അന്ത്യവിശ്രമത്തിലും കൂട്ടിന് ആ തെരുവുനായ; ആമിനയുടെ മരണത്തിന് ശേഷവും വിട്ടുമാറാത്ത സ്നേഹം

 

വയനാട്:  മനുഷ്യർക്കിടയിൽ സ്നേഹവും നന്ദിയും കുറഞ്ഞുവരുന്ന കാലത്ത്, ഒരു മിണ്ടാപ്രാണി കാണിക്കുന്ന സ്നേഹത്തിന്റേയും കൂറിന്റെയും കഥയാണ് ഇപ്പോൾ നാടാകെ ചർച്ചയാകുന്നത്. കഴിഞ്ഞ ശനിയാഴ്ച അന്തരിച്ച ആമിനത്ത എന്ന വയോധികയുടെ ഖബറിനരികെ നിത്യവും കാവലിരിക്കുന്ന തെരുവുനായയുടെ ചിത്രം ഏവരുടെയും കണ്ണുകളെ ഈറനണിയിക്കുകയാണ്.

മകളുടെ വീട്ടിൽ വിരുന്ന് കഴിഞ്ഞ് മടങ്ങുകയായിരുന്നു ആമിന. തിരക്കുകൾക്കിടയിൽ മരുമകൻ അവരെ വീട്ടുമുറ്റത്തെ ഗേറ്റിനു പുറത്തിറക്കി യാത്ര പറഞ്ഞു തിരിച്ചുപോയി. എന്നാൽ വീടിന്റെ പടിവാതിലിലേക്ക് നടക്കും മുൻപേ ആമിന കുഴഞ്ഞു വീഴുകയായിരുന്നു. ഈ ദാരുണമായ സംഭവം വീട്ടുകാരോ കൊണ്ടുവിട്ട ബന്ധുക്കളോ അറിഞ്ഞിരുന്നില്ല.

​എന്നാൽ ആ സമയം അവിടെയുണ്ടായിരുന്ന, ആ നാട്ടിൽ അലഞ്ഞുനടന്നിരുന്ന ഒരു തെരുവുനായ ആമിനയുടെ അടുത്തേക്ക് ഓടിയെത്തി. ഉച്ചത്തിൽ കരഞ്ഞും കുരച്ചും പരിസരത്തുള്ളവരുടെ ശ്രദ്ധ അത് പിടിച്ചുപറ്റി. നായയുടെ നിർത്താതെയുള്ള കുര കേട്ട് വീട്ടുകാരും അയൽവാസികളും ഓടിക്കൂടിയപ്പോഴാണ് ആമിന താഴെ വീണു കിടക്കുന്നത് കണ്ടത്. ഉടൻ തന്നെ ആശുപത്രിയിൽ എത്തിച്ചെങ്കിലും ആമിനത്തയുടെ ജീവൻ രക്ഷിക്കാനായില്ല.

മയ്യിത്ത് പള്ളിയിലേക്ക് കൊണ്ടുപോകുമ്പോഴും ആ നായ ഒരു വിലാപയാത്രയിലെന്നപോലെ ആളുകൾക്കൊപ്പം ഖബർസ്ഥാൻ വരെ നടന്നു. സംസ്കാര ചടങ്ങുകൾ തീരുന്നതുവരെ അത് അവിടെ തന്നെ നിന്നു. മരണശേഷവും ഈ നായ ആമിനത്തയോടുള്ള തന്റെ സ്‌നേഹം കാത്തുസൂക്ഷിക്കുന്നു എന്നതാണ് ഏറ്റവും ഹൃദയഭേദകമായ കാഴ്ച.

​   ആമിനയുടെ ഖബറിന് സമീപം ദിവസവും ഈ നായയെ കാണാം. പുലർച്ചെ നമസ്കാരത്തിന് പള്ളിയിലേക്ക് പോകുന്നവരും തിരികെ വരുന്നവരും ഖബറിനരികെ ഈ നായ കിടക്കുന്നത് നിത്യകാഴ്ചയാക്കി മാറ്റിയിരിക്കുന്നു. അവർ എത്രനേരം അവിടെ നിൽക്കുന്നുവോ അത്രയും നേരം ഈ മിണ്ടാപ്രാണിയും അവിടെ ചെലവഴിക്കുന്നു.

ആമിന വളർത്തിയിരുന്ന നായയല്ല ഇത്. എങ്കിലും, തന്റെ വീടിന്റെ പിൻവശത്ത് ഈ നായയ്ക്ക് വിശപ്പടക്കാൻ ദിവസവും മൂന്നുനേരം ആഹാരം കരുതിവെക്കാൻ ആമിന ശ്രദ്ധിച്ചിരുന്നു. ആ ഒരു നേരത്തെ ആഹാരത്തിന്റെ നന്ദിയും സ്നേഹവുമാണ് മരണശേഷവും ഈ നായ കാണിക്കുന്നത്.

​സ്വന്തം മക്കൾ പോലും പ്രായമായ മാതാപിതാക്കളെ നോക്കാൻ മടിക്കുന്ന ഈ കാലത്ത്, തനിക്ക് അന്നം നൽകിയതിനോടുള്ള നന്ദി മരണശേഷവും കാത്തുസൂക്ഷിക്കുന്ന ഈ തെരുവുനായ മനുഷ്യവർഗത്തിന് നൽകുന്നത് വലിയൊരു പാഠമാണ്. ഈ മിണ്ടാപ്രാണിയുടെ നിഷ്കളങ്കമായ സ്നേഹം ആമിനയുടെ മരണത്തിന് ശേഷവും നാട്ടുകാർക്കിടയിൽ വലിയ ചർച്ചയാവുകയാണ്.