​"കൊന്നു കളയുമോ എന്ന് പേടിയാണ്": ആശ്രാമത്ത് വയോധികനെ മർദ്ദിച്ചവശനാക്കി യുവാവ്; കണ്ണീർക്കാഴ്ചയായി ഒരു മനുഷ്യൻ.

 

കൊല്ലം: ആരുമില്ലാത്തവനെ ആർക്കും തല്ലാം എന്ന ഹീനമായ മനോഭാവത്തിന് ഇരയായിരിക്കുകയാണ് ഒരു വയോധികൻ. കൊല്ലം ആശ്രാമം ശ്രീകൃഷ്ണ സ്വാമി ക്ഷേത്രത്തിലെ ഗാനമേളയ്ക്കിടയിൽ നൃത്തം ചെയ്ത വൃദ്ധനെയാണ് ഒരു യുവാവ് കസേര ഉപയോഗിച്ച് ക്രൂരമായി മർദ്ദിച്ചത്. അടിയുടെ ആഘാതത്തിൽ വൃദ്ധന്റെ മുൻനിരയിലെ പല്ലുകൾ കൊഴിഞ്ഞുപോവുകയും ചുണ്ട് കീറി രക്തം വരികയും ചെയ്തു.

രക്തം വാർന്ന മുഖവുമായി താൻ നേരിട്ട ക്രൂരതയെക്കുറിച്ച് അദ്ദേഹം വിവരിക്കുമ്പോൾ ചുറ്റുമുള്ളവർ പോലും നിശബ്ദരായി. "കൊന്നു കളയുമോ എന്നുള്ള പേടി കൊണ്ടാണ് ഒന്നും ചെയ്യാത്തത്. പല്ല് പോയി, ചുണ്ട് പൊട്ടി. കസേരയ്ക്കാണ് അടി കിട്ടിയത്," വേദനയോടെ അദ്ദേഹം പറഞ്ഞു. ഗാനമേളയുടെ ആവേശത്തിൽ ചുവടുവെച്ചതിനാണ് യാതൊരു പ്രകോപനവുമില്ലാതെ ഇയാൾക്കെതിരെ ആക്രമണം ഉണ്ടായത്.

ആരുമില്ലാത്തവൻ എന്ന ഭയം ഈ വൃദ്ധനെ വേട്ടയാടുകയാണ്. പകൽ സമയം ആക്രി പെറുക്കിയും കുപ്പി പെറുക്കിയും ഉപജീവനമാർഗ്ഗം കണ്ടെത്തുന്ന ഇദ്ദേഹം രാത്രി ഉറങ്ങുന്നത് ബീച്ചിലും മറ്റും ആണ്. "കേസ് കൊടുക്കാൻ പേടിയാണ്. രാത്രി കിടക്കുന്നത് ബീച്ചിലൊക്കെയാണ്. ആരെങ്കിലും വന്ന് കൊന്നാലോ എന്ന് പേടിയാണ്," എന്ന അദ്ദേഹത്തിന്റെ വാക്കുകൾ പരിഷ്കൃത സമൂഹത്തിന് തന്നെ നാണക്കേടാണ്.

അടി കിട്ടിയ വൃദ്ധനെ സഹായിക്കാനോ അക്രമിയെ തടയാനോ അവിടെയുണ്ടായിരുന്നവർ തയ്യാറായില്ലെന്ന പരാതിയും ഉയരുന്നുണ്ട്. പരാതി നൽകാൻ ആളില്ലാത്തതിന്റെ ധൈര്യത്തിൽ അക്രമി സംഭവസ്ഥലത്തുനിന്ന് രക്ഷപ്പെട്ടു. നിസ്സഹായനായ ഈ വയോധികനെ മർദ്ദിച്ച യുവാവിനെ നിയമത്തിന് മുന്നിൽ കൊണ്ടുവരണമെന്നും, ഇദ്ദേഹത്തിന് നീതി ലഭ്യമാക്കണമെന്നുമാണ് നാട്ടുകാർക്കിടയിൽ നിന്നുള്ള ആവശ്യം.