പെരുവണ്ണാമൂഴിയിൽ ജനരോഷം ഇരമ്പുന്നു; "ഇനി ഒരു മനുഷ്യജീവൻ കൂടി പോകണോ?"

 

ചക്കിട്ടപാറ: "ഇപ്പോൾ ഒരു ആനയേ ചരിഞ്ഞുള്ളൂ, ഇനി ഒരു മനുഷ്യജീവൻ കൂടി നഷ്ടപ്പെടുന്നത് കാണണോ?" - വന്യമൃഗശല്യത്തിൽ പൊറുതിമുട്ടിയ പെരുവണ്ണാമൂഴി നിവാസികളുടെ ഈ ചോദ്യത്തിന് മുന്നിൽ  ഉദ്യോഗസ്ഥർ മറുപടിയില്ലാതെ നിന്നു. മുതുകാട് നാലാം ബ്ലോക്ക് പയ്യാനിക്കോട്ടയിൽ കിഴക്കേ ഇല്ലപ്പറമ്പിൽ കണാരന്റെ വീട്ടുമുറ്റത്ത് കാട്ടാന ഇരുമ്പുതൂൺ കുത്തിക്കയറി ചരിഞ്ഞ വിവരമറിഞ്ഞ് തടിച്ചുകൂടിയ നാട്ടുകാരാണ് വനംവകുപ്പ് ഉദ്യോഗസ്ഥരോട് പ്രതിഷേധമറിയിച്ചത്.

​വന്യമൃഗശല്യം തടയാനായി പ്രഖ്യാപിച്ച സോളാർ തൂക്കുവേലി നിർമ്മാണം ഉടൻ പൂർത്തിയാക്കണമെന്നതായിരുന്നു ജനങ്ങളുടെ പ്രധാന ആവശ്യം. 35 ലക്ഷം രൂപ ചെലവിൽ മൂന്ന് കിലോമീറ്റർ ദൂരത്തിൽ ആർ.കെ.വി.വൈ. പദ്ധതിയിൽ ഉൾപ്പെടുത്തി തൂക്കുവേലി നിർമിക്കാൻ ഒരു മാസം മുൻപ് ഉദ്ഘാടനം നടന്നിരുന്നു. എന്നാൽ ഇതുവരെ ടെൻഡർ നടപടികൾ പോലും പൂർത്തിയായിട്ടില്ലെന്ന് നാട്ടുകാർ ആരോപിച്ചു.

​തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നതിനാലാണ് നടപടികൾ വൈകുന്നതെന്നും ചട്ടം മാറിയാലുടൻ വേലി നിർമ്മാണം തുടങ്ങുമെന്നും ഡി.എഫ്.ഒ. നാട്ടുകാർക്ക് ഉറപ്പുനൽകി. പയ്യാനിക്കോട്ട മേഖലയിൽ വീടുകൾ കൂടുതലായതിനാൽ നിർമ്മാണം ഇവിടെനിന്ന് തന്നെ തുടങ്ങണമെന്ന് ജനങ്ങൾ ആവശ്യപ്പെട്ടു. എന്നാൽ ഇതിന് ഡി.പി.സി. അംഗീകാരം ആവശ്യമാണെന്നും പുതിയ പദ്ധതികൾ ആവിഷ്കരിക്കുമെന്നും പഞ്ചായത്ത് പ്രസിഡന്റ് വ്യക്തമാക്കി.

​നാട്ടുകാർ മുന്നോട്ടുവെച്ച പ്രധാന ആവശ്യങ്ങൾ:

• ​താല്ക്കാലിക സുരക്ഷ: തൂക്കുവേലി പൂർത്തിയാകുന്നത് വരെ പ്രദേശത്ത് രണ്ട് സ്ഥിരം വാച്ചർമാരെ നിയമിക്കണം.
• ​ശിഖരങ്ങൾ മുറിക്കണം: കുരങ്ങും മലയണ്ണാനും കൃഷി നശിപ്പിക്കുന്നത് തടയാൻ വനമേഖലയോട് ചേർന്നുള്ള മരങ്ങളുടെ ശിഖരങ്ങൾ വെട്ടിമാറ്റണം.
• ​പയ്യാനിക്കോട്ടയ്ക്ക് മുൻഗണന: വന്യമൃഗശല്യം രൂക്ഷമായ പയ്യാനിക്കോട്ട മേഖലയിൽ നിന്ന് പ്രതിരോധ പ്രവർത്തനങ്ങൾ ആരംഭിക്കണം.

​ഏറെക്കാലമായി കാട്ടാനശല്യം രൂക്ഷമായ മേഖലയാണിത്. ആന ചരിഞ്ഞ കണാരന്റെ വീട്ടിൽ മുൻപും ആനയെത്തിയിട്ടുണ്ടെന്ന് മകൻ മനോഹരൻ പറഞ്ഞു. പത്ത് ദിവസം മുൻപും ഇവിടെ ആനകൾ കൃഷി നശിപ്പിച്ചിരുന്നു. അന്ന് മൂന്ന് ആനകളാണ് വീടിന് ചുറ്റും നിലയുറപ്പിച്ചിരുന്നത്. അയൽക്കാർ വിളിച്ചു പറഞ്ഞതുകൊണ്ട് മാത്രം പുറത്തിറങ്ങാതിരുന്നതിനാലാണ് രക്ഷപ്പെട്ടതെന്ന് അദ്ദേഹം ഓർക്കുന്നു.

​സമീപത്തെ ഉള്ളാട്ടിൽ ചാക്കോയുടെ പുരയിടത്തിൽ പത്തു വർഷത്തിനിടെ ഒട്ടേറെ കാർഷിക വിളകളാണ് ആനകൾ നശിപ്പിച്ചത്. ഏഴോളം ആനകൾ കൂട്ടത്തോടെ പ്രദേശത്തിറങ്ങുന്നത് പതിവാണെന്ന് സിജോ ഉള്ളാട്ടിലും സാക്ഷ്യപ്പെടുത്തുന്നു. ആനയുടെ മുൻപിൽ നിന്നും തലനാരിഴയ്ക്ക് രക്ഷപ്പെട്ട നിരവധി പേർ പയ്യാനിക്കോട്ടയിലുണ്ട്.