കോർപ്പറേറ്റ് ജോലി വിട്ട് മലമുകളിലേക്ക് പോയാലോ? ഒരു ദിവസം കൊണ്ട് 24,000 രൂപയുടെ മാഗി വിറ്റ് യുവാവിന്റെ പരീക്ഷണം

 

ന്യൂഡൽഹി: മലയോര മേഖലകളിലേക്കും ഹിൽ സ്റ്റേഷനുകളിലേക്കും യാത്ര പോകുന്ന സഞ്ചാരികളുടെ പ്രിയപ്പെട്ട ഭക്ഷണമാണ് ചൂടുള്ള മാഗി. യാത്രാക്ഷീണം മാറ്റി ശരീരത്തിന് പെട്ടെന്ന് ഊർജ്ജം നൽകാൻ മലമുകളിലെ തട്ടുകടകളിൽ നിന്ന് ലഭിക്കുന്ന മാഗിയോളം മികച്ച മറ്റൊരു ഓപ്ഷൻ ഇല്ലെന്നാണ് പലരുടെയും അഭിപ്രായം. എന്നാൽ, ഈ ഒരു സാധ്യതയെ ബിസിനസ്സ് ബുദ്ധിയോടെ സമീപിച്ച് ഒറ്റദിവസം കൊണ്ട് വൻ തുക സമ്പാദിക്കാമെന്ന് തെളിയിച്ചിരിക്കുകയാണ് ഒരു സോഷ്യൽ മീഡിയ കണ്ടന്റ് ക്രിയേറ്റർ.

​ഡൽഹി സ്വദേശിയായ ദേവാൻഷ് ത്യാഗി എന്ന യുവാവാണ് മലമുകളിൽ താൽക്കാലികമായി മാഗി സ്റ്റാൾ സ്ഥാപിച്ച് വ്യത്യസ്തമായ ഒരു പരീക്ഷണം നടത്തിയത്. ട്രെക്കിംഗിനായി എത്തുന്ന സഞ്ചാരികളെ ലക്ഷ്യമിട്ട് നടത്തിയ ഈ ബിസിനസ്സ് ചലഞ്ചിന്റെ വീഡിയോ സോഷ്യൽ മീഡിയയിൽ ഇതിനകം തന്നെ വൻ തരംഗമായി മാറിക്കഴിഞ്ഞു.

​വലിയ തയാറെടുപ്പുകളോടെ മലമുകളിലേക്ക്

​നൂഡിൽസ് പാക്കറ്റുകൾ, ഗ്യാസ് സ്റ്റൗ ഉൾപ്പെടെയുള്ള പാചക സാമഗ്രികൾ, മടക്കാവുന്ന മേശകൾ , പ്ലാസ്റ്റിക് കസേരകൾ എന്നിവയുമായാണ് ദേവാൻഷ് ത്യാഗി മലനിരകളിൽ എത്തിയത്. മനോഹരമായ മലനിരകൾക്ക് അഭിമുഖമായി സഞ്ചാരികളെ ആകർഷിക്കുന്ന രീതിയിലാണ് ഇയാൾ ചെറിയൊരു താൽക്കാലിക സ്റ്റാൾ സജ്ജീകരിച്ചത്.

​  കട തുറന്ന നിമിഷം മുതൽ തന്നെ മലനിരകളുടെ ഭംഗി ആസ്വദിച്ച് ചൂടുള്ള മാഗി കഴിക്കാനായി വിനോദസഞ്ചാരികളുടെ വലിയൊരു തിരക്കാണ് ഇവിടെ അനുഭവപ്പെട്ടത്. ത്യാഗി തന്നെയായിരുന്നു ഓരോ ഓർഡറുകളും തത്സമയം തയാറാക്കി നൽകിയിരുന്നത്. ഒരു പ്ലേറ്റ് സാധാരണ മാഗിക്ക് 100 രൂപയും, ബട്ടർ മാഗിക്ക് 120 രൂപയുമായിരുന്നു ഇയാൾ ഈടാക്കിയിരുന്നത്.

​ഒരു ദിവസം കൊണ്ട് 24,000 രൂപ!

​തന്റെ ഒരു ദിവസത്തെ ചലഞ്ച് അവസാനിച്ചപ്പോൾ സ്റ്റാളിൽ നിന്നും 24,000 രൂപയുടെ ബിസിനസ്സ് നടന്നതായാണ് ദേവാൻഷ് ത്യാഗി അവകാശപ്പെടുന്നത്. 112 മില്യണിലധികം (11 കോടിയിലധികം) ആളുകളാണ് ഈ വീഡിയോ ഇതിനോടകം കണ്ടത്.

​വീഡിയോ വൈറലായതോടെ വലിയ രീതിയിലുള്ള ചർച്ചകൾക്കും ഇത് വഴിതുറന്നു. നിലവിലുള്ള ഒമ്പത് മണി മുതൽ അഞ്ച് മണി വരെയുള്ള കോർപ്പറേറ്റ് ജോലികളേക്കാൾ എത്രയോ ലാഭകരമാണ് മലമുകളിലെ മാഗി കച്ചവടമെന്നാണ് ഭൂരിഭാഗം പേരും തമാശയായി കമന്റ് ചെയ്യുന്നത്. ഐടി ജോലി ഒക്കെ ഉപേക്ഷിച്ച് വല്ല മലമുകളിലും പോയി മാഗി വിറ്റാലോ എന്ന് ആലോചിക്കുന്നതായി കുറിച്ചവരും കുറവല്ല.

​വിമർശനവുമായി മറ്റൊരു വിഭാഗം

​"24,000 രൂപ എന്നത് ഒരു ദിവസത്തെ മൊത്തം വരുമാനം (Revenue) മാത്രമാണെന്നും, അത് യഥാർത്ഥ ലാഭമല്ലെന്നും (Net Profit) സാമ്പത്തിക കാര്യങ്ങൾ ചൂണ്ടിക്കാട്ടി ചിലർ ഓർമ്മിപ്പിച്ചു."

​നൂഡിൽസ്, പച്ചക്കറികൾ, ഗ്യാസ് സിലിണ്ടർ എന്നിവ വാങ്ങാനുള്ള ചെലവ്, കിലോമീറ്ററുകളോളം ദൂരം യാത്ര ചെയ്ത് സാധനങ്ങൾ മലമുകളിൽ എത്തിക്കാനുള്ള ഗതാഗതച്ചെലവ്, ശാരീരിക അധ്വാനം എന്നിവ കുറച്ചാൽ മാത്രമേ യഥാർത്ഥ ലാഭം കണക്കാക്കാൻ സാധിക്കൂ എന്ന് ഇവർ വാദിക്കുന്നു.

​ഇതിനുപുറമേ, വീഡിയോയിൽ കാണുന്ന അരുവിയിലെ വെള്ളം ഉപയോഗിച്ചാണ് മാഗി തയാറാക്കിയതെന്ന് ചൂണ്ടിക്കാണിച്ച് ശുചിത്വത്തെക്കുറിച്ച് ആശങ്ക പ്രകടിപ്പിച്ചവരും കുറവല്ല. എന്തായാലും യാത്രാപ്രേമികളുടെ പ്രിയപ്പെട്ട മാഗിയെ ചുറ്റിപ്പറ്റിയുള്ള ഈ പുതിയ ചലഞ്ച് വീഡിയോ സോഷ്യൽ മീഡിയയിൽ ഇപ്പോഴും വലിയ രീതിയിൽ ലൈക്കുകളും കമന്റുകളും വാരിക്കൂട്ടുകയാണ്.