പേരാമ്പ്ര സ്റ്റാൻഡിന് സമീപം സ്റ്റാർട്ട് ചെയ്യുന്നതിനിടെ ബുള്ളറ്റ് ബൈക്കിന് തീപിടിച്ചു

 

പേരാമ്പ്ര: പേരാമ്പ്ര ബസ് സ്റ്റാൻഡിന് സമീപം നിർത്തിയിട്ട ബുള്ളറ്റ് ബൈക്കിന് തീപിടിച്ചു. പന്തിരിക്കര സ്വദേശി അരുണിന്റെ ഉടമസ്ഥതയിലുള്ള ബൈക്കാണ് കത്തിനശിച്ചത്. ഭാഗ്യവശാൽ, ഫയർ ഫോഴ്സിന്റെ തക്കസമയത്തുള്ള ഇടപെടൽ മൂലം വൻ അപകടം ഒഴിവായി.

​ഇന്ന് ഉച്ചയ്ക്ക് 1.45 ഓടെയായിരുന്നു നാടിനെ നടുക്കിയ സംഭവം. സ്റ്റാൻഡിന് സമീപം നിർത്തിയിട്ടിരുന്ന ബൈക്ക് അരുൺ വീണ്ടും സ്റ്റാർട്ട് ചെയ്യാൻ ശ്രമിക്കുന്നതിനിടെ പെട്ടെന്ന് തീയും പുകയും ഉയരുകയായിരുന്നു.

സംഭവസമയത്ത് പേരാമ്പ്ര ബസ് സ്റ്റാൻഡിന് സമീപം ഫയർ ഫോഴ്സിന്റെ ബോധവത്ക്കരണ ക്ലാസ് നടക്കുന്നുണ്ടായിരുന്നു. വിവരം അറിഞ്ഞ ഉടൻ തന്നെ ഉദ്യോഗസ്ഥർ സംഭവസ്ഥലത്തേക്ക് കുതിച്ചു. സമീപത്തെ സഹകരണ ബാങ്കിൽ നിന്ന് ഉടൻ തന്നെ ഫയർ എക്സ്റ്റിംഗ്യൂഷർ (Fire Extinguisher) ലഭ്യമാക്കി തീ നിയന്ത്രണ വിധേയമാക്കുകയായിരുന്നു. ഫയർ ഫോഴ്സിന്റെ കൃത്യസമയത്തുള്ള ഇടപെടൽ ബൈക്ക് പൂർണ്ണമായും കത്തുന്നതിൽ നിന്നും വലിയ അപകടങ്ങൾ സംഭവിക്കുന്നതിൽ നിന്നും നാടിനെ രക്ഷിച്ചു.

സ്റ്റേഷൻ ഓഫീസർ പി.കെ. ഭരതന്റെ നേതൃത്വത്തിൽ ഗ്രേഡ് സ്റ്റേഷൻ ഓഫീസർ എം. മജീദ്, ഫയർ ആൻഡ് റെസ്‌ക്യൂ ഓഫീസർമാരായ അഷിൻ ഗോവിന്ദ്, വിജേഷ്, ഹൃദിൻ, ഡ്രൈവർ പി. സജിത്ത്, ഹോംഗാർഡ് എ.സി. അജീഷ് എന്നിവരടങ്ങുന്ന സംഘമാണ് രക്ഷാപ്രവർത്തനത്തിൽ പങ്കെടുത്തത്.