മരണമെത്തിയത് അപ്രതീക്ഷിതമായി; കയാക്കിംഗിനിടെ അപകടം
കാഞ്ഞങ്ങാട്: ബ്രിട്ടനിൽ കയാക്കിംഗിനിടെയുണ്ടായ അപകടത്തിൽ മലയാളി യുവതി മരിച്ചു. കാഞ്ഞങ്ങാട് വെള്ളിക്കോത്ത് കാരക്കുഴി സ്വദേശിനി കീർത്തി രാജഗോപാൽ (25) ആണ് മരിച്ചത്. വെള്ളിക്കോത്ത് സ്വദേശിയും റിട്ടയേർഡ് സൈനികനുമായ രാജഗോപാലിന്റെയും എംപ്ലോയ്മെന്റ് എക്സ്ചേഞ്ച് ഉദ്യോഗസ്ഥ റീനയുടെയും മകളാണ്.
യുകെയിലെ ആരോഗ്യ മേഖലയിൽ ജോലി ചെയ്തു വരികയായിരുന്നു കീർത്തി. കഴിഞ്ഞ ദിവസം സുഹൃത്തുക്കളോടൊപ്പം കയാക്കിംഗിന് പോയപ്പോഴാണ് നാടിനെ നടുക്കിയ ദുരന്തമുണ്ടായത്. കയാക്കിംഗിനിടെ അബദ്ധത്തിൽ പുഴയിൽ വീഴുകയായിരുന്നുവെന്നാണ് പ്രാഥമിക വിവരം. ഉടൻ തന്നെ രക്ഷാപ്രവർത്തനം നടത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
നാട്ടിലും സുഹൃത്തുക്കൾക്കിടയിലും ഏറെ പ്രിയങ്കരിയായിരുന്നു കീർത്തി. ഉന്നത പഠനത്തിന് ശേഷമാണ് ആരോഗ്യ മേഖലയിലെ ജോലി തേടി കീർത്തി യുകെയിലേക്ക് പോയത്. മകളുടെ അപ്രതീക്ഷിത വിയോഗവാർത്തയറിഞ്ഞ ഞെട്ടലിലാണ് വെള്ളിക്കോത്തെ കുടുംബവും നാട്ടുകാരും.
മൃതദേഹം നാട്ടിലെത്തിക്കാനുള്ള ശ്രമങ്ങൾ ബന്ധപ്പെട്ട അധികൃതരുടെയും പ്രവാസി സംഘടനകളുടെയും സഹായത്തോടെ ആരംഭിച്ചിട്ടുണ്ട്. പോസ്റ്റ്മോർട്ടം നടപടികൾക്ക് ശേഷം മൃതദേഹം വിട്ടുകിട്ടുന്ന മുറയ്ക്ക് നാട്ടിലേക്ക് കൊണ്ടുവരും. സംസ്കാരം പിന്നീട് കാഞ്ഞങ്ങാട് വെള്ളിക്കോത്തെ വീട്ടുവളപ്പിൽ നടക്കും.
Comments
Post a Comment