മുറിവേറ്റ വിരലിൽ മഷി പുരട്ടാൻ തർക്കം; യുവതിക്ക് വോട്ട് ചെയ്യാൻ കാത്തുനിൽക്കേണ്ടി വന്നത് നാലര മണിക്കൂർ
തൃശ്ശൂർ: കൈവിരലിന് പരിക്കേറ്റ യുവതിക്ക് വോട്ട് രേഖപ്പെടുത്താൻ പോളിംഗ് ഉദ്യോഗസ്ഥർ അനുമതി നിഷേധിച്ചത് മണിക്കൂറുകളോളം നാടകീയ രംഗങ്ങൾക്ക് വഴിതെളിച്ചു. തൃശ്ശൂർ കണ്ണംകുളങ്ങര സ്വദേശിനി അക്ഷയയ്ക്കാണ് (205-ാം നമ്പർ ബൂത്ത്) ഈ ദുരനുഭവം ഉണ്ടായത്. ഒടുവിൽ മുഖ്യ തിരഞ്ഞെടുപ്പ് ഓഫീസറുടെ ഇടപെടലിനെത്തുടർന്ന് വൈകുന്നേരം ആറുമണിയോടെയാണ് യുവതിക്ക് വോട്ട് ചെയ്യാനായത്.
മിക്സിയിൽ കുരുങ്ങി ഇടതുകൈയിലെ ചൂണ്ടുവിരലിന് സാരമായി പരിക്കേറ്റ അക്ഷയ, മാതാപിതാക്കൾക്കും കൈക്കുഞ്ഞിനുമൊപ്പമാണ് ഉച്ചയ്ക്ക് ഒന്നരയോടെ ബൂത്തിലെത്തിയത്. എന്നാൽ വിരലിലെ കെട്ട് അഴിച്ചുമാറ്റാതെ വോട്ട് ചെയ്യാൻ അനുവദിക്കില്ലെന്ന നിലപാട് പ്രിസൈഡിംഗ് ഓഫീസർ സ്വീകരിക്കുകയായിരുന്നു. മുറിവേറ്റ വിവരം ബോധിപ്പിക്കുകയും ഡോക്ടറുടെ കുറിപ്പടി കാണിക്കുകയും ചെയ്തിട്ടും ഉദ്യോഗസ്ഥ വഴങ്ങിയില്ലെന്ന് പരാതിയുണ്ട്. വിരൽ ഇല്ലാത്തവർക്ക് മാത്രമേ മറ്റ് വിരലുകളിൽ മഷി പുരട്ടാൻ നിയമമുള്ളൂ എന്നായിരുന്നു ഉദ്യോഗസ്ഥരുടെ വാദം.
മണിക്കൂറുകൾ കഴിഞ്ഞിട്ടും വോട്ട് ചെയ്യാൻ അനുവദിക്കാത്തതിനെത്തുടർന്ന് ഇടതുമുന്നണി സ്ഥാനാർത്ഥി വി.എസ്. സുനിൽകുമാർ ഉൾപ്പെടെയുള്ള രാഷ്ട്രീയ നേതാക്കൾ സ്ഥലത്തെത്തി പ്രതിഷേധിച്ചു. ജില്ലാ കളക്ടർ പറഞ്ഞാലും നിയമം ലംഘിക്കില്ലെന്ന ഉറച്ച നിലപാടിലായിരുന്നു പ്രിസൈഡിംഗ് ഓഫീസർ. സംഭവം മാധ്യമങ്ങളിൽ വാർത്തയായതോടെ സംസ്ഥാന മുഖ്യ തിരഞ്ഞെടുപ്പ് ഓഫീസർ നേരിട്ട് ഇടപെടുകയും വിവരങ്ങൾ തേടുകയും ചെയ്തു.
ഒടുവിൽ ഉന്നത ഉദ്യോഗസ്ഥരുടെ കർശന നിർദ്ദേശത്തെത്തുടർന്ന് ആറുമണിയോടെ അക്ഷയയ്ക്ക് വോട്ട് ചെയ്യാൻ അനുമതി ലഭിച്ചു. മുറിവേറ്റ ഭാഗത്തിന് താഴെയായി മഷി പുരട്ടിയാണ് വോട്ട് രേഖപ്പെടുത്തിയത്.
"വിരലിൽ മുറിവുണ്ടെന്ന് വിശ്വസിക്കാൻ പോലും ഉദ്യോഗസ്ഥർ തയ്യാറായില്ല. ഡോക്ടറുടെ കുറിപ്പടി നൽകിയിട്ടും മണിക്കൂറുകളോളം കൈക്കുഞ്ഞുമായി കാത്തുനിൽക്കേണ്ടി വന്നു. ഇത്തരമൊരു അനുഭവം ഇനി ആർക്കും ഉണ്ടാകരുത്," - വോട്ട് രേഖപ്പെടുത്തിയ ശേഷം അക്ഷയ മാധ്യമങ്ങളോട് പറഞ്ഞു.
തിരഞ്ഞെടുപ്പ് ഉദ്യോഗസ്ഥരുടെ കടുംപിടുത്തം വോട്ടർമാരെ ബുദ്ധിമുട്ടിക്കുന്നു എന്നാരോപിച്ച് ബൂത്ത് പരിസരത്ത് നേരിയ സംഘർഷാവസ്ഥയും ഉടലെടുത്തിരുന്നു
Comments
Post a Comment