സഹായത്തിനെന്ന വ്യാജേന എത്തി പീഡനശ്രമം; കുപ്രസിദ്ധ കുറ്റവാളി അജ്മൽ ബിലാൽ വീണ്ടും പോലീസ് വലയിൽ
കോഴിക്കോട്: സ്കൂട്ടറിൽ യാത്ര ചെയ്യുകയായിരുന്ന യുവതിയെ വാഹനം തകരാറിലാണെന്ന് വിശ്വസിപ്പിച്ച് തടഞ്ഞുനിർത്തി പീഡിപ്പിക്കാൻ ശ്രമിച്ച യുവാവ് പോലീസ് പിടിയിലായി. കല്ലായി മുഖദാർ സ്വദേശി അറക്കത്തൊടിക വീട്ടിൽ അജ്മൽ ബിലാലിനെ (24) ആണ് ചെമ്മങ്ങാട് പോലീസ് അറസ്റ്റ് ചെയ്തത്. നിരവധി ക്രിമിനൽ കേസുകളിൽ പ്രതിയായ ഇയാൾ കാപ്പ നിയമപ്രകാരമുള്ള നാടുകടത്തൽ കാലാവധി ലംഘിച്ച് നഗരത്തിൽ പ്രവേശിച്ചതിനിടെയാണ് വീണ്ടും പിടിയിലായത്.
കഴിഞ്ഞ ദിവസം നഗരത്തിൽ സ്കൂട്ടറിൽ യാത്ര ചെയ്യുകയായിരുന്നു പെൺകുട്ടിയെ പ്രതി പിന്തുടരുകയായിരുന്നു. തൻ്റെ സ്കൂട്ടറിൽ യുവതിയെ മറികടന്ന അജ്മൽ, യുവതിയുടെ വാഹനത്തിൻ്റെ പിൻചക്രത്തിന് തകരാറുണ്ടെന്നും നട്ട് ഇളകിയ നിലയിലാണെന്നും പറഞ്ഞ് ഭയപ്പെടുത്തി. വണ്ടി നന്നാക്കാൻ വർക്ക്ഷോപ്പ് കാണിച്ചുതരാമെന്ന് വിശ്വസിപ്പിച്ച് വാഹനം നിർത്തിച്ച ശേഷം ഇയാൾ പീഡിപ്പിക്കാൻ ശ്രമിക്കുകയായിരുന്നു.
പ്രതിയിൽ നിന്നും രക്ഷപ്പെട്ട് സ്കൂട്ടറുമായി മുന്നോട്ട് പോയ പെൺകുട്ടിയെ ഇയാൾ വീണ്ടും പിന്തുടർന്ന് തടഞ്ഞുനിർത്തി അതിക്രമത്തിന് മുതിർന്നു. പെൺകുട്ടി ബഹളം വെച്ചതോടെ നാട്ടുകാർ ഓടിക്കൂടുകയും അജ്മൽ സംഭവസ്ഥലത്തുനിന്ന് കടന്നുകളയുകയുമായിരുന്നു.
പെൺകുട്ടിയുടെ പരാതിയിൽ കേസ് രജിസ്റ്റർ ചെയ്ത ചെമ്മങ്ങാട് പോലീസ് ചുള്ളിക്കാട് ഭാഗത്തുനിന്നാണ് പ്രതിയെ പിടികൂടിയത്. ചെമ്മങ്ങാട് ഇൻസ്പെക്ടർ ജോബി തോമസിൻ്റെ നേതൃത്വത്തിൽ സബ് ഇൻസ്പെക്ടർമാരായ ബാബു, സുരേഷ്, സിവിൽ പോലീസ് ഓഫീസർമാരായ റിജേഷ്, രഞ്ജിത്ത്, നിജാസ്, സുഗേഷ്, അനൂപ് എന്നിവരടങ്ങിയ സംഘമാണ് പ്രതിയെ കസ്റ്റഡിയിലെടുത്തത്.
പിടിയിലായ അജ്മൽ ബിലാൽ നഗരത്തിലെ വിവിധ സ്റ്റേഷനുകളിലായി നിരവധി കേസുകളിൽ പ്രതിയാണെന്ന് പോലീസ് അറിയിച്ചു. മോഷണം, വീട്ടിൽ അതിക്രമിച്ച് കയറി സ്ത്രീകളെ ഉപദ്രവിക്കൽ, ലഹരിമരുന്ന് ഉപയോഗം, ആയുധം കാട്ടി പണം തട്ടൽ. സാമൂഹിക വിരുദ്ധ പ്രവർത്തനങ്ങൾ പതിവായതോടെ ഇയാളെ ഒരു വർഷത്തേക്ക് കോഴിക്കോട് ജില്ലയിൽ നിന്നും നാടുകടത്തിയിരുന്നു. എന്നാൽ ഈ ഉത്തരവ് ലംഘിച്ചാണ് ഇയാൾ വീണ്ടും നഗരത്തിലെത്തിയത്.
ചക്കുംകടവിലുള്ള വീട്ടിൽ നിന്നും പിടികൂടിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു. നഗരത്തിൽ സമാനമായ രീതിയിൽ വാഹനം തടഞ്ഞുനിർത്തി സ്ത്രീകളെ ശല്യം ചെയ്യുന്ന സംഘങ്ങൾക്കെതിരെ നിരീക്ഷണം ശക്തമാക്കുമെന്ന് പോലീസ് അറിയിച്ചു.
Comments
Post a Comment