"നീ കറുത്തവനാണ്, എന്നെ അർഹിക്കുന്നില്ല"; പ്രണയിക്കാൻ തടസ്സമായ ഭർത്താവിനെ ഭാര്യ ക്വട്ടേഷൻ നൽകി ജീവനെടുത്തു

 

ധർ (മധ്യപ്രദേശ്): മധ്യപ്രദേശിലെ ധറിൽ സുഗന്ധവ്യഞ്ജന വ്യാപാരിയായ പുരോഹിത് ദേവകൃഷ്ണയുടെ (28) മരണത്തിന് പിന്നിൽ ഭാര്യയും കാമുകനും ചേർന്നൊരുക്കിയ ക്രൂരമായ ഗൂഢാലോചനയെന്ന് പോലീസ്. കവർച്ചാ ശ്രമത്തിനിടെ നടന്ന കൊലപാതകമെന്ന് വരുത്തിത്തീർക്കാൻ ശ്രമിച്ച പ്രതികളെ ശാസ്ത്രീയമായ അന്വേഷണത്തിനൊടുവിലാണ് പോലീസ് കുടുക്കിയത്. സംഭവത്തിൽ ഭാര്യ പ്രിയങ്ക (25), കാമുകൻ കമലേഷ് പുരോഹിത് (32) എന്നിവരെ പോലീസ് അറസ്റ്റ് ചെയ്തു.

​ഏപ്രിൽ 7-നാണ് ദേവകൃഷ്ണയെ വീടിനുള്ളിൽ കൊല്ലപ്പെട്ട നിലയിൽ കണ്ടെത്തിയത്. വീട് തകർത്ത് അകത്തുകയറിയ അജ്ഞാത സംഘം 35 ലക്ഷം രൂപയും ആഭരണങ്ങളും കവരുന്നത് തടയാൻ ശ്രമിച്ച ഭർത്താവിനെ കൊലപ്പെടുത്തിയെന്നായിരുന്നു പ്രിയങ്ക പോലീസിന് നൽകിയ ആദ്യ മൊഴി. തന്നെ അക്രമികൾ കെട്ടിയിട്ടതായും ഇവർ അവകാശപ്പെട്ടിരുന്നു. എന്നാൽ പ്രിയങ്കയുടെ മൊഴികളിലെ വൈരുദ്ധ്യം ശ്രദ്ധിച്ച പോലീസ് നടത്തിയ പരിശോധനയിൽ, മോഷ്ടിക്കപ്പെട്ടുവെന്ന് പറഞ്ഞ ആഭരണങ്ങൾ വീടിനുള്ളിൽ തന്നെ ഒളിപ്പിച്ച നിലയിൽ കണ്ടെത്തി. ഇതോടെ അന്വേഷണം പ്രിയങ്കയിലേക്ക് തിരിയുകയായിരുന്നു.

​ഭർത്താവായ ദേവകൃഷ്ണയുടെ കറുത്ത നിറത്തെച്ചൊല്ലി പ്രിയങ്ക നിരന്തരം പരിഹസിച്ചിരുന്നതായി ബന്ധുക്കൾ പോലീസിന് മൊഴി നൽകി. "നീ കറുത്തവനാണ്, എന്നെ അർഹിക്കുന്നില്ല" എന്ന് പറഞ്ഞ് പ്രിയങ്ക ഭർത്താവിനെ മാനസികമായി പീഡിപ്പിച്ചിരുന്നു. ഇതിനിടയിലാണ് രാജ്ഗഡ് സ്വദേശിയായ കമലേഷുമായി പ്രിയങ്ക പ്രണയത്തിലാകുന്നത്. ഭർത്താവിനെ ഒഴിവാക്കി ഒന്നിച്ചു ജീവിക്കാൻ ഇവർ തീരുമാനിച്ചതോടെയാണ് കൊലപാതകത്തിന് പദ്ധതിയൊരുക്കിയത്.

​  ഭർത്താവിനെ വകവരുത്താൻ ഒരു ലക്ഷം രൂപയ്ക്കാണ് സുരേന്ദ്ര ഭാട്ടി എന്നയാളെ കാമുകൻ കമലേഷ് നിയോഗിച്ചത്. ഇതിനായി 50,000 രൂപ മുൻകൂറായി നൽകി. കൃത്യം നടന്ന രാത്രിയിൽ പ്രിയങ്ക വീടിന്റെ വാതിൽ മനഃപൂർവം തുറന്നിട്ടു. ഉറങ്ങിക്കിടക്കുകയായിരുന്ന ദേവകൃഷ്ണയെ സുരേന്ദ്ര ക്രൂരമായി ആക്രമിച്ച് കൊലപ്പെടുത്തുകയായിരുന്നു.

​ഡിജിറ്റൽ തെളിവുകളും മൊബൈൽ ഫോൺ രേഖകളും പോലീസ് നിരത്തിയതോടെ പ്രിയങ്ക കുറ്റം സമ്മതിച്ചു. കേസിലെ മൂന്നാം പ്രതിയായ വാടകക്കൊലയാളി സുരേന്ദ്ര ഭാട്ടിക്കായി പോലീസ് തിരച്ചിൽ ഊർജിതമാക്കിയിട്ടുണ്ട്. സ്നേഹിച്ചു കയറിവന്ന വീട്ടിൽ ഭർത്താവിന്റെ ചോര വീഴ്ത്തിയ പ്രിയങ്കയുടെ ക്രൂരത പ്രാദേശിക ജനതയെ നടുക്കിയിരിക്കുകയാണ്.