സന്തോഷ് നായരുടെ വിയോഗം: ആ വയോധികൻ വീട്ടിലെ ജോലിക്കാരനല്ല; വൈറൽ വീഡിയോയുടെ വാസ്തവം വെളിപ്പെടുത്തി സഹായി

 

കൊച്ചി: നടൻ സന്തോഷ് കെ. നായരുടെ അപ്രതീക്ഷിത വിയോഗത്തിന് പിന്നാലെ സമൂഹമാധ്യമങ്ങളിൽ പ്രചരിച്ച വീഡിയോയിലെ വയോധികനെ സംബന്ധിച്ചുള്ള ദുരൂഹതകൾക്ക് വിരാമം. സന്തോഷിന്റെ വസതിയിലെത്തിയ വയോധികൻ നിയന്ത്രണം വിട്ടു കരയുന്ന ദൃശ്യങ്ങൾ വലിയ രീതിയിൽ ശ്രദ്ധിക്കപ്പെട്ടിരുന്നു. ഇദ്ദേഹം സന്തോഷിന്റെ വീട്ടിലെ വർഷങ്ങളായുള്ള വിശ്വസ്തനായ ജോലിക്കാരനാണെന്ന തരത്തിലായിരുന്നു പ്രചരണം. എന്നാൽ, ഇതിന്റെ സത്യാവസ്ഥ വെളിപ്പെടുത്തി സന്തോഷ് നായരുടെ യഥാർത്ഥ സഹായി രംഗത്തെത്തി.

​പ്രചരണം തെറ്റാണെന്ന് സഹായി

​സന്തോഷ് നായരുടെ വീട്ടിൽ ദീർഘകാലമായി ജോലി ചെയ്യുന്ന സഹായിയാണ് വീഡിയോയിലെ വയോധികൻ ആരെന്ന് വ്യക്തമാക്കിയത്. വൈറലായ ദൃശ്യങ്ങളിലുള്ള ആൾ സന്തോഷിന്റെ വീട്ടിലെ ജീവനക്കാരനല്ലെന്നും തൊട്ടടുത്ത വീട്ടിൽ ജോലി ചെയ്യുന്ന വ്യക്തിയാണെന്നും അദ്ദേഹം പറഞ്ഞു.

​"ഈ വീട്ടിലെ കാര്യങ്ങളെല്ലാം നോക്കുന്നത് ഞാനാണ്. വർഷങ്ങളായി സന്തോഷേട്ടനോടൊപ്പമുണ്ട്. ഗേറ്റിന്റെ താക്കോൽ പോലും എന്റെ കൈവശമാണ്. വീഡിയോയിലുള്ള വയോധികൻ അയൽപക്കത്തെ വീട്ടിൽ ജോലി ചെയ്യുന്ന ആളാണ്. സന്തോഷേട്ടൻ വീട്ടിൽ വരുമ്പോഴും പോകുമ്പോഴും വഴിയിൽ വെച്ച് കാണാറുള്ള പരിചയം മാത്രമാണ് ഇദ്ദേഹത്തിനുള്ളത്. സന്തോഷേട്ടന്റെ ഭാര്യയോടും മകളോടും ചോദിച്ചാൽ ഇക്കാര്യം വ്യക്തമാകും," സഹായി പറഞ്ഞു.

​സ്നേഹപൂർവ്വമുള്ള പെരുമാറ്റം

​   കാണുന്നവരോടെല്ലാം സ്നേഹത്തോടെയും വിനയത്തോടെയും പെരുമാറുന്ന ശീലമായിരുന്നു സന്തോഷ് നായരുടേത്. ആ പരിചയത്തിന്റെ പുറത്ത്, തന്റെ  അയൽവാസിയായപ്രിയപ്പെട്ട നടന്റെ വിയോഗമറിഞ്ഞെത്തിയ വയോധികൻ വികാരാധീനനാവുകയായിരുന്നു. ഈ ദൃശ്യങ്ങൾ ചാനലുകൾ പകർത്തിയതോടെയാണ് അദ്ദേഹം വീട്ടിലെ ജോലിക്കാരനാണെന്ന തെറ്റായ വാർത്തകൾ പ്രചരിക്കാൻ ഇടയാക്കിയത്.

​'മോഹിനിയാട്ടം' എന്ന ചിത്രം തിയേറ്ററുകളിൽ മികച്ച പ്രതികരണം നേടി മുന്നേറുന്നതിനിടെയാണ് സന്തോഷ് നായർ വാഹനാപകടത്തിൽ മരണപ്പെടുന്നത്. വില്ലൻ വേഷങ്ങളിലൂടെയും സഹനടനായും മലയാളികളുടെ പ്രിയങ്കരനായിരുന്ന അദ്ദേഹത്തിന്റെ തിരിച്ചുവരവ് ചിത്രമായിരുന്നു ഇത്.