കണ്ണീരായി നിതിൻ രാജ്: അഞ്ചരക്കണ്ടിയിൽ പൊലിഞ്ഞത് ഒരു കുടുംബത്തിന്റെ ഏക പ്രതീക്ഷ

 

കണ്ണൂർ: കേരളത്തെ നടുക്കിയ പൂക്കോട് സിദ്ധാർത്ഥന്റെയും ജിഷ്ണു പ്രണോയിയുടെയും ഓർമ്മകൾ മായും മുൻപേ, അഞ്ചരക്കണ്ടി മെഡിക്കൽ കോളേജ് കാമ്പസിൽ നിന്നും സമാനമായ മറ്റൊരു കണ്ണീർ വാർത്ത കൂടി. ഒന്നാം വർഷ ബി.ഡി.എസ് വിദ്യാർത്ഥിയായ തിരുവനന്തപുരം ഉഴമലയ്ക്കൽ സ്വദേശി നിതിൻ രാജ് (23) കോളേജ് കെട്ടിടത്തിൽ നിന്ന് വീണ് മരിച്ച സംഭവത്തിൽ അധിക്ഷേപത്തിന്റെയും പീഡനത്തിന്റെയും ഞെട്ടിക്കുന്ന വിവരങ്ങളാണ് പുറത്തുവരുന്നത്.

​മരണത്തിന് മുൻപ് നിതിൻ തന്റെ സഹപാഠികൾക്ക് അയച്ച ആഡിയോ സന്ദേശം പുറത്തുവന്നതോടെയാണ് കോളേജിലെ ക്രൂരതകൾ പുറംലോകം അറിയുന്നത്. "തന്റെ കയ്യും കാലും വെട്ടുമെന്ന് അധ്യാപകൻ ഭീഷണിപ്പെടുത്തി. അമ്മയെയും അമ്മയുടെ അസുഖത്തെയും അധ്യാപകൻ പരിഹസിച്ചു. സ്റ്റാഫ് റൂം എന്നത് കുട്ടികളെ കൂട്ടത്തോടെ ആക്രമിക്കുന്ന സ്ഥലമാണ്" - നിതിന്റെ ഈ വാക്കുകൾ കലാലയങ്ങൾക്കുള്ളിലെ മാനസിക പീഡനങ്ങളുടെ ആഴം വ്യക്തമാക്കുന്നു.

​നിതിനെ നിറത്തിന്റെയും ജാതിയുടെയും പേരിൽ അധ്യാപകർ നിരന്തരം വേട്ടയാടിയിരുന്നതായി കുടുംബം ആരോപിക്കുന്നു. ഡെന്റൽ അനാട്ടമി വിഭാഗം മേധാവി ഡോ. എം.കെ റാം നിതിനെ 'പുഴുത്ത പട്ടി' എന്ന് വിളിച്ചതായും സഹോദരി ഭർത്താവ് ആരോപിച്ചു. പഠനത്തിൽ മുൻപന്തിയിലായിരുന്നിട്ടും, ദളിത് വിദ്യാർത്ഥിയായ നിതിനെ മറ്റ് കുട്ടികളുടെ മുന്നിൽ വെച്ച് അപമാനിക്കുന്നത് പതിവായിരുന്നുവെന്ന് പിതാവ് രാജൻ പറഞ്ഞു.

​നിതിൻ താമസിച്ചിരുന്ന ഹോസ്റ്റൽ ഒരു തടവറയ്ക്ക് സമാനമായിരുന്നുവെന്നാണ് ബന്ധുക്കളുടെ വെളിപ്പെടുത്തൽ. രണ്ട് മാസം മുൻപ് പനി ബാധിച്ചു കിടന്നപ്പോൾ നിതിനെ ഒറ്റപ്പെട്ട മുറിയിലേക്ക് മാറ്റുകയും സഹപാഠികളുമായി സംസാരിക്കുന്നത് അധികൃതർ തടയുകയും ചെയ്തു. സീനിയർ വിദ്യാർത്ഥികളിൽ നിന്ന് ശാരീരികമായ റാഗിംഗും നിതിൻ നേരിട്ടിരുന്നു. ഇതിനെക്കുറിച്ച് പരാതി നൽകിയിട്ടും അധികൃതർ തിരിഞ്ഞുനോക്കിയില്ലെന്ന് മാത്രമല്ല, പരാതി നൽകിയതിൽ വൈരാഗ്യം വെച്ച് അധ്യാപകർ പീഡനം കടുപ്പിക്കുകയും ചെയ്തു.

​ആരോപണവിധേയരായ ഡെന്റൽ അനാട്ടമി വിഭാഗം മേധാവി ഡോ. എം.കെ റാം, അസോസിയേറ്റ് പ്രൊഫസർ ഡോ. സംഗീത എന്നിവരെ കോളേജ് മാനേജ്‌മെന്റ് സസ്‌പെൻഡ് ചെയ്തു. ഇവരെ പോലീസ് ഇന്ന് ചോദ്യം ചെയ്യും. അതേസമയം, നിതിന്റെ സാമ്പത്തിക ഇടപാടുകളെക്കുറിച്ച് പരാതിയുണ്ടെന്ന കോളേജ് പ്രിൻസിപ്പലിന്റെ വാദം ചക്കരക്കൽ പോലീസ് തള്ളി. നിതിനെതിരെ ഇതുവരെ ഒരു പരാതിയും ലഭിച്ചിട്ടില്ലെന്ന് പോലീസ് വ്യക്തമാക്കി.

​പോസ്റ്റ്‌മോർട്ടത്തിന് ശേഷം ഇന്ന് പുലർച്ചെ നിതിൻ രാജിന്റെ മൃതദേഹം തിരുവനന്തപുരം ഉഴമലയ്ക്കലിലെ വീട്ടിലെത്തിച്ചു. മൃതദേഹം കണ്ട് തളർന്നുവീണ മാതാപിതാക്കളെ ആശ്വസിപ്പിക്കാൻ ബന്ധുക്കൾ പാടുപെട്ടു. വാടകവീട്ടിൽ കഴിഞ്ഞ് പെയിന്റിംഗ് പണി ചെയ്യുന്ന രാജന്റെയും ലതയുടെയും ഏക പ്രതീക്ഷയായിരുന്നു നിതിൻ. മകന്റെ മരണം കൊലപാതകത്തിന് തുല്യമാണെന്നും കുറ്റക്കാർക്കെതിരെ ക്രിമിനൽ നടപടി വേണമെന്നുമാണ് കുടുംബത്തിന്റെ ആവശ്യം.

​സംഭവത്തിൽ സമഗ്രമായ അന്വേഷണം ആവശ്യപ്പെട്ട് എസ്.എഫ്.ഐ, കെ.എസ്.യു തുടങ്ങിയ സംഘടനകൾ രംഗത്തെത്തിയിട്ടുണ്ട്. രാഷ്ട്രീയ സ്വാധീനം ഉപയോഗിച്ച് കേസ് അട്ടിമറിക്കപ്പെടുമോ എന്ന ആശങ്കയും ശക്തമാണ്.