ഗ്യാസ് ക്ഷാമത്തിൽ ആശങ്കയോടെ മലയോരം; കൂരാച്ചുണ്ടിൽ വിറകടുപ്പുകൾക്ക് വൻ ഡിമാൻഡ്

 

കൂരാച്ചുണ്ട്: പാചകവാതക ക്ഷാമവും അമിതവിലയും ജനജീവിതം ദുസ്സഹമാക്കിയതോടെ മലയോര മേഖലയിൽ വിറകടുപ്പുകൾക്ക് പ്രിയമേറുന്നു. സിലിണ്ടറുകൾ കൃത്യസമയത്ത് ലഭിക്കാതെ വന്നതോടെ ഭൂരിഭാഗം വീടുകളും ഹോട്ടലുകളും പഴയ വിറകടുപ്പുകളിലേക്ക് തിരിച്ചുപോവുകയാണ്. ഇതോടെ വിപണിയിൽ പലതരം വിറകടുപ്പുകൾക്കും വിറകിനും ആവശ്യക്കാരും വിലയും കുതിച്ചുയരുകയാണ്.

​വിപണി കീഴടക്കി നവീന അടുപ്പുകൾ

​ഇരുമ്പുസാധനങ്ങൾ വിൽക്കുന്ന കടകളിൽ ഇപ്പോൾ വിറകടുപ്പുകളുടെ വൻ ശേഖരമാണുള്ളത്. 800 രൂപ മുതൽ വിലയുള്ള കാസ്റ്റ് അയൺ അടുപ്പുകൾക്കാണ് ആവശ്യക്കാർ കൂടുതൽ. എവിടെയും മാറ്റിവെക്കാവുന്ന തരം അടുപ്പുകൾ മുതൽ അടുക്കളയിൽ സ്ഥിരമായി സ്ഥാപിക്കാവുന്ന പുകയില്ലാത്ത അടുപ്പുകൾ വരെ വിപണിയിലുണ്ട്. ഈർച്ചപ്പൊടി ഉപയോഗിച്ച് കത്തിക്കാവുന്ന അടുപ്പുകൾക്കും ബ്ലോവർ ഘടിപ്പിച്ച (കുറഞ്ഞ വിറകിൽ കൂടുതൽ ചൂട് ലഭിക്കുന്ന) നവീന അടുപ്പുകൾക്കും വലിയ പ്രചാരമാണ് ലഭിക്കുന്നത്.

​വിറകിനും ചകിരിക്കും 'ക്ഷാമം'

​അടുപ്പുകൾക്ക് ആവശ്യക്കാരേറിയതോടെ വിറകിന്റെ വിലയും നിയന്ത്രണമില്ലാതെ ഉയരുകയാണ്. മുൻപ് ഒരു പെട്ടി ഓട്ടോ വിറകിന് 2500 - 3000 രൂപയായിരുന്നു നിരക്കെങ്കിൽ ഇപ്പോഴത് 5000 രൂപ വരെയായി വർദ്ധിച്ചു.: ഇതര സംസ്ഥാനങ്ങളിലേക്ക് വൻതോതിൽ കയറ്റി അയക്കുന്നതിനാൽ ഇവ കിട്ടാനില്ലാത്ത അവസ്ഥയാണ്. ഫർണിച്ചർ ആവശ്യങ്ങൾക്കായി മരങ്ങൾ മുറിച്ചു കൊണ്ടുപോകുന്നതിനാൽ സാധാരണക്കാർക്ക് വിറകിനായി ഉപയോഗിക്കാൻ മരങ്ങൾ ലഭിക്കുന്നില്ല.

​പ്രതിസന്ധിയിലായി ഹോട്ടൽ - കാറ്ററിംഗ് മേഖല

​വാണിജ്യ സിലിണ്ടറുകളുടെ വിലക്കയറ്റമാണ് ഹോട്ടൽ ഉടമകളെയും സദ്യ ഒരുക്കുന്നവരെയും ഏറെ ബാധിച്ചിരിക്കുന്നത്. 1680 രൂപയുണ്ടായിരുന്ന 19 കിലോ സിലിണ്ടറിന് ഇപ്പോൾ അംഗീകൃത വില 2120 രൂപയാണ്. എന്നാൽ ഈ വിലയ്ക്കും ഗ്യാസ് ലഭ്യമല്ലാത്തതിനാൽ ഹോട്ടലുകൾ അടച്ചിടേണ്ട അവസ്ഥ വന്നെന്ന് കേരള ഹോട്ടൽ ആൻഡ് റസ്റ്ററന്റ് അസോസിയേഷൻ ജില്ലാ സെക്രട്ടറി ടി.വി. സാദിഖ് പറഞ്ഞു.

​ഹോട്ടലുകൾക്ക് സർക്കാർ 70 ശതമാനം സബ്‌സിഡി പ്രഖ്യാപിച്ചത് ആശ്വാസമായെങ്കിലും സിലിണ്ടറുകളുടെ ലഭ്യതക്കുറവ് മൂലം ഇപ്പോഴും കരിഞ്ചന്തയെ ആശ്രയിക്കേണ്ടി വരികയാണ്. കരിഞ്ചന്തയിൽ ഒരു സിലിണ്ടറിന് 3500 മുതൽ 4000 രൂപ വരെയാണ് ഈടാക്കുന്നത്. ഇത് വിവാഹ സദ്യകൾക്കും മറ്റും മുൻകൂട്ടി ഓർഡർ എടുത്ത കരാറുകാരെ വലിയ കടക്കെണിയിലേക്കാണ് തള്ളിവിടുന്നത്.

​ബദൽ മാർഗങ്ങൾ തേടി വൻകിടക്കാർ

​പ്രതിസന്ധി രൂക്ഷമായതോടെ വൻകിട ഹോട്ടലുകളും കാന്റീനുകളും വൈദ്യുതി ഉപയോഗിച്ച് പ്രവർത്തിക്കുന്ന അടുപ്പുകളിലേക്ക് മാറിക്കഴിഞ്ഞു. എങ്കിലും ഗ്രാമീണ മേഖലകളിൽ സാധാരണക്കാർക്കും ചെറുകിട കച്ചവടക്കാർക്കും വിറകടുപ്പുകൾ തന്നെയാണ് ഇപ്പോൾ ഏക ആശ്രയം