ഉച്ചയ്ക്ക് നടന്ന മരണം അറിയിച്ചത് രാത്രി പത്തിന്; വിദ്യാർത്ഥിനിയുടെ മരണത്തിൽ ദുരൂഹത ആരോപിച്ച് പിതാവിന്റെ കുടുംബം.

 

ബെംഗളൂരു: പി.യു.സി പരീക്ഷയിൽ പരാജയപ്പെട്ടതിനെ തുടർന്ന് ഹെബ്ബാളിൽ വിദ്യാർത്ഥിനി ജീവനൊടുക്കിയ സംഭവത്തിൽ ദുരൂഹതയേറുന്നു. ഹെബ്ബാൾ മനോരായണപാളയ സ്വദേശിനി തനുശ്രീ (17) ആണ് മരിച്ചത്. മരണസമയത്തെക്കുറിച്ചുള്ള മെഡിക്കൽ റിപ്പോർട്ടിലെ കണ്ടെത്തലുകളും മാതാവിന്റെ മൊഴിയും തമ്മിലുള്ള വൈരുദ്ധ്യമാണ് ഇപ്പോൾ വലിയ സംശയങ്ങൾക്ക് വഴിതെളിച്ചിരിക്കുന്നത്.

വ്യാഴാഴ്ച രാത്രി പത്ത് മണിയോടെയാണ് മകൾ ജീവനൊടുക്കി എന്ന വിവരം പെൺകുട്ടിയുടെ മാതാവ് പൊലീസിനെ അറിയിക്കുന്നത്. പരീക്ഷാ ഫലം വന്നപ്പോൾ പരാജയപ്പെട്ടതിലുള്ള മാനസിക വിഷമത്തിലാണ് തനുശ്രീ ആത്മഹത്യ ചെയ്തതെന്നായിരുന്നു മാതാവിന്റെ പ്രാഥമിക മൊഴി. രാത്രി പത്ത് മണിയോടെ മാതാവും മറ്റു നാല് പേരും ചേർന്ന് പെൺകുട്ടിയെ കെട്ടിത്തൂങ്ങിയ നിലയിൽ നിന്ന് താഴെയിറക്കിയ ശേഷമാണ് ബന്ധുക്കളെയും പൊലീസിനെയും വിവരം അറിയിച്ചത്.

എന്നാൽ, വെള്ളിയാഴ്ച പുറത്തുവന്ന വിശദമായ പോസ്റ്റ്‌മോർട്ടം റിപ്പോർട്ടിൽ മരണം നടന്നത് വ്യാഴാഴ്ച ഉച്ചയ്ക്ക് ഒരു മണിയോടെയാണെന്ന് വ്യക്തമാക്കുന്നു. രാത്രി പത്ത് മണിയോടെയാണ് വീട്ടുകാർ വിവരം പുറത്തുപറയുന്നത്. മരണം നടന്ന് ഏകദേശം ഒമ്പത് മണിക്കൂറോളം കഴിഞ്ഞിട്ടും വിവരം രഹസ്യമാക്കി വെച്ചത് എന്തുകൊണ്ടാണെന്ന ചോദ്യമാണ് തനുശ്രീയുടെ പിതാവിന്റെ വീട്ടുകാർ ഉയർത്തുന്നത്. ഈ കാലതാമസത്തിൽ ദുരൂഹതയുണ്ടെന്ന് ചൂണ്ടിക്കാട്ടി അവർ പരാതി നൽകി.

സംഭവത്തിൽ അസ്വാഭാവിക മരണത്തിന് കേസെടുത്ത ഹെബ്ബാൾ പൊലീസ് വിശദമായ അന്വേഷണം ആരംഭിച്ചു. മാതാവിന്റെയും മരണസമയത്ത് വീട്ടിലുണ്ടായിരുന്ന മറ്റു ബന്ധുക്കളുടെയും മൊഴികൾ പൊലീസ് വീണ്ടും രേഖപ്പെടുത്തും. ഉച്ചയ്ക്ക് നടന്ന മരണം അറിയിക്കാൻ രാത്രി വരെ വൈകിയത് എന്തുകൊണ്ടാണെന്നും ആ സമയമത്രയും വീട്ടിൽ എന്താണ് സംഭവിച്ചതെന്നും കണ്ടെത്താനാണ് പൊലീസിന്റെ ശ്രമം. ഫോറൻസിക് പരിശോധനാ ഫലങ്ങൾ കൂടി ലഭിച്ചാലേ മരണത്തിലെ യഥാർത്ഥ വസ്തുതകൾ പുറത്തുവരികയുള്ളൂ.