പണം നൽകി, പ്രണയിച്ചു; ഒടുവിൽ പണം തിരികെ ചോദിച്ചതിന് കാറിൽ കൊണ്ടുപോയി കത്തിച്ചു. അധ്യാപികയ്ക്ക് ദാരുണാന്ത്യം

കലബുറഗി: അഞ്ച് വർഷം നീണ്ട സൗഹൃദത്തിനും സാമ്പത്തിക ചൂഷണത്തിനുമൊടുവിൽ സർക്കാർ സ്കൂൾ അധ്യാപികയെ കാമുകൻ ക്രൂരമായി കൊലപ്പെടുത്തി. കലബുറഗി സ്വദേശിനിയും ബീദറിലെ സർക്കാർ സ്കൂൾ അധ്യാപികയുമായ ജ്യോതി കപാളെ (57) ആണ് കൊല്ലപ്പെട്ടത്. സംഭവത്തിൽ ഇവരുടെ അയൽവാസിയും കാമുകനുമായ അമർ ഗുഡ്ഡള്ളി (27) പോലീസിന്റെ പിടിയിലായി.

അവിവാഹിതയായ ജ്യോതിയുമായി കഴിഞ്ഞ അഞ്ച് വർഷമായി അമർ അടുപ്പത്തിലായിരുന്നു. വിവാഹിതനും കുട്ടികളുമുള്ള അമർ ജ്യോതിയുടെ സമ്പാദ്യം ലക്ഷ്യം വെച്ചാണ് സൗഹൃദം സ്ഥാപിച്ചത്. വിവിധ ഘട്ടങ്ങളിലായി 15 മുതൽ 20 ലക്ഷം രൂപ വരെ ഇയാൾ ജ്യോതിയിൽ നിന്ന് കൈക്കലാക്കിയിരുന്നു. ഈ പണം ഉപയോഗിച്ചാണ് ഇയാൾ ആഡംബര കാർ വാങ്ങിയതും വിലകൂടിയ ജീവിതം നയിച്ചിരുന്നതുമെന്ന് പോലീസ് പറഞ്ഞു. എന്നാൽ, നൽകിയ പണം ജ്യോതി തിരികെ ചോദിക്കാൻ തുടങ്ങിയതോടെ അവരെ വകവരുത്താൻ അമർ പദ്ധതിയിടുകയായിരുന്നു.

കഴിഞ്ഞ ഏപ്രിൽ മൂന്നിനാണ് നാടിനെ നടുക്കിയ സംഭവം നടന്നത്. ക്ഷേത്ര ദർശനത്തിനെന്ന വ്യാജേന ജ്യോതിയെ അമർ തന്റെ മഹീന്ദ്ര ഥാർ കാറിൽ കൂട്ടിക്കൊണ്ടുപോയി. രാത്രിയോടെ കലമൂഡിന് സമീപമുള്ള ആളൊഴിഞ്ഞ സ്ഥലത്തെത്തിച്ച് ആയുധം ഉപയോഗിച്ച് കൊലപ്പെടുത്തുകയായിരുന്നു. തുടർന്ന് തെളിവ് നശിപ്പിക്കാനായി കാറിൽ കരുതിയിരുന്ന പെട്രോളൊഴിച്ച് മൃതദേഹം കത്തിച്ചു. ദിവസങ്ങൾക്ക് ശേഷം പാതി കരിഞ്ഞ നിലയിലാണ് മൃതദേഹം കണ്ടെത്തുന്നത്.

മൃതദേഹം തിരിച്ചറിയാൻ കഴിയാത്ത വിധം കത്തിച്ചിരുന്നെങ്കിലും ശാസ്ത്രീയ അന്വേഷണത്തിലൂടെ പോലീസ് ഇരയെ തിരിച്ചറിഞ്ഞു. ജ്യോതിയുടെ ഫോൺ രേഖകൾ പരിശോധിച്ചതോടെയാണ് അമറുമായുള്ള ബന്ധം പുറത്തുവന്നത്. ഒളിവിൽ പോയ പ്രതിയെ പിടികൂടി ചോദ്യം ചെയ്തതോടെ ഇയാൾ കുറ്റസമ്മതം നടത്തി.

​കൊലപാതകത്തിന് ഉപയോഗിച്ച ആയുധവും പെട്രോൾ കാനും അധ്യാപികയുടെ പണം ഉപയോഗിച്ച് വാങ്ങിയ ഥാർ കാറും പോലീസ് കസ്റ്റഡിയിലെടുത്തു. പ്രതിയെ കോടതി റിമാൻഡ് ചെയ്തു. സംഭവത്തിൽ കൂടുതൽ സാമ്പത്തിക ഇടപാടുകൾ നടന്നിട്ടുണ്ടോ എന്ന കാര്യത്തിൽ പോലീസ് അന്വേഷണം തുടരുകയാണ്.