശ്രയം പെൻഷൻ തുക

മാങ്ങാനം കൊല്ലംപറമ്പിൽ കുടുംബാംഗമായ ഭാനുമതി സർവേ ഡിപ്പാർട്ട്‌മെന്റിലെ മുൻ ജീവനക്കാരിയായിരുന്നു. ജോലിയിൽ നിന്ന് വിരമിച്ച ശേഷം അമ്മയും മകനും മാത്രമായിരുന്നു ഈ വീട്ടിൽ താമസിച്ചിരുന്നത്. ഭാനുമതിക്ക് ലഭിച്ചിരുന്ന പെൻഷൻ തുകയായിരുന്നു ഇവരുടെ ഏക ഉപജീവനമാർഗ്ഗം. മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്‌മോർട്ടത്തിനായി ആശുപത്രിയിലേക്ക് മാറ്റി.