ചക്കിട്ടപ്പാറയിൽ ആവേശക്കടലായി തഹലിയ ഫാത്തിമ; മലയോരത്തിന്റെ കനൽപഥങ്ങളിലൂടെ ജനമനസ്സ് കീഴടക്കി തഹലിയ

 ചക്കിട്ടപ്പാറ: വന്യമൃഗശല്യവും വികസന മുരടിപ്പും ചർച്ചയാകുന്ന പേരാമ്പ്രയിലെ മലയോര മേഖലകളിൽ ആവേശമായി യുഡിഎഫ് സ്ഥാനാർത്ഥി ഫാത്തിമ തഹലിയയുടെ പര്യടനം. ചക്കിട്ടപ്പാറ ഗ്രാമപഞ്ചായത്തിലെ വിവിധ കേന്ദ്രങ്ങളിൽ നടന്ന സ്വീകരണ പരിപാടികളിൽ വൻ ജനമുന്നേറ്റമാണ് ദൃശ്യമായത്. പാറത്തറ മുക്ക്, പൊന്മല പാറ, നരിനട പിള്ള പെരുമണ്ണ എന്നിവിടങ്ങളിലൂടെ നീങ്ങിയ പര്യടനത്തിൽ സ്ത്രീകളും യുവാക്കളും കുട്ടികളുമടക്കം നൂറുകണക്കിന് ആളുകൾ സ്ഥാനാർത്ഥിയെ സ്വീകരിക്കാൻ എത്തിച്ചേർന്നു.

നീറുന്ന പ്രശ്നങ്ങൾക്ക് കാതോർത്ത് സ്ഥാനാർത്ഥി

വർഷങ്ങളായി മലയോര നിവാസികൾ നേരിടുന്ന വന്യമൃഗശല്യം, ഇഴഞ്ഞുനീങ്ങുന്ന മലയോര ഹൈവേ നിർമ്മാണം, പൂഴിത്തോട്-പടിഞ്ഞാറത്തറ റോഡ് യാഥാർത്ഥ്യമാക്കൽ തുടങ്ങിയ വിഷയങ്ങളിൽ സ്ഥാനാർത്ഥി ജനങ്ങളുമായി സംവദിച്ചു. ചക്കിട്ടപ്പാറയിലെ ഗ്രൗണ്ട് സൗകര്യങ്ങളുടെ പോരായ്മയും കാർഷിക മേഖലയിലെ വിലതകർച്ചയും മലയോരത്തിന്റെ അടിസ്ഥാന വികസന മുരടിപ്പും പരിഹരിക്കാൻ താൻ പ്രതിജ്ഞാബദ്ധമാണെന്ന് തഹലിയ ഉറപ്പുനൽകി.

"ഇന്ത്യൻ ഭരണഘടന ഉയർത്തിപ്പിടിച്ചുകൊണ്ട് ജാതിമതഭേദമെന്യേ എല്ലാവരെയും ഒരേപോലെ കാണാനാണ് ഞാൻ ആഗ്രഹിക്കുന്നത്. നിങ്ങളുടെ പ്രശ്നങ്ങളിൽ ഒരാളായി ഞാൻ എന്നും കൂടെയുണ്ടാകും," സ്വീകരണ കേന്ദ്രങ്ങളിൽ തഹലിയ പറഞ്ഞു. പര്യടനത്തിനിടെ വിവിധ മതസ്ഥാപനങ്ങൾ സന്ദർശിക്കാനും വീടുകളിൽ കഴിയുന്ന രോഗികളെ നേരിൽ കണ്ട് ആശ്വസിപ്പിക്കാനും സ്ഥാനാർത്ഥി സമയം കണ്ടെത്തി.

ഭരണവിരുദ്ധ വികാരം യുഡിഎഫിന് കരുത്താകുന്നു

കഴിഞ്ഞ തദ്ദേശ തിരഞ്ഞെടുപ്പിൽ മലയോര മേഖലയിലുണ്ടായ ഇടത് വിരുദ്ധ വികാരം ഇപ്പോഴും ശക്തമാണെന്ന് യുഡിഎഫ് വിലയിരുത്തുന്നു. മലയോര ജനതയെ അവഗണിക്കുന്ന ഗവൺമെന്റിനെതിരെയുള്ള അമർഷം വോട്ടായി മാറുമെന്നാണ് മുന്നണിയുടെ പ്രതീക്ഷ. രാഹുൽ ഗാന്ധിയുടെ മണ്ഡലത്തിലെ സന്ദർശനത്തോടെ യുഡിഎഫ് ക്യാമ്പുകൾ കൂടുതൽ ആവേശത്തിലായിട്ടുണ്ട്.

കുറഞ്ഞ കാലം കൊണ്ട് തന്നെ വികസന കാഴ്ചപ്പാടും എല്ലാവരെയും ഉൾക്കൊള്ളുന്ന നിലപാടും വഴി വോട്ടർമാരുടെ ഹൃദയത്തിൽ ഇടം പിടിക്കാൻ തഹലിയക്ക് സാധിച്ചിട്ടുണ്ട്. എൽഡിഎഫിന്റെ ഭാഗത്തുനിന്നുണ്ടാകുന്ന വർഗ്ഗീയ പരാമർശങ്ങൾ ജനങ്ങൾ തള്ളിക്കളയുമെന്നും, കഴിഞ്ഞ ലോക്സഭാ തിരഞ്ഞെടുപ്പിലേതുപോലെ ഈ നീക്കം യുഡിഎഫിന് അനുകൂല തരംഗമുണ്ടാക്കുമെന്നും നേതാക്കൾ പറഞ്ഞു. വിജയത്തിനായി ഏത് മാർഗ്ഗവും സ്വീകരിക്കുന്ന ഇടതുപക്ഷത്തിന്റെ മുഖം ഈ തിരഞ്ഞെടുപ്പോടെ വെളിവാകുമെന്നും യുഡിഎഫ് കേന്ദ്രങ്ങൾ കൂട്ടിച്ചേർത്തു.

സ്ഥാനാർത്ഥിക്കൊപ്പം യുഡിഎഫിന്റെ പ്രമുഖ നേതാക്കളും നൂറുകണക്കിന് പ്രവർത്തകരും പര്യടനത്തിൽ ഉടനീളം പങ്കെടുത്തു. മലയോര ജനതയുടെ പ്രശ്നങ്ങൾ ആഴത്തിൽ തൊട്ടറിഞ്ഞുള്ള തഹലിയയുടെ ഇന്നത്തെ പ്രചാരണം വൻ വിജയമായി.