മരണത്തിന്റെ പിടിയിൽ നിന്ന് പ്രവാസി യുവാവിനെ തിരികെപ്പിടിച്ച് അഖില; ആകാശത്തിലെ ആ മാലാഖയ്ക്ക് കൈയടിച്ച് ലോകം
ദുബായ്/തിരുച്ചിറപ്പള്ളി: ആകാശച്ചുഴിയിൽ വെച്ച് മരണത്തിലേക്ക് വഴുതിവീണ പ്രവാസി യുവാവിന് ദൈവദൂതനെപ്പോലെ ജീവൻ കാത്തത് റാസൽഖൈമ ഹോസ്പിറ്റലിലെ സ്റ്റാഫ് നഴ്സായ അഖില ഓവിയൻ നീലകണ്ഠൻ എന്ന തമിഴ്നാട്ടുകാരി. ദുബായിൽ നിന്നും തമിഴ്നാട്ടിലെ തിരുച്ചിറപ്പള്ളിയിലേക്ക് പറന്ന എയർ ഇന്ത്യ എക്സ്പ്രസ്സ് വിമാനത്തിലാണ് സിനിമാക്കഥകളെ പോലും വെല്ലുന്ന തരത്തിൽ ഒരു മനുഷ്യജീവൻ്റെ കാവലാളായി ഈ ഇരുപത്തിനാലുകാരി മാറിയത്.
മെയ് 12-നായിരുന്നു പ്രവാസി ലോകത്തെയാകെ കണ്ണീരണിയിക്കുകയും പിന്നീട് കൈയടിപ്പിക്കുകയും ചെയ്ത ഈ സംഭവം നടന്നത്. ദുബായ് അന്താരാഷ്ട്ര വിമാനത്താവളത്തിൽ നിന്നും വിമാനം ഉയർന്ന് കേവലം 20 മിനിറ്റ് പിന്നിട്ടപ്പോഴേക്കും വിമാനത്തിനുള്ളിൽ പെട്ടെന്ന് പരിഭ്രാന്തി പടരുകയായിരുന്നു. യാത്രക്കാരനായ 32 വയസ്സുകാരൻ പെട്ടെന്ന് ബോധരഹിതനായി സീറ്റിലേക്ക് കുഴഞ്ഞുവീണു. ശ്വാസമെടുക്കാൻ ബുദ്ധിമുട്ടുകയും കൈകാലുകൾ വിറച്ച് അപസ്മാര ലക്ഷണങ്ങൾ കാണിക്കുകയും ചെയ്തതോടെ സഹയാത്രക്കാർ എന്തുചെയ്യണമെന്നറിയാതെ പകച്ചുനിന്നു.
"വിമാനത്തിൽ ഡോക്ടർമാരോ നഴ്സുമാരോ ഉണ്ടോ?" എന്ന ക്യാബിൻ ക്രൂവിന്റെ അടിയന്തര അനൗൺസ്മെന്റ് വിമാനത്തിൽ മുഴങ്ങിയതോടെ, പിന്നിലെ സീറ്റിലിരിക്കുകയായിരുന്ന അഖില ഒട്ടും മടിക്കാതെ മുന്നോട്ട് വരികയായിരുന്നു. ആദ്യമായി അവധിക്ക് നാട്ടിലേക്ക് പോവുകയായിരുന്ന അഖിലയുടെ ജീവിതത്തിലെ രണ്ടാമത്തെ മാത്രം വിമാനയാത്രയായിരുന്നു ഇത്.
വിമാനത്തിലുണ്ടായിരുന്ന ഒരു ഡോക്ടറുടെ സഹായത്തോടെ അഖില രോഗിയെ കൂടുതൽ സ്ഥലസൗകര്യമുള്ള മുൻഭാഗത്തേക്ക് മാറ്റി. പ്രാഥമിക പരിശോധനകൾ നടത്താൻ വിമാനത്തിൽ ബ്ലഡ് ഷുഗർ നോക്കുന്ന മെഷീൻ പോലുമില്ലായിരുന്നു. എന്നാൽ ലഭ്യമായ കുറഞ്ഞ മെഡിക്കൽ സൗകര്യങ്ങൾ വെച്ച് അഖില സമയോചിതമായി ഇടപെട്ടു. ഡോക്ടറുടെ നിർദ്ദേശപ്രകാരം അതിവേഗം ഐവി (IV) ലൈൻ നൽകുകയും, ബിപിയും പൾസും ക്രമാതീതമായി കുറഞ്ഞ രോഗിയെ പുതപ്പുകൊണ്ട് മൂടി കൈകാലുകൾ തിരുമ്മി ചൂട് പകരുകയും ചെയ്തു. ഇലക്ട്രോലൈറ്റ് സപ്പോർട്ടും ഐവി ഫ്ലൂയിഡുകളും നൽകിയതോടെ ഏതാണ്ട് രണ്ട് മണിക്കൂറോളം നീണ്ട കഠിനശ്രമത്തിനൊടുവിൽ യുവാവ് ബോധം വീണ്ടെടുത്തു.
ബോധം തിരികെ കിട്ടിയ യുവാവിന് ജ്യൂസ് നൽകി ആശ്വസിപ്പിച്ച ശേഷം തൻ്റെ സീറ്റിലേക്ക് മടങ്ങിയെങ്കിലും ഇടയ്ക്കിടെ അഖില രോഗിയുടെ അടുത്തെത്തി സുഖവിവരങ്ങൾ അന്വേഷിക്കുന്നുണ്ടായിരുന്നു. "ഇപ്പോൾ എങ്ങനെയുണ്ട് സഹോദരാ?" എന്ന അഖിലയുടെ ചോദ്യത്തിന്, നന്ദിയോടെ കണ്ണുകൾ തുടച്ചുകൊണ്ട് "ഇപ്പോൾ കുഴപ്പമില്ല സഹോദരി" എന്നായിരുന്നു ആ യുവാവിൻ്റെ മറുപടി.
വിമാനം തിരുച്ചിറപ്പള്ളിയിൽ ലാൻഡ് ചെയ്തയുടൻ റൺവേയിൽ കാത്തുനിന്നിരുന്ന അടിയന്തര മെഡിക്കൽ സംഘത്തിന് പൂർണ്ണ ആരോഗ്യവാനായ യുവാവിനെ സുരക്ഷിതമായി കൈമാറി. അടിയന്തര സാഹചര്യത്തിൽ പതറാതെ ഒരു പ്രവാസി സഹോദരൻ്റെ ജീവൻ രക്ഷിച്ച അഖിലയ്ക്ക് എയർ ഇന്ത്യ എക്സ്പ്രസ്സ് അധികൃതർ വിമാനത്തിൽ വെച്ച് തന്നെ തങ്ങളുടെ ഔദ്യോഗിക കൈപ്പടയിൽ എഴുതിയ പ്രശംസാപത്രം നൽകി ആദരിച്ചു.
Comments
Post a Comment