ചുട്ടുപൊള്ളുന്ന ഷാബിയയിലെ തെരുവോരത്ത് ഒരു സിമന്റ് സ്ലാബിൽ മലപ്പുറത്തുകാരന്റെ രണ്ടര മാസം; അബുദാബിയിലെ നഗരവീഥിയിൽ അനാഥനായി ഒരു മലയാളി യുവാവ്.

 

അബുദാബി: ഗൾഫ് സ്വപ്നങ്ങളുടെ വെള്ളിവെളിച്ചം നിറഞ്ഞ നഗരവീഥികൾക്കിടയിൽ, പൊള്ളുന്ന വെയിലിൽ ഒരു മലയാളി യുവാവ് തെരുവോരത്ത് അന്തിയുറങ്ങുന്നത് പ്രവാസലോകത്തിന് നൊമ്പരമാകുന്നു. മലപ്പുറം ചങ്ങരംകുളം സ്വദേശിയായ മുപ്പത്തിനാലുകാരനാണ് കഴിഞ്ഞ രണ്ടര മാസമായി അബുദാബി ഷാബിയ-9ലെ ഒരു സിമന്റ് സ്ലാബിൽ ജീവിതം തള്ളിനീക്കുന്നത്. കത്തുന്ന വേനലിലും അസുഖം തളർത്തിയ ശരീരവുമായി, താങ്ങാനാളില്ലാതെ ഈ യുവാവ് ഇന്ന് കാരുണ്യം കാത്തുനിൽക്കുകയാണ്.

​കഴിഞ്ഞ 14 വർഷമായി യുഎഇയിലുള്ള ഇദ്ദേഹം അബുദാബിയിൽ റസ്റ്ററന്റ് ഡെലിവറി ബോയിയായി ജോലി ചെയ്തു വരികയായിരുന്നു. എന്നാൽ, കാലിനെ ബാധിച്ച 'എക്സിമ'   എന്ന ചർമ്മരോഗം ഇദ്ദേഹത്തിന്റെ ജീവിതം മാറ്റിമറിച്ചു. രോഗം മൂർച്ഛിച്ചതോടെ ഷൂസ് ധരിക്കാൻ കഴിയാതായി. കാലിലെ മുറിവുകൾ കണ്ട ഉപഭോക്താക്കൾ പരാതിപ്പെട്ടതോടെ റസ്റ്ററന്റ് അധികൃതർ ജോലിയിൽ നിന്ന് മാറിനിൽക്കാൻ ആവശ്യപ്പെട്ടു.

   ​വരുമാനം നിലച്ചതോടെ താമസിച്ചിരുന്ന ഫ്ലാറ്റിലെ വാടക നൽകാൻ കഴിയാതെ വന്ന യുവാവ് ഒടുവിൽ തെരുവിലേക്ക് ഇറങ്ങാൻ നിർബന്ധിതനായി. ഷാബിയ-9 ലെ സഫീർ മാളിന് പിന്നിലെ സ്ലാബാണ് കഴിഞ്ഞ കുറെ ദിവസങ്ങളായി ഇദ്ദേഹത്തിന്റെ അഭയസ്ഥാനം. തുറസ്സായ സ്ഥലത്തെ പൊടിപടലങ്ങൾ രോഗം കൂടുതൽ വഷളാക്കിയിരിക്കുകയാണ്. കൃത്യമായ ചികിത്സയും വിശ്രമവും ലഭിച്ചാൽ രണ്ടാഴ്ച കൊണ്ട് ഭേദമാക്കാവുന്ന രോഗമാണിതെന്ന് ഡോക്ടർമാർ നേരത്തെ അറിയിച്ചിരുന്നു.

​വീട്ടിലെ ഏക അത്താണിയായിരുന്നു ഈ യുവാവ്. ഉമ്മ നേരത്തെ മരിച്ചു. പിതാവും പ്ലസ് ടുവിന് പഠിക്കുന്ന അനിയത്തിയുമടങ്ങുന്ന കുടുംബത്തെ പോറ്റിയിരുന്നത് ഇദ്ദേഹത്തിന്റെ അധ്വാനമായിരുന്നു. സ്വന്തം ജീവിതം പോലും മാറ്റിവെച്ച് സഹോദരിമാർക്ക് വേണ്ടി ജീവിച്ച ഈ യുവാവിന് ഇന്ന് പക്ഷേ സ്വന്തം കാര്യങ്ങൾ പോലും നോക്കാൻ കഴിയാത്ത അവസ്ഥയാണ്.

​ഇതിനിടയിൽ, കയ്യിലുണ്ടായിരുന്ന മൊബൈൽ ഫോൺ മോഷ്ടിക്കപ്പെട്ടതോടെ നാട്ടിലെ ബന്ധുക്കളുമായോ സുഹൃത്തുക്കളുമായോ ബന്ധപ്പെടാനുള്ള വഴികളും അടഞ്ഞു. പിന്നീട് ചിലരുടെ സഹായത്തോടെ ഫോൺ സംഘടിപ്പിച്ചെങ്കിലും, വിധിയെ പഴിച്ചുകൊണ്ട് ആരോടും സഹായം ചോദിക്കാൻ നിൽക്കാതെ തെരുവിൽ കഴിയുകയായിരുന്നു ഇദ്ദേഹം.

​ദിവസവും ഇതുവഴി പോകുന്ന നൂറുകണക്കിന് മലയാളികൾ ഉണ്ടെങ്കിലും, തൊട്ടടുത്ത ഓഫീസിൽ ജോലി ചെയ്യുന്ന റിയാസ് എന്ന മലയാളി യുവാവാണ് ഈ ദുരിതാവസ്ഥ ലോകത്തെ അറിയിക്കുന്നത്. കാക്കത്തൊള്ളായിരം മലയാളി സംഘടനകളുള്ള പ്രവാസലോകത്ത്, ഈ യുവാവിന്റെ കണ്ണീരൊപ്പാൻ ആരെങ്കിലും എത്തുമെന്ന പ്രതീക്ഷയിലാണ് റിയാസ്.

​രോഗം ഭേദമാക്കി പഴയതുപോലെ ജോലിയിൽ പ്രവേശിച്ച് കുടുംബത്തെ നോക്കണമെന്നും, തകർന്നുപോയ ജീവിതം തിരിച്ചുപിടിക്കണമെന്നുമാണ് ഈ യുവാവിന്റെ ആഗ്രഹം. മനുഷ്യസ്നേഹികളുടെയും സംഘടനകളുടെയും സഹായം തേടുകയാണ് ഈ ചങ്ങരംകുളം സ്വദേശി.

എന്താണ് എക്സിമ?

​ചർമ്മത്തിലുണ്ടാകുന്ന ഒരു തരം അലർജി അവസ്ഥയാണിത്. ചർമ്മത്തിൽ അതിശക്തമായ ചൊറിച്ചിൽ, വരൾച്ച, ചുവന്ന തടിപ്പുകൾ എന്നിവയാണ് ലക്ഷണങ്ങൾ. വൃത്തിഹീനമായ സാഹചര്യങ്ങളും പൊടിപടലങ്ങളും രോഗം വഷളാക്കും. തുടർച്ചയായ ചികിത്സയും ചർമ്മം ഈർപ്പമുള്ളതാക്കി വെക്കുകയും ചെയ്താൽ ഇത് ഭേദമാക്കാവുന്നതാണ്.