അഞ്ച് വർഷത്തെ വേർപാട്; വീഡിയോയിലൂടെ അമ്മയെ മകൻ ചേർത്തുപിടിച്ചപ്പോൾ

 

സേലം/തിരുപ്പത്തൂർ: അഞ്ച് വർഷം മുമ്പ് വീടുവിട്ടുപോയ, മാനസികാസ്വാസ്ഥ്യമുള്ള പ്രിയപ്പെട്ട അമ്മയെ സോഷ്യൽ മീഡിയയുടെ സഹായത്തോടെ കണ്ടെത്തി മകൻ. തമിഴ്നാട് തിരുപ്പത്തൂർ സ്വദേശിയായ ഗോവിന്ദമ്മാൾ എന്ന വയോധികയാണ് അഞ്ച് വർഷത്തെ അനിശ്ചിതത്വങ്ങൾക്കും വേർപാടിനും ശേഷം തന്റെ മകന്റെ കൈപിടിച്ച് വീട്ടിലേക്ക് മടങ്ങിയത്. സേലം ജില്ലയിലെ പേത്തിനായകൻ പാളയം എന്ന ഗ്രാമത്തിലെ നാട്ടുകാരുടെ കരുതലാണ് ഈ കുടുംബത്തെ വീണ്ടും ഒന്നിപ്പിച്ചത്.

ഒരു അപകടത്തിന് ശേഷമാണ് ഗോവിന്ദമ്മാളിന്റെ മാനസികനിലയിൽ മാറ്റങ്ങൾ വരുന്നത്. തുടർച്ചയായ ചികിത്സകൾക്കിടെ അഞ്ച് വർഷം മുമ്പ് അവർ വീടുവിട്ടിറങ്ങുകയായിരുന്നു. തിരുപ്പത്തൂരിലെ വീട്ടുകാർ പലയിടത്തും അന്വേഷണം നടത്തിയെങ്കിലും ഫലമുണ്ടായില്ല. അമ്മയെ ജീവനോടെ കണ്ടെത്തുമെന്ന പ്രതീക്ഷ മകനും ബന്ധുക്കളും കൈവിട്ടിരുന്നു.

അലഞ്ഞുതിരിഞ്ഞ് ഒടുവിൽ സേലം ജില്ലയിലെ പേത്തിനായകൻ പാളയം എന്ന ഗ്രാമത്തിലാണ് ഗോവിന്ദമ്മാൾ എത്തിച്ചേർന്നത്. മാനസികനില തെറ്റിയ അവസ്ഥയിലായതിനാൽ തന്റെ പേരോ മേൽവിലാസമോ കൃത്യമായി പറയാൻ അവർക്ക് സാധിച്ചിരുന്നില്ല. എങ്കിലും, ആ നാട്ടുകാർ അവരെ ഉപേക്ഷിച്ചില്ല. ആ ഗ്രാമത്തിലെ ആളുകൾ ഭക്ഷണവും വെള്ളവും നൽകി അവരെ സംരക്ഷിച്ചു. ആർക്കും ഒരു ശല്യവുമില്ലാതെ ആ ഗ്രാമത്തിലെ തെരുവുകളിൽ അവർ കഴിഞ്ഞുപോന്നു.

ഈയടുത്ത് ആ ഗ്രാമത്തിലെ ഒരു കൂട്ടം യുവാക്കൾ ഗോവിന്ദമ്മാളിനെ ശുശ്രൂഷിക്കാൻ തീരുമാനിച്ചു. ജട പിടിച്ച മുടി വെട്ടി വൃത്തിയാക്കി, അവർക്ക് പുതിയ വസ്ത്രങ്ങൾ വാങ്ങി നൽകുകയും കുളിപ്പിച്ച് സുന്ദരിയാക്കുകയും ചെയ്തു. ഈ ദൃശ്യങ്ങൾ പ്രദേശത്തെ ഒരു യൂട്യൂബ് ചാനലിൽ അപ്‌ലോഡ് ചെയ്യുകയും ചെയ്തു. ആ വീഡിയോയാണ് ഗോവിന്ദമ്മാളിന്റെ മകൻ കാണാനിടയായത്. ദൃശ്യങ്ങളിൽ കണ്ടത് തന്റെ പ്രിയപ്പെട്ട അമ്മയാണെന്ന് തിരിച്ചറിഞ്ഞ മകൻ ഉടൻ തന്നെ സേലത്തേക്ക് തിരിച്ചു.

പേത്തിനായകൻ പാളയത്ത് എത്തിയ മകൻ അമ്മയെ നേരിൽ കണ്ട് തിരിച്ചറിഞ്ഞു. നാട്ടിലെ പ്രമുഖരുടെയും നാട്ടുകാരുടെയും സാന്നിധ്യത്തിൽ തന്റെ തിരിച്ചറിയൽ രേഖകൾ ഹാജരാക്കി ഗോവിന്ദമ്മാളിന്റെ മകനാണെന്ന് തെളിയിച്ചു. തുടർന്ന്, നിയമനടപടികൾ പൂർത്തിയാക്കി അമ്മയെ മകൻ തിരികെ വീട്ടിലേക്ക് കൂട്ടിക്കൊണ്ടുപോയി.

​മാനസികമായി തകർന്ന ഒരു സ്ത്രീയെ സ്വന്തം വീട്ടിലെ അംഗത്തെപ്പോലെ വർഷങ്ങളോളം സംരക്ഷിച്ച പേത്തിനായകൻ പാളയത്തെ നാട്ടുകാർക്ക് ഹൃദയം നിറഞ്ഞ നന്ദി അറിയിക്കുകയാണ് ഈ മകൻ. സോഷ്യൽ മീഡിയയുടെ നന്മ നിറഞ്ഞ ഉപയോഗവും, ഒരു ഗ്രാമത്തിന്റെ മാനുഷികതയുമാണ് ഒരമ്മയെ തിരികെ തന്റെ മകന്റെ തണലിലെത്തിച്ചത്