സുരക്ഷയ്ക്കായി കെട്ടിയ തേങ്ങാത്തൊണ്ട് ചതിച്ചു; രക്ഷാകവചം മരണക്കെണിയായി
വടകര: വിഷു ആഘോഷത്തിന്റെ ആഹ്ലാദങ്ങൾക്കിടെ വടകര ആയഞ്ചേരിയെ കണ്ണീരിലാഴ്ത്തി കൗമാരക്കാരന്റെ ദാരുണാന്ത്യം. ആയഞ്ചേരി കാക്കുനി തുലറ്റുന്നട സ്വദേശി ഹേമന്ദ് ബാബു (16) ആണ് വീടിന് സമീപത്തെ കുളത്തിൽ മുങ്ങിമരിച്ചത്. ബുധനാഴ്ച ഉച്ചയോടെയാണ് നാടിനെ നടുക്കിയ അപകടം സംഭവിച്ചത്.
വിഷു പ്രമാണിച്ചു വീടിന് സമീപത്തെ ക്ഷേത്രത്തിൽ കണിയൊരുക്കിയ ശേഷമാണ് ഹേമന്ദ് സുഹൃത്തുക്കൾക്കൊപ്പം കുളിക്കാനിറങ്ങിയത്. നീന്തൽ വശമില്ലാതിരുന്ന ഹേമന്ദ്, വെള്ളത്തിൽ പൊങ്ങിക്കിടക്കുന്നതിനായി തേങ്ങയുടെ തൊണ്ടുകൾ കൂട്ടിക്കെട്ടി ശരീരത്തിൽ ബന്ധിച്ചിരുന്നു. എന്നാൽ കുളിക്കുന്നതിനിടയിൽ അപ്രതീക്ഷിതമായി ശരീരത്തിൽ നിന്നും തൊണ്ടുകൾ അഴിഞ്ഞുപോവുകയും ഹേമന്ദ് വെള്ളത്തിൽ താഴുകയുമായിരുന്നു.
ഹേമന്ദ് വെള്ളത്തിൽ താഴുന്നത് കണ്ട് കൂടെയുണ്ടായിരുന്ന സുഹൃത്തുക്കൾ രക്ഷിക്കാൻ കിണഞ്ഞു പരിശ്രമിച്ചെങ്കിലും ഫലമുണ്ടായില്ല. വിവരമറിഞ്ഞ് വടകരയിൽ നിന്നെത്തിയ അഗ്നിരക്ഷാ സേനയാണ് ഏറെ നേരത്തെ തിരച്ചിലിനൊടുവിൽ ഹേമന്ദിനെ വെള്ളത്തിന് പുറത്തെടുത്തത്. ഉടൻ തന്നെ ആയഞ്ചേരിയിലെ സ്വകാര്യ ആശുപത്രിയിൽ എത്തിച്ചെങ്കിലും അപ്പോഴേക്കും ജീവൻ നഷ്ടപ്പെട്ടിരുന്നു.
ആഘോഷങ്ങൾക്കിടെയുണ്ടായ ഈ അപ്രതീക്ഷിത മരണം കാക്കുനി പ്രദേശത്തെയാകെ ദുഃഖത്തിലാഴ്ത്തിയിരിക്കുകയാണ്
Comments
Post a Comment